Durai Dayanidhi Death Threat |துரை தயாநிதிக்கு கொலை மிரட்டல்! ALERT MODE-ல் வேலூர் சிஎம்சி

உடல் நலம் பாதிக்கப்பட்டு வேலூர் சிஎம்சி மருத்துவமனையில் சிகிச்சை பெற்று வரும் மு.க.அழகிரியின் மகன் துரை தயாநிதிக்கு மின்னஞ்சலில் கொலை மிரட்டல் விடுக்கப்பட்டுள்ளதாக தகவல் வெளியாகி பரபரப்பை ஏற்படுத்தியுள்ளது. 

முன்னாள் மத்திய அமைச்சரும் முதல்வர் மு.க ஸ்டாலினின் சகோதருமான மு.க அழகிரியின் மகன் துரை தயாநிதி. தொழில்அதிபராகவும் மற்றும் திரைப்பட தயாரிப்பாளரான துரை தயாநிதி கடந்த 2010 ஆம் ஆண்டு சென்னையை சேர்ந்த வழக்கறிஞர் அனுஷாவை திருமணம் செய்தார். இந்த தம்பதிக்கு வேதாந்த், ருத்ர தேவ் என இருமகன்கள் உள்ளனர்.

இந்நிலையில், கடந்த ஆண்டு டிசம்பர் 6 ஆம் தேதி துரை தயாநிதி அழகிரி திடீர் உடல்நலக்குறைவு ஏற்பட்டது. திடீரென வீட்டில் மயங்கி சரிந்து விழுந்த அவரை உடனடியாக சென்னை அப்போலோ மருத்துவமனையில் அனுமதித்தனர்.இதைத்தொடர்ந்து அவருக்கு மூளையிலுள்ள ரத்தக் குழாயில் அடைப்பு இருப்பதை உறுதி செய்யப்பட்டது. இதைத்தொடர்ந்து, உடனடியாக அவருக்கு அறுவை சிகிச்சை மேற்கொள்ளப்பட்டது. சென்னை அப்பல்லோ மருத்துவமனையில் 3 மாத கால சிகிச்சை பெற்று வந்த துரை தயாநிதி அழகிரி, மேல் சிகிச்சைக்காக வேலூரில் உள்ள சிஎம்சி மருத்துவமனையில் கடந்த மார்ச் மாதம் 14 ஆம் தேதி அனுமதிக்கப்பட்டார். அவரை முக அழகிரி மற்றும் குடும்பத்தினர் உடனிருந்து கவனித்து வருகின்றனர். சித்தப்பா ஸ்டாலினும் இருமுறை நேரில் வந்து துரை தயாநிதியை நலம் விசார்த்து சென்றார். 

சிஎம்சி மருத்துவமனையில் ஏ பிளாக்கில் துரை தயாநிதி சிகிச்சை பெற்று வரும் நிலையில் முழு போலீஸ் பாதுகாப்பு வழங்கப்பட்டு உள்ளது. இந்த நிலையில்தான், சிஎம்சி மருத்துவமனை மருத்துவ கண்காணிப்பாளர் அலுவலகத்துக்கு நேற்று வந்த ஒரு மெயிலில் துரை தயாநிதிக்கு கொலை மிரட்டல் விடுக்கப்பட்டுள்ளது. மருத்துவமனை நிர்வாகம் சார்பில் வேலூர் மாவட்ட காவல்துறைக்கு இமெயில் மூலமாக புகார் அனுப்பி வைக்கப்பட்டது. இதனையடுத்து, மருத்துவமனையில் பாதுகாப்பு தீவிரப்படுத்தப்பட்டுள்ளது. 

மின்னஞ்சல் அனுப்பிய நபர் தொடர்பாக சைபர் குற்றப்பிரிவு போலீசார் விசாரித்து வருகின்றனர். துரை தயாநிதி சிகிச்சை பெற்று வரும் சிஎம்சி ஏ-பிளாக்கில் கூடுதலாக ஒரு உதவி ஆய்வாளர் தலைமையில் 4 பேர் அடங்கிய சீருடை அணியாத காவலர்கள் பாதுகாப்பு மற்றும் கண்காணிப்பு பணியில் ஈடுபட்டுள்ளனர்.

மருத்துவமனையில் சிகிச்சையில் உள்ள துரை தயாநிதிக்கு கொலை மிரட்டல் விடுக்கப்பட்டுள்ளது பெரும் பரபரப்பை ஏற்படுத்தியுள்ளது