Puducherry State: மாநிலமாக மாறப்போகிறதா புதுச்சேரி.. ஒப்புதல் அளித்த துணைநிலை ஆளுநர் தமிழிசை சௌந்தராஜன்..

புதுச்சேரிக்கு மாநில அந்தஸ்து வழங்க வேண்டிய தீர்மானத்திற்கு துணைநிலை ஆளுநர் தமிழிசை சௌந்தராஜன் ஒப்புதல் அளித்துள்ளார்.

கோப்பு புகைப்படம்

புதுச்சேரிக்கு மாநில அந்தஸ்து வழங்க வேண்டி, மத்திய அரசை வலியுறுத்துவதற்காக பேரவையில் நிறைவேற்றிய தீர்மானம் தொடர்பான கோப்பிற்கு துணைநிலை ஆளுநர் தமிழிசை சௌந்தராஜன்  உடனடியாக ஒப்புதல் அளித்துள்ளதாக தெரிவிக்கப்பட்டுள்ளது. இதனை ஆளுநர் மாளிகை தரப்பில் உறுதி செய்யப்பட்டுள்ளது. புதுச்சேரி சட்டப்பேரவையில் கடந்த மார்ச் மாதம் நிறைவேற்றப்பட்ட தீர்மானம் தொடர்பான கோப்பு, 4 மாதம் தாமதமாக ஜூலை 22 ஆம் தேதி அன்று ஆளுநர் மாளிகைக்கு வந்தது என்றும் தெரிவிக்கப்பட்டுள்ளது.

புதுச்சேரிக்கு மாநில அந்தஸ்து பெற வேண்டும் என்ற கோரிக்கை அனைத்துக் கட்சிகளாலும் முன்னெடுக்கப்பட்டு வருகின்றது. இது நீண்ட காலமாக நிலுவையில் உள்ளது. இந்த நிலையில் நடைபெற்று முடிந்த சட்டமன்ற கூட்டத் தொடரில் புதுச்சேரிக்கு, மத்திய அரசு  மாநில அந்தஸ்து வழங்க வேண்டும் என்று முதல்வர் ரங்கசாமி கொண்டு வந்த அரசு தீர்மானத்தை ஏக மனதாக நிறைவேற்றி அனுப்பப்பட்டும், துணைநிலை ஆளுநர் அதற்கு இதுவரை ஒப்புதல் அளிக்கப்படவில்லை என அரசியல் கட்சிகள் மற்றும் பல்வேறு அமைப்புகள் தொடர்ந்து புகார் கூறிவந்தது.

இந்த நிலையில் இது குறித்து ஆளுநர் மாளிகை விளக்கம் தந்துள்ளது. இது தொடர்பாக வெளியிடப்பட்ட செய்திக்குறிப்பில், புதுச்சேரி சட்டப்பேரவையில் ஒருமனதாக கொண்டு வரப்பட்ட மாநில தகுதிக்கான தீர்மானத்தை துணைநிலை ஆளுநர் 3 மாத காலம் கிடப்பில் போட்டதாக சொல்லப்படுகிறது. ஆனால் புதுச்சேரி சட்டப்பேரவையில் கடந்த மார்ச் மாதம் நிறைவேற்றப்பட்ட தீர்மானம் தொடர்பான கோப்பு கடந்த ஜூலை 22 ஆம் தேதி சனிக்கிழமை அன்று துணைநிலை ஆளுநர் மாளிகைக்கு வந்தது. விடுமுறை நாளான சனிக்கிழமையில் கோப்பு பெறப்பட்ட நிலையில் மறுநாள் ஞாயிற்றுக்கிழமை 23ஆம் தேதி அன்றே துணைநிலை ஆளுநர் தமிழிசை சௌந்தர்ராஜன் அதற்கு ஒப்புதல் வழங்கி உள்ளார் என்று  தெரிவிக்கப்பட்டுள்ளது.

இதுவரை யூனியன் பிரதேசமாக இருந்த புதுச்சேரிக்கு, மாநில அந்தஸ்து வழங்க வேண்டும் என கோரிக்கை நீண்ட நாட்களாக இருந்து வரும் நிலையில் அதற்கான ஒப்புதலை துணைநிலை ஆளுநர் அளித்துள்ளார். இந்த கோப்புகள் அடுத்தப்படியாக மித்திய உள்துறை அமைச்சகத்திற்கு அனுப்பி வைக்கப்படும். அதன்பின் உள்துறை அமைச்சகத்தின் ஒப்புதலின்படி, இந்த தீர்மானம் குடியரசு தலைவர் திரௌபதி முர்முவிற்கு அனுப்பி வைக்கப்படும். புதுச்சேரிக்கு மாநில அந்தஸ்து என்ற தீர்மானத்திற்கு குடியரசு தலைவர் ஒப்புதல் அளித்தால் மட்டுமே மாநில அந்தஸ்து வழங்கப்படும் என்பது குறிப்பிடத்தக்கது.