Ruturaj Gaikwad: மஞ்சள் படையின் கேப்டன், ருத்ராஜ் கெய்க்வாட்டின் பிறந்தநாள் - ஐபிஎல் போட்டியில் டாப் 5 சம்பவங்கள்
Ruturaj Gaikwad: இந்திய கிரிக்கெட் வீரரும், சென்னை சூப்பர் கிங்ஸ் அணியின் கேப்டனுமான ருத்ராஜ் கெய்க்வாட், இன்று தனது 28வது பிறந்தநாளை கொண்டாடுகிறார்.
Ruturaj Gaikwad: சென்னை சூப்பர் கிங்ஸ் அணியின் கேப்டன் ருத்ராஜ் கெய்க்வாட், ஐபிஎல் தொடரில் அபாரமாக செயல்பட்ட 5 நிகழ்வுகளை இந்த தொகுப்பில் அறியலாம்.
ருத்ராஜ் கெய்க்வாட் பிறந்தநாள்:
இந்திய அணியின் எதிர்கால நம்பிக்கை நட்சத்திரம் என்ற நிலையில் இருந்து, சென்னை சூப்பர் கிங்ஸை வழிநடத்தும் கேப்டனாக, ருத்ராஜ் கெய்க்வாட் தனது கிரிக்கெட் வாழ்க்கையில் பெரும் ஏற்றம் கண்டுள்ளார். கெய்க்வாட் இதுவரை ஆறு ஒருநாள் மற்றும் 23 டி20 போட்டிகளில் இந்தியாவிற்காக களமிறங்கியுள்ளார். கெய்க்வாட் ஜூலை 2021 இல் இலங்கைக்கு எதிரான T20I போட்டியில் சர்வதேச அரங்கில் அறிமுகமானார். அவர் அக்டோபர் 2022 இல் தென்னாப்பிரிக்காவிற்கு எதிராக முதல் முறையாக ஒருநாள் போட்டிகளில் விளையாடினார்.
இந்தியன் பிரீமியர் லீக்கில் (ஐபிஎல்) ஏற்கனவே 66 போட்டிகளில் விளையாடியுள்ளார். ஐபிஎல் 2024 சீசனுக்கு முன்னதாக, சென்னை சூப்பர் கிங்ஸ் அணியின் கேப்டன் பொறுப்பில் இருந்து தோனி விலகி, தலைமைப் பொறுப்பை கெய்க்வாட்டிடம் ஒப்படைத்தார். அவர் ஐபிஎல் 2021 இல் நல்ல ஃபார்மில் இருந்து, சென்னை அணி கோப்பையை வெல்லவும் முக்கிய பங்களித்தார். ருத்ராஜ் கெய்க்வாட் இன்று (ஜனவரி 31) தனது 28வது பிறந்தநாளைக் கொண்டாடும் வேளையில், சென்னை சூப்பர் கிங்ஸ் அணிக்காக ஐபிஎல் தொடரில் அவரது செயல்பாடு எப்படி இருக்கிறது என்பதை இந்த தொகுப்பில் அறியலாம்.
கெய்க்வாட்டின் புள்ளி விவரங்கள்:
ஆறு ஒருநாள் போட்டிகளில், ருதுராஜ் கெய்க்வாட் இதுவரை 73.24 ஸ்ட்ரைக் ரேட்டில் 115 ரன்கள் எடுத்துள்ளார். ஒருநாள் போட்டிகளில் ஒரு அரை சதம் அடித்துள்ளார். டி20 போட்டிகளில், கெய்க்வாட் 633 ரன்கள் எடுத்துள்ளார். ஒரு சதம் மற்றும் நான்கு அரை சதங்களுடன், 143.53 ஸ்ட்ரைக் ரேட்டை பதிவு செய்துள்ளார். ஐபிஎல் தொடரில் கெய்க்வாட் 41.75 சராசரியில் 2380 ரன்கள் எடுத்துள்ளார். ஐபிஎல்லில் அவரது ஸ்ட்ரைக் ரேட் 136.86 ஆக உள்ளது. ஐபிஎல் தொடரில் இரண்டு சதங்கள் மற்றும் 18 அரை சதங்கள் அடித்துள்ளார்.
