மயிலாடுதுறை : 198 புதிய மாணவர்களை சேர்க்கை: பள்ளிக்கு பள்ளிக்கல்வித்துறை அதிகாரிகள் பாராட்டு!

காவிரிபூம்பட்டினம் ஊராட்சி ஒன்றிய நடுநிலை பள்ளியில் 198 புதிய மாணவர்களை சேர்ந்து சாதனை படைத்துள்ளது. 

பள்ளி பாராட்டு விழா

மயிலாடுதுறை மாவட்டம் சீர்காழி அருகே காவிரிபூம்பட்டினத்தில் ஊராட்சி ஒன்றிய நடுநிலைப் பள்ளி இயங்கி வருகிறது. சிறந்த பள்ளி விருதுபெற்ற இப்பள்ளியில் அனைத்து வகுப்புகளும் ஸ்மார்ட் வகுப்புகளாக இயங்கி வருவது கூடுதல் சிறப்பாகும். தனியார் பள்ளிக்கு நிகராக, வாகன வசதி முதல் கராத்தே, யோகா, கணிணி பயிற்சி, சிலம்பம் உள்ளிட்ட அனைத்து தனித்திறன் பயிற்ச்சிகளும் இலவசமாக இப்பள்ளி வழங்கப்பட்டு வருகிறது. 

மேலும் இப்பள்ளிக்கு வேண்டிய அனைத்து வசதிகளையும், மேலாண்மை குழு மற்றும் பூம்புகார் மீனவர் பஞ்சாயத்தார் இணைந்து பள்ளிக்கு தேவையான வசதிகளை ஏற்படுத்தி வருகின்றனர். இதனால் தனியார் பள்ளியில் பயின்ற மணவர்கள் பலர் இப்பள்ளியில் வந்து சேர்ந்து வருகின்றனர். சிறந்த பள்ளிக்கான விருதை பெற்ற சிறப்பாக இயங்கும் இப்பள்ளியில் இந்த ஆண்டு 198 மாணவர்கள் புதிதாக சேர்ந்து சாதனை படைத்துள்ளனர்.

இதனை அடுத்து எட்டாம் வகுப்புவரை மட்டும் செயல்படும் இந்த பள்ளியில் பெரும் அளவு புதிய மாணவர்களை சேர்த்த பள்ளி ஆசிரியர்கள், பள்ளி மேலாண்மை குழு மற்றும் பெற்றோரை கல்வித்துறை அதிகாரிகள் பாராட்டு தெரிவித்து வாழ்த்தினர். இதற்காக  பள்ளி வளாகத்தில் நடைபெற்ற விழாவில் மாவட்ட முதன்மை கல்வி அலுவலர் மதிவாணன் மற்றும் வட்டார கல்வி அலுவலர் பூவராகவன் ஆகியோர் நேரில் பாராட்டு தெரிவித்ததுடன் பள்ளிக்கு தேவையான கூடுதல் வசதிகள் குறித்தும் கேட்டறிந்தனர். அப்போது தங்கள் ஊர் பள்ளியிலேயே ஆங்கில வழிக்கல்வி வழங்க அனுமதிக்கவேண்டும் என அப்பகுதி மக்கள் அதிகாரிகளிடம் கோரிக்கை விடுத்தனர்.

இன்றைய தலைமுறைப் பெற்றோர்கள், தங்கள் குழந்தைகளை தனியார் பள்ளிகளில் சேர்ப்பதில்தான் அதிக ஆர்வம் காட்டுகிறார்கள். நகர்ப்புறங்களில் மட்டுமல்ல, கிராமப்புறங்களிலும் கூட இன்றைக்கு இதுதான் நிலை. இதனால் தமிழ்நாட்டில் மூடப்பட்ட அரசுப் பள்ளிகள் ஏராளம். இந்நிலையில்தான் சில அரசுப் பள்ளிகளின் ஆசிரியர்கள், சமூக நலனில் அக்கறை கொண்டவர்கள், மாணவர்களின் எண்ணிக்கையை அதிகரிக்க, உயரிய முயற்சிகளில் ஈடுபட்டு வருகிறனர். தனியார் பள்ளியில் படித்தால்தான் தங்கள் குழந்தைகள் எதிர்காலத்தில் சமூகத்தில் உயர்ந்த இடத்தைப் பிடிக்க முடியும் என்ற எண்ணம் பெற்றோர்களிடம் நிலவுகிறது. ஆனால் உண்மை இதுவல்ல. பெரிய விஞ்ஞானிகளாக, அரசியல் தலைவர்களாக, மருத்துவர்களாக, ஐ.ஏ.எஸ்., ஐ.பி.எஸ் அதிகாரிகளாக வெற்றிநடைபோடுபவர்களில் பெரும்பாலானோர், கிராமப்புற அரசுப் பள்ளிகளில் பயின்றவர்கள்தாம். அரசுப் பள்ளியில் படித்தாலும் சாதிக்க முடியும். மாணவர்களின் எண்ணிக்கை குறைந்து அரசுப் பள்ளிகள் மூடப்பட்டால், அது எதிர்காலத்தில் மோசமான விளைவுகளை ஏற்படுத்தும்.

அரசுப் பள்ளிகளை உயிர்ப்புடன் வைத்துக்கொள்வது மிகவும் அவசியமானது. அதனை உணர்ந்து மயிலாடுதுறை மாவட்டம் காவேரி பூம்பட்டினம் அரசு ஊராட்சி ஒன்றிய நடுநிலைப்பள்ளியில் ஆசிரியர்கள் தங்கள் முயற்சியால் இந்தாண்டு 198 மாணவர்களை பள்ளியில் சேர்க்க சாதனை படைத்துள்ளனர்.  இதனை சுற்றுவட்டார பகுதிகளை சேர்ந்த பலரும் வெகுவாக பாராட்டி வருகின்றனர்