சேலம் விமான நிலையத்திற்கு எடப்பாடி பழனிசாமி பெயர்: மத்திய அமைச்சருக்கு பறந்த கடிதம்?

சேலத்திற்கு பெருமை சேர்த்த எடப்பாடி பழனிசாமிக்கு பெருமை சேர்க்கும் விதமாக Dr.எடப்பாடி பழனிசாமி விமான நிலையம் என்ற பெயரை சேலம் விமான நிலையத்திற்கு சூட்ட வேண்டும்.

வழக்கறிஞர் மணிகண்டன்

சேலம் மாவட்டம் ஓமலூர் அடுத்துள்ள காமலாபுரத்தில் சேலம் விமான நிலையம் உள்ளது. சேலத்தில் இருந்து சென்னைக்கு ட்ரூ ஜெட் நிறுவனம் சார்பில் தினசரி விமான சேவை நடைபெற்று வந்தது. இதனிடையே கடந்த 2021 ஆம் ஆண்டு ஜூன் மாதம் விமான சேவை நிறுத்தப்பட்டது. விமான சேவை நிறுத்தப்பட்டு 2 ஆண்டுகள் கடந்த நிலையில், மீண்டும் விமான சேவையை தொடங்க வேண்டும் என சேலம் நாடாளுமன்ற உறுப்பினர் எஸ்.ஆர். பார்த்திபன் தொடர்ந்து கோரிக்கை விடுத்து வந்தார். நாடாளுமன்றத்தில் இதுகுறித்து கேள்வி எழுப்பியதுடன் சம்பந்தப்பட்ட துறை அமைச்சரையும் அவர் நேரில் சந்தித்து கோரிக்கை அளித்தார். இந்த நிலையில், வரும் அக்டோபர் 16 ஆம் தேதி (நாளை) முதல் சேலம் விமான நிலையத்தில் இருந்து மீண்டும் விமான சேவை தெரிவித்துள்ளார். 

நாளை முதல் அலையன்ஸ் நிறுவனத்தின் சார்பில் பெங்களூர் -  சேலம் - கொச்சின் வழித்தடத்தில் விமானம் இயக்கப்பட உள்ளது. கொச்சின் - சேலம் -பெங்களூர் வழித்தடத்தில் மீண்டும் இயக்கப்படும். வாரத்தில் புதன்கிழமை மற்றும் வெள்ளிக்கிழமை தவிர மற்ற 5 நாட்களில் விமான சேவை தொடங்கப்பட உள்ளது. இதே போன்று அக்டோபர் மாத இறுதியில் இன்டிகோ நிறுவனம் சார்பில் வரும் அக்டோபர் 29 ஆம் பெங்களூர் -  சேலம் - ஹைதராபாத் வழித்தடத்தில் விமான சேவை  தொடங்கப்படுகிறது. மீண்டும்  ஹைதராபாத் - சேலம் - பெங்களூர் வழித்தடத்தில் விமானம் இயக்கப்படும். வாரத்தின் நான்கு நாட்களுக்கு இண்டிகோ விமான சேவை நடைபெறும் திங்கட்கிழமை, செவ்வாய்க்கிழமை , வியாழக்கிழமை மற்றும் சனிக்கிழமைகளில் இந்த சேவை நடைபெறும். இதே போன்று வாரத்தின் ஏழு நாட்களிலும் சேலத்திலிருந்து சென்னைக்கு விமான சேவை அளிக்க இண்டிகோ நிறுவனம் முன் வந்துள்ளது. சேலம் சென்னை விமான சேவையும் அக்டோபர் 29 ஆம் தேதி தொடங்கப்பட உள்ளது. 2 ஆண்டுகளுக்குப் பிறகு விமான சேவை தொடங்குவதால் தேவையான அனைத்து ஏற்பாடுகளும் செய்யப்பட்டுள்ளன. சேலம் மற்றும் அண்டை மாவட்டங்களைச் சேர்ந்த பொதுமக்கள், வர்த்தகர்கள் இந்த வாய்ப்பை முழுமையாக பயன்படுத்திக் கொள்ள வேண்டும். சேலத்தில் இருந்து வெளிமாநிலத்தில் நாள் ஒன்றுக்கு ஐந்து முறை விமானங்கள் சேர்ந்து வந்து செல்லும் வாய்ப்பு கடும் முயற்சிக்குப் பிறகு உருவாக்கப்பட்டுள்ளது. சேலத்தில் இருந்து விமான சேவை இரவு நேரத்திலும் நடைபெறும் வகையில் ஏற்பாடுகள் செய்யப்பட்டு வருகின்றன. 

இந்த நிலையில், அதிமுகவைச் சேர்ந்த வழக்கறிஞர் மணிகண்டன் சேலம் விமான நிலையத்திற்கு முன்னாள் முதல்வர் எடப்பாடி பழனிச்சாமியின் பெயரை வைக்க வேண்டும் என மத்திய விமான துறை அமைச்சருக்கு கடிதம் அனுப்பி உள்ளார். அதில், சேலம் விமான நிலையம் (16/10/2023) முதல் மீண்டும் செயல்பட உள்ளது. பெங்களூரில் இருந்து சேலத்திற்கு நாளை முதல் விமானம் வர உள்ளது. மத்திய அரசின் உடான் திட்டத்தின் கீழ் செயல்படுத்தப்பட்டு உள்ளது முதல் இந்திய கவர்னர் ஜெனரலாக இருந்த சேலத்திற்கு பெருமை சேர்த்த ராஜாஜி அவர்களுக்கு பின்பு சேலத்தில் சாதாரண கிராமத்தில் பிறந்து தமிழக முதலமைச்சராக உயர்ந்து தற்போது தமிழக சட்டமன்ற எதிர்க்கட்சி தலைவராக பணியாற்றி சேலத்திற்கு பெருமை சேர்த்த நல்லாட்சி நாயகர் எடப்பாடி பழனிசாமிக்கு பெருமை சேர்க்கும் விதமாக Dr.எடப்பாடி பழனிசாமி விமான நிலையம் என்ற பெயரை சேலம் விமான நிலையத்திற்கு சூட்ட வேண்டும் என்று மத்திய சிவில் விமானத்துறை அமைச்சர் மற்றும் துறை செயலாளருக்கு சேலம் மக்களின் சார்பாக வேண்டுகோள் வைத்துள்ளேன் என்று குறிப்பிட்டுள்ளார்.