Thanjavur : 1050 கிலோ ரேஷன் அரிசி... கள்ளச்சந்தையில் விற்க வைத்திருந்தவர் கைது

தஞ்சையில் 1050 கிலோ ரேஷன் அரிசியை பதுக்கி வைத்திருந்தவர் கைது செய்யப்பட்டார். மேலும் ஒருவரை போலீசார்  தேடி வருகின்றனர்.

தஞ்சையில் கடத்தல் ரேஷன் அரிசி பறிமுதல்

Source : Abpnadu Original

தஞ்சாவூர்: தஞ்சையில் 1050 கிலோ ரேஷன் அரிசியை பதுக்கி வைத்திருந்தவர் கைது செய்யப்பட்டார். மேலும் ஒருவரை போலீசார்  தேடி வருகின்றனர்.

ரேஷன் பொருட்கள் வினியோகம் கண்காணிப்பு

தமிழக அரசு ரேஷன் கடைகளில் மக்களுக்கு தேவையான அத்தியாவசிய பொருட்களை விநியோகிக்க நகர்ப்புறங்களிலும், கிராமப்புறங்களிலும் முறையான ஏற்பாடுகளை செய்துள்ள நிலையில் நியோகத்தை கண்காணிக்கவும் பலதுறை அலுவலர்களை நியமித்துள்ளது. ரேஷன் கடைகளில் வினியோகத்தை கண்காணிக்க வழங்கல் துறை, கூட்டுறவுத்துறை அலுவலர்களுக்கு அதிகாரம் அளிக்கப்பட்டுள்ளது.

இதுதவிர ரேஷன் அரிசி கடத்தலை தடுப்பதற்காக தனியாக உணவுப்பொருள் கடத்தல் தடுப்பு பிரிவு ஏ.டி.ஜி.பி. தலைமையில் மாநில அளவில் செயல்பட்டு வருகிறது. ஒவ்வொரு மாவட்டத்திற்கும் துணை போலீஸ் சூப்பிரண்டு தலைமையில் இன்ஸ்பெக்டர், சப்-இன்ஸ்பெக்டர் மற்றும் போலீசார் பணியமர்த்தப்பட்டுள்ளனர். அதிலும்  இம்மாதம் முதல் உணவு பொருள் கடத்தல் பிரிவுக்கு என ஒவ்வொரு மாவட்டத்திற்கும் நுண்ணறிவு பிரிவு அலுவலர்களும் நியமிக்கப்பட்டுள்ளனர்.

எத்தனை நடவடிக்கை எடுத்தாலும் தொடர்கிறது

மாவட்டத்தில் ரேஷன் விநியோக முறைகேடுகளை தடுக்க மாவட்ட நிர்வாகம் என்ன நடவடிக்கை எடுத்தாலும் ரேஷன் அரிசி வினியோக மையங்களிலிருந்து கடத்தப்படுவது தொடர்கிறது. கண்காணிப்பு அதிகாரிகள் தரப்பில் பொதுமக்களிடமிருந்து தான் ரேஷன் அரிசி சேகரிக்கப்பட்டு கடத்தப்படுவதாக கூறப்பட்டாலும் மொத்தமாக விநியோக மையங்களில் இருந்து கடத்தப்படுவது தான் அதிக அளவில் ரேஷன் அரிசி கடத்தலுக்கு வழிவகுக்கிறது என சமூக ஆர்வலர்கள் தெரிவிக்கும் நிலை உள்ளது.

மாவட்டத்தில் நாள் தவறினாலும் ரேஷன் அரிசி கடத்தல் தவறுவதில்லை. அதிகாரிகள் தரப்பிலும், போலீஸ் தரப்பிலும் ரேஷன் அரிசி கடத்தலை தடுக்க கடுமையான நடவடிக்கை எடுப்பதாக கூறப்பட்டு வந்தாலும் நடைமுறையில் ரேஷன் அரிசி கடத்தல் என்பது குறைவதாக தெரியவில்லை.

தஞ்சையில் ரேஷன் அரிசி கடத்தல் சோதனை

இந்நிலையில் தஞ்சை கரந்தை, பள்ளி அக்ரஹாரம் உள்ளிட்ட பகுதிகளில் ரேஷன் அரிசி கடத்தப்படுவதாக தஞ்சை குடிமைப்பொருள் வழங்கல் குற்ற புலனாய்வு பிரிவு போலீசாருக்கு தகவல் கிடைத்தது. அதன் பேரில் துணை போலீஸ் சூப்பிரண்டு நித்யா மேற்பார்வையில் இன்ஸ்பெக்டர் முருகானந்தம், சப் இன்ஸ்பெக்டர் செல்வகுமார் மற்றும் போலீசார் அந்த பகுதியில் தீவிர கண்காணிப்பு பணியில் ஈடுபட்டனர்.

பைக்கில் ரேஷன் அரிசி மூட்டையுடன் வந்தவர் சிக்கினார்

அப்போது தஞ்சை கீழவாசலில் போலீசார் வாகன சோதனை நடத்திய போது அந்த வழியாக மூட்டைகளுடன் பைக்கில் வந்த ஒருவரை நிறுத்தி சோதனை செய்த போது அவர் ரேஷன் அரிசி கடத்தி வந்தது தெரிய வந்தது. அவர் கரந்தை, பள்ளியக்ரஹாரம் உள்ளிட்ட பகுதிகளில் குறைந்த விலைக்கு ரேஷன் அரிசியை வாங்கி கள்ளச் சந்தையில் விற்பதற்காக கொண்டு சென்றது தெரிய வந்தது.

மேலும் அவர் கொடுத்த தகவலின் பேரில் கீழவாசல் எஸ்.டி.எம் நகரில் ஒரு இடத்தில் பதுக்கி வைத்திருந்த அரிசியையும் பறிமுதல் செய்தனர். மொத்தம் 1,050 கிலோ ரேஷன் அரிசி பறிமுதல் செய்யப்பட்டது. மேலும் இது தொடர்பாக தஞ்சை கீழவாசல் பகுதி டவுன் கரம்பை வள்ளுவர் தெருவை சேர்ந்த சிவலிங்கம் மகன் ஹரிஹரன் (24) என்பவரை கைது செய்தனர். பின்னர் அவரை கோர்ட்டில் ஆஜர்படுத்தி சிறையில் அடைத்தனர். மேலும் ஒருவரை போலீசார் தேடி வருகின்றனர். கைது செய்யப்பட்டவரிடம் இருந்து பைக்கையும் போலீசார் பறிமுதல் செய்தனர்.