கணவர் இறுதி சடங்கில் வந்த பிரசவ வலி; 10 ஆண்டுக்கு பின் பிறந்த குழந்தை - விழுப்புரம் அருகே சோகம்

விழுப்புரம் : கணவரின் உடல் அடக்கம் செய்த நாளில் மனைவிக்கு பத்தாண்டு காலம் கழித்து மகன் பிறந்த சம்பவம் சோகத்தை ஏற்படுத்தியுள்ளது.

கணவன் இறுதி நாளில் பிறந்த குழந்தை

விழுப்புரம்: விழுப்புரம் அருகே உள்ள அகரம் கிராமத்தை சேர்ந்த சரவணன் என்பவர் மகன் சாரதி (வயது 28). இவர் கடந்த 23ஆம் தேதி கெங்கராம்பாளையத்தில் உள்ள விவசாய நிலத்தில் மோட்டார் கொட்டகை கட்டுவதற்காக சென்ட்ரிங் வேலையில் ஈடுபட்டிருந்தார். அப்போது நீளமான இரும்பு கம்பியை தூக்கியபோது மேலே சென்ற உயர் மின்னழுத்த கம்பியில் பட்டு உரசியதில் சாரதி மீது மின்சாரம் தாக்கியது.

இதில் பலத்த காயம் அடைந்த அவரை முண்டியம்பாக்கத்தில் உள்ள விழுப்புரம் அரசு மருத்துவக் கல்லூரி மருத்துவமனையில் சிகிச்சைக்காக அனுமதித்தனர். இந்த நிலையில் மேல் சிகிச்சைக்காக சென்னை அரசு மருத்துவமனையில் அனுமதித்த நிலையில் அவருக்கு மருத்துவர்கள் தீவிர சிகிச்சை அளித்தும் நேற்று முன் தினம் சிகிச்சை பலனின்றி உயிரிழந்தார்.

இந்த நிலையில் சாரதிக்கு கடந்த 10 ஆண்டுகளுக்கு முன்பு திருமணம் நடைபெற்றுள்ளது. இதுவரை அவருக்கு குழந்தை இல்லாத நிலையில் தற்போது அவரது மனைவி நிறைமாத கர்ப்பிணியாக இருந்தார். இந்த சூழலில் எதிர்பாராத விதமாக மின்சாரம் தாக்கி உயிரிழந்த சாரதியின் உடல் அவரது சொந்த ஊருக்கு கொண்டு செல்லப்பட்டு நேற்று அடக்கம் செய்யப்பட்டது. இறுதி சடங்கின் போது பிரசவ வலி ஏற்பட்டு அவரது மனைவி சத்தியபிரியாவிற்க்கு ஆண் குழந்தை பிறந்துள்ளது. இச்சம்பவம் அப்பகுதியில் பெரும் சோகத்தை ஏற்படுத்தியுள்ளது.