Vijay TVK Salem school | அரசுப் பள்ளிக்குள் கட்சிக்கொடி! சிக்கலில் தவெக நிர்வாகிகள்

சேலத்தில் தமிழக வெற்றிக் கழக நிர்வாகிகள் அரசுப் பள்ளியில் வைத்து கொடியை காமாணவர்களுக்கு இனிப்புகளை வழங்கிய சம்பவம் சர்ச்சையை கிளப்பியுள்ளது. 

தமிழக வெற்றிக் கழகத்தின் கொடியை அக்கட்சியின் தலைவர் விஜய் இன்று அறிமுகம் செய்தார். 2026 சட்டப்பேரவை தேர்தலை குறிவைத்து அடுத்தகட்ட நடவடிக்கைகளில் களமிறங்கியுள்ளார் விஜய். இன்று கட்சிக் கொடி அறிமுகம் செய்யப்பட்டதில் இருந்து தமிழ்நாடு முழுவதும் கட்சி நிர்வாகிகளும், ரசிகர்களும் கொடியுடன் சென்று பட்டாசுகள் வெடித்தும் இனிப்புகள் வழங்கியும் கொண்டாடி வருகின்றனர்.

அதேபோல சேலம் மாவட்டம் ஓமலூர் சட்டமன்ற தொகுதிக்கு உட்பட்ட பகுதிகளில் தமிழக வெற்றி கழக நிர்வாகிகள், கட்சியின் கொடியை கையில் எந்தியபடி பல்வேறு இடங்களுக்கும் சென்று இனிப்புகள் வழங்கியும், வேட்டி சேலைகள் வழங்கியும் கொண்டாடினர். மேலும், தமிழக வெற்றி கழகத்தின் ஓமலூர் சட்டமன்றத் தொகுதி பொறுப்பாளர் பெருமாள் தலைமையில், காடையாம்பட்டி தாலுகா ராக்கிபட்டி அரசு தொடக்கப்பள்ளி மற்றும் அங்கன்வாடி மையத்திற்குள், கட்சி கொடியுடன் உள்ளே புகுந்து, கொடியை போர்டு பகுதியில் பிடித்து கொண்டு மாணவர்களுக்கு இனிப்புகள் வழங்கினர். 

அரசியல் கட்சியின் கொடி அறிமுகம் செய்ததை, அரசு பள்ளியில் வைத்து கொண்டாடிய சம்பவம் சர்ச்சையை ஏற்படுத்தியுள்ளது. இதுகுறித்து பள்ளி கல்வித்துறை அதிகாரிகள் விசாரணை நடத்தி வருகின்றனர். சம்பந்தப்பட்ட நபர்கள் மீது நடவடிக்கை எடுக்க வேண்டும் என சமூக வலைதளங்களில் கண்டனக் குரல் எழுந்து வருகிறது.