Union Budget 2024: பட்ஜெட் 2024 - நிலையான வரி விலக்கு ரூ.1 லட்சமாக அதிகரிக்கிறதா? HRA-வின் பலனும் அதிகரிக்கும்?
Union Budget 2024: நிதியமைச்சர் நிர்மலா சீதாராமன் நடுத்தர மக்களின் எதிர்பார்ப்புகளை, பட்ஜெட் மூலம் நிறைவேற்றுவார் என எதிர்பார்க்கப்படுகிறது.
Union Budget 2024: நிதியமைச்சர் நிர்மலா சீதாராமன் தாக்கல் செய்த இடைக்கால பட்ஜெட், நடுத்தர மக்களுக்கு ஏமாற்றமாகவே அமைந்தது.
பட்ஜெட்டில் வரி விலக்கு:
2024-25 நிதியாண்டுக்கான பட்ஜெட் தாக்கல் செய்யப்படும் தேதி முடிவு செய்யப்பட்டுள்ளது. அதன்படி, பட்ஜெட் கூட்டதொடர் வரும் 22ம் தேதி தொடங்கும் நிலையில், நாட்டின் பொது பட்ஜெட்டை நிதியமைச்சர் நிர்மலா சீதாராமன் ஜூலை 23ஆம் தேதி தாக்கல் செய்கிறார். நாட்டின் சம்பளம் பெறும் வகுப்பினர் இந்த பட்ஜெட்டில் நிறைய எதிர்பார்ப்புகளை வைத்துள்ளனர். ஊதியம் பெறும் வகுப்பினருக்கு அரசு வரிவிலக்கு அளித்தால், அவர்களின் வாங்கும் திறன் அதிகரிக்கும் என்று வல்லுநர்கள் கருதுகின்றனர். இதன் காரணமாக, நுகர்வும் அதிகரிக்கும். அதன் காரணமாக அரசும் இதை தீவிரமாக பரிசீலித்து வருவதாக தகவல்கள் தெரிவிக்கின்றன. பட்ஜெட் தாக்கல் செய்வதற்கு முன் இது தொடர்பாக இறுதி முடிவு எடுக்கப்பட உள்ளது.
வரி விலக்கு உயர்வு:
நாட்டின் பொருளாதார முன்னேற்றம் வேகமாக இருந்தாலும், சம்பளம் பெறும் வகுப்பினரின் வருவாய் மிகவும் குறைவாகவே உள்ளது. இதனால், சம்பளத்தை நம்பி உள்ள நடுத்தர மக்கள் செலவு செய்வதை தவிர்த்து வருகின்றனர். இடைக்கால பட்ஜெட்டில் வருமான வரி போன்ற பெரிய விவகாரத்தில் முடிவெடுக்க விரும்பவில்லை என்று நிதியமைச்சர் சீதாராமன் முன்பு கூறியிருந்தார். இவ்வாறான நிலையில் இம்முறை சம்பளம் பெறும் வகுப்பினருக்கு நற்செய்தி கிடைக்கலாம் என்ற நம்பிக்கை அதிகமாக உள்ளது. இதனால், அதிகரித்து வரும் வாழ்க்கைச் செலவில் இருந்து தங்களுக்கு இம்முறை வரவு செலவுத் திட்டம் நிவாரணம் அளிக்கும் என நம்புகின்றனர்.
நிலையான விலக்கு மற்றும் வரி அடுக்குகளில் மாற்றங்கள்?
பட்ஜெட் தொடர்பாக வெளியாகியுள்ள தகவல்களின்படி, நிதி அமைச்சகம் புதிய வரி முறையின் கீழ் நிலையான விலக்குகளை அதிகரிக்கலாம். ரூ.50 ஆயிரத்தில் இருந்து ரூ.1 லட்சமாக உயர்த்தலாம். இது தவிர, வரி அடுக்குகளிலும் பெரிய மாற்றங்கள் எதிர்பார்க்கப்படுகின்றன. தற்போது 5 முதல் 30 சதவீதம் வரை உள்ளது. இதனுடன், NPS வரி முறையிலும் மாற்றங்கள் எதிர்பார்க்கப்படுகின்றன. கூடுதலாக, பழைய வரி விதிப்பு முறையின் கீழ் புதிய வரி அடுக்கிலும் அரசு மாற்றங்களைச் செய்யலாம்.
எச்.ஆர்.ஏ., அலவன்ஸில் மாற்றம்:
கோவிட் தொற்றுநோய்க்குப் பிறகு, நாடு முழுவதும் வீட்டு வாடகை மிக வேகமாக உயர்ந்துள்ளது. இதனால் நடுத்தர மக்களின் பட்ஜெட் கடுமையாக பாதிக்கப்பட்டுள்ளது. அத்தகைய சூழ்நிலையில், வீட்டு வாடகை கொடுப்பனவு (HRA) கழிப்பிலும் நிவாரணம் எதிர்பார்க்கப்படுகிறது. தற்போது ஒவ்வொரு நகரத்திற்கு ஏற்ப HRA விதம் மாறுபடுகிறது. இந்நிலையில், ஐதராபாத் மற்றும் பெங்களூரு உள்ளிட்ட பல பெரிய நகரங்களும் மெட்ரோ சிட்டியின் கீழ் கொண்டு வரப்படும் என்று எதிர்பார்க்கப்படுகிறது. இதனால் இந்த நகரங்களில் பணிபுரியும் மக்களும் டெல்லி மற்றும் மும்பைக்கு இணையாக HRA இன் பலன்களைப் பெற முடியும்.
தலைப்பு செய்திகள்
ட்ரெண்டிங் செய்திகள்