சென்னை அணிக்காக கெய்க்வாட்டின் தரமான சம்பவங்கள்:
- லக்னோவிற்கு எதிராக 108 ரன்கள், 2024: ருதுராஜ் கெய்க்வாட் தனது அதிகபட்ச ஸ்கோரான 108 ரன்களை கடந்த சீசனில் பதிவு செய்தார். லக்னோவிற்கு எதிராக 60 பந்துகளில் 108 (நாட் அவுட்) ரன்கள் எடுத்தார். இதில் 12 பவுண்டரிகள் மற்றும் மூன்று சிக்சர்கள் அடங்கும். இருப்பினும், சென்னை சூப்பர் கிங்ஸ் அணி அந்த போட்டியில் ஆறு விக்கெட் வித்தியாசத்தில் தோல்வியடைந்ததால் அவரது திறமை வீணானது.
- 101 நாட் அவுட் vs ராஜஸ்தான், 2021: ருதுராஜ் கெய்க்வாட் 2021ல் ஐபிஎல்லில் தனது முதல் சதத்தை அடித்தார். ஐபிஎல் 2021ல் ராஜஸ்தான் ராயல்ஸுக்கு எதிராக கெய்க்வாட் 60 பந்துகளில் 101 ரன்களை விளாசி இறுதிவரை ஆட்டமிழக்காமல் இருந்தார். அதில் ஒன்பது பவுண்டரிகள் மற்றும் ஐந்து சிக்சர்களை விளாசினார். இருப்பினும், அந்த போட்டியில் சென்னை சூப்பர் கிங்ஸ் ஏழு விக்கெட் வித்தியாசத்தில் தோல்வி கண்டது.
- 99 vs SRH, 2022: ஐபிஎல் 2022 இல், சன்ரைசர்ஸ் ஐதராபாத் அணிக்கு எதிராக ஒரு ரன் வித்தியாசத்தில் ருதுராஜ் கெய்க்வாட் தனது சதத்தை தவறவிட்டார். அந்த போட்டியில் அவர் 57 பந்துகளில் 99 ரன்கள் எடுத்திருந்தார். இந்தப் போட்டியில் சென்னை சூப்பர் கிங்ஸ் அணி 13 ரன்கள் வித்தியாசத்தில் வெற்றி பெற்றது.
- 92 vs GT, 2023: ஐபிஎல் 2023ல் குஜராத் டைட்டன்ஸ் அணிக்கு எதிரான ஆட்டத்தில் ருதுராஜ் கெய்க்வாட் தனது அபாரமான பேட்டிங்கை மீண்டும் ஒருமுறை வெளிப்படுத்தினார். அந்த ஆட்டத்தில் கெய்க்வாட் 50 பந்துகளில் 92 ரன்கள் எடுத்தார். அந்த போட்டியில் குஜராத் டைட்டன்ஸ் ஐந்து விக்கெட் வித்தியாசத்தில் வெற்றி பெற்றது.
- 72 vs KKR, 2020: ஐபிஎல் 2020 இல், கொல்கத்தா அணிக்கு எதிராக ருதுராஜ் கெய்க்வாட் 53 பந்துகளில் 72 ரன்களை விளாசினார். கெய்க்வாட்டின் பவர் பேக் பேட்டிங்கால் சென்னை சூப்பர் கிங்ஸ் 173 ரன்கள் இலக்கை வெற்றிகரமாக துரத்தி 6 விக்கெட் வித்தியாசத்தில் வெற்றி பெற்றது
தலைப்பு செய்திகள்
ட்ரெண்டிங் செய்திகள்
