India China Vs US: இந்தியா வரும் சீன வெளியுறவு அமைச்சர்; மாறும் ரூட் - அமெரிக்காவுக்கு ஆப்பு கன்பார்ம்

பிரதமர் மோடியின் சீன பயணத்திற்கு முன்பாக, அந்நாட்டு வெளியுறவு அமைச்சர் இந்தியா வருகை தர உள்ளதாக தகவல் வெளியாகியுள்ளது. இரு நாடுகளும் இணைந்து அமெரிக்காவிற்கு எதிராக ஒரு புதிய வியூகத்தை வகுக்குமா.?

இந்தியா வரும் சீன வெளியுறவு அமைச்சர் வாங் யி

Source : ANI

சீன வெளியுறவு அமைச்சர் வாங் யி அடுத்த வாரம், அதாவது, ஆகஸ்ட் 18-ம் தேதியன்று இந்தியா வருகை தந்து, தேசிய பாதுகாப்பு ஆலோசகர் அஜித் தோவலுடன் பேச்சுவார்த்தை நடத்த உள்ளதாக தகவல் வெளியாகியுள்ளது. ஷாங்காய் ஒத்துழைப்பு அமைப்பு உச்சிமாநாட்டிற்காக பிரதமர் நரேந்திர மோடி சீனாவுக்கு செல்வதற்கு முன்னதாக இந்த சந்திப்பு நடைபெறுகிறது. 5 ஆண்டுகளுக்கு முன்பு லடாக்கில் ஏற்பட்ட மோதல்களால், எல்லையில் ராணுவ பதற்றத்தை அதிகரித்த பிறகு அவரது முதல் பயணம் இது. இப்பயணம் எந்த அளவிற்கு முக்கியத்துவம் வாய்ந்தது.? பார்க்கலாம்.

அமெரிக்காவிற்கு எதிராக இந்தியா-சீனா இணையுமா.?

அமெரிக்க அதிபர் டொனால்ட் ட்ரம்ப், சீனா மற்றும் இந்தியாவிற்கு பெரும் வரிகளை விதித்துள்ள நியில், இந்த வருகை முக்கியத்துவம் பெறுகிறது. ட்ரம்ப் இந்தியாவின் மீது 50 சதவீத வரியை விதித்துள்ளார் - இதில் ரஷ்ய ஆயுதங்கள் மற்றும் எண்ணெய் வாங்குவதற்கு 25 சதவீத 'அபராதமும்' அடங்கும்.

டொனால்ட் டிரம்பின் வரித் தாக்குதல்களுக்குப் பிறகு, இந்தியா-சீனா உறவுகளில் இருந்த சுணக்கங்கள் சற்று தளர்ந்துவிட்டன. இந்த ஆண்டு தொடக்கத்தில் அமெரிக்காவும் சீனாவும் இறக்குமதி வரிகளை பரஸ்பரம் பரிமாறிக் கொண்டன, அமெரிக்கா, சீன இறக்குமதிகளுக்கு 145 சதவீத வரியையும், சீனா, அமெரிக்கப் பொருட்களுக்கு 125 சதவீத வரியையும் அறிவித்தன.

அமெரிக்காவிற்கு எதிராக ஒன்றிணைய அழைப்பு விடுத்த வாங் யி

மார்ச் மாதத்தில் - சீனா மீதான அமெரிக்க வரிகள் இன்னும் 20 சதவீதம் மட்டுமே இருந்தபோது, வாங் யி, இந்தியாவும் சீனாவும் இணைந்து செயல்படவும், "மேலாதிக்கத்தையும் அதிகார அரசியலையும் எதிர்ப்பதில் முன்னணியில் இருக்கவும்" அழைப்பு விடுத்தார்.

தேசிய மக்கள் காங்கிரஸ் கூட்டத்திற்குப் பிறகு பேசிய அவர், "டிராகன் மற்றும் யானை நடனமாடுவது மட்டுமே சரியான தேர்வு... ஒருவரையொருவர் சோர்வடையச் செய்வதற்குப் பதிலாக, ஆதரிப்பதும், பாதுகாப்பில் இருப்பதற்கு பதிலாக ஒத்துழைப்பை வலுப்படுத்துவதும் எங்கள் அடிப்படை நலன்களில் அடங்கும்" என்றார்.

2020 மோதல்களுக்குப் பிறகு லடாக்கின் டெப்சாங் மற்றும் டெம்சோக்கில் ராணுவப் பணிநீக்கம் செய்யப்பட்டதைக் குறிப்பிட்டு, கடந்த ஆண்டு இந்தியா-சீனா உறவில் "நேர்மறையான முன்னேற்றங்களை" அவர் சுட்டிக்காட்டினார். சில நாட்களுக்குப் பிறகு இந்தியா இந்த முயற்சியை ஒப்புக்கொண்டது

இந்த உறவுக்கு "மிகவும் கணிக்கக்கூடிய மற்றும் நேர்மறையான போக்கை" வகுக்க அரசாங்கம் செயல்பட்டு வருகிறது என்றும், அதற்கான நடவடிக்கைகளில் சீனாவின் கட்டுப்பாட்டில் உள்ள தளங்களுக்கு புனித யாத்திரைகளை மீண்டும் தொடங்குதல், நேரடி விமானங்கள் மற்றும் பத்திரிகையாளர்களை பரிமாறிக்கொள்வது ஆகியவை அடங்கும் என்றும் வெளியுறவு அமைச்சர் ஜெய்சங்கர் கூறியுள்ளார்.

மோடியை வரவேற்க காத்திருக்கும் சீனா

இதற்கிடையே, மோடியின் வருகையை சீனா வரவேற்றுள்ளது. இது இந்தியாவுடனான நெருக்கமான உறவுகளை நோக்கிய ஒரு நடவடிக்கையாகத் தெரிகிறது என்பதை காட்டுகிறது. ஆகஸ்ட் 31 மற்றும் செப்டம்பர் 1-ம் தேதிகளில் தியான்ஜினில் நடைபெறும் SCO உச்சி மாநாடு இதுவரை இல்லாத அளவுக்கு மிகப்பெரியதாக இருக்கும் என்று வெளியுறவு அமைச்சக செய்தித் தொடர்பாளர் குவோ ஜியாகுன் கூறியுள்ளார்.

உக்ரைனில் போரை முடிவுக்குக் கொண்டுவர, இந்தியாவுடன் இணைந்து பணியாற்றி வரும் ரஷ்ய அதிபர் புதினுடனும், சீன அதிபர் ஷி ஜின்பிங்குடனும் மோடி இருதரப்பு சந்திப்புகளை நடத்த வாய்ப்புள்ளதாக கூறப்படுகிறது.