உக்ரைனுக்கு எதிராக ரகசிய வாக்கெடுப்பு கோரிய ரஷ்யா… எதிர்ப்பு தெரிவித்த இந்தியா! நிராகரித்த ஐ.நா.

இந்த தீர்மானதால் தற்போது உக்ரேனில் இருந்தும், போரினால் பாதிக்கப்பட்ட நாட்டின் சர்வதேச அளவில் அங்கீகரிக்கப்பட்ட எல்லைகளிலிருந்தும் ரஷ்யா தனது படைகளை திரும்பப் பெற வேண்டும்.

ஐ.நா பொதுச்சபையில் இந்தியா

உக்ரைனின் நான்கு பகுதிகளை ரஷ்யா "சட்டவிரோதமாக" இணைத்ததைக் கண்டிக்கும் வரைவுத் தீர்மானத்தின் மீது, ஐ.நா பொதுச் சபையில் இரகசிய வாக்கெடுப்பு நடத்த வேண்டும் என்ற ரஷ்யாவின் கோரிக்கையை நிராகரிக்க இந்தியா வாக்களித்தது. மேலும் நூற்றுக்கும் மேற்பட்ட நாடுகளும் ரஷ்யாவிற்கு எதிராக வாக்களித்துள்ளனர். 

107 நாடுகள் எதிர்த்து வாக்களிப்பு

193 உறுப்பினர்களைக் கொண்ட ஐ.நா பொதுச் சபையில் நேற்று நேற்று இந்த வாக்கெடுப்பு நடைபெற்றது. இதன் மூலம் ரஷ்யா சட்டவிரோதமாக இணைக்க முயற்சிக்கும் டொனெட்ஸ்க், கெர்சன், லுஹான்ஸ்க் மற்றும் ஜபோரிஜியா பகுதிகளை கண்டிக்கும் தீர்மானத்தின் மீது நடவடிக்கை எடுக்கப்பட்டது. இந்த தீர்மானத்தை ரகசிய வாக்கெடுப்பு மூலம் வாக்களிக்க வேண்டும் என்று ரஷ்யா கோரிக்கை விடுத்திருந்தது. பதிவு செய்யப்பட்ட வாக்கெடுப்புதான் எடுக்கவேண்டும் என்று இந்தியா உட்பட 107 ஐநா உறுப்பு நாடுகள் வாக்களித்ததை அடுத்து, மாஸ்கோவின் ரகசிய வாக்கெடுப்பு கோரிக்கை நிராகரிக்கப்பட்டது. ரஷ்யாவின் இரகசிய வாக்கெடுப்புக்கு ஆதரவாக 13 நாடுகள் மட்டுமே வாக்களித்தன, 39 நாடுகள் வாக்களிக்கவில்லை. ரஷ்யாவும் சீனாவும் வாக்களிக்காத நாடுகளில் அடங்கும். பதிவு செய்யப்பட்ட வாக்கெடுப்பு நடத்துவதற்கான பிரேரணை ஏற்றுக்கொள்ளப்பட்ட பின்னர், பொதுச் சபையின் தலைவரின் தீர்ப்பை எதிர்த்து ரஷ்யா மேல்முறையீடு செய்தது. ரஷ்யாவின் மேல் முறையீட்டின் மீது பதிவு செய்யப்பட்ட வாக்கெடுப்பு நடத்தப்பட்டது.

ஆக்கிரமிப்புக்கு எதிராக வாக்களிப்பு

அல்பேனியா சமர்ப்பித்த பிரேரணையை பதிவு செய்யப்பட்ட வாக்கெடுப்புக்கு ஏற்றுக்கொள்வதற்கான முடிவை மறுபரிசீலனை செய்ய ரஷ்யா கோரியது. இந்தியா உட்பட 104 நாடுகள் அத்தகைய மறுபரிசீலனைக்கு எதிராக வாக்களித்த பின்னர், 16 நாடுகள் ஆதரவாக வாக்களித்தன. அதன் பின்னர் பிரேரணையை மறுபரிசீலனை செய்ய வேண்டாம் என்று பொதுச் சபை முடிவு செய்தது. கிரெம்ளினில் நடந்த விழாவில் ரஷ்ய அதிபர் விளாடிமிர் புடின் உக்ரைன் பகுதிகளான லுஹான்ஸ்க், டொனெட்ஸ்க், கெர்சன் ஆகிய பகுதிகளை இணைப்பதற்கான ஒப்பந்தங்களில் கையெழுத்திட்ட சில மணி நேரங்களுக்குப் பிறகு, 15 நாடுகளைக் கொண்ட ஐ.நா. சபை இதனை செய்தது.

தீர்மானத்திற்கு பிறகு நடப்பவை

உக்ரேனில் இருந்தும், போரினால் பாதிக்கப்பட்ட நாட்டின் சர்வதேச அளவில் அங்கீகரிக்கப்பட்ட எல்லைகளிலிருந்தும் ரஷ்யா தனது படைகளை திரும்பப் பெற வேண்டும் மற்றும் உக்ரேனுக்கு எதிரான அதன் போரை நிறுத்த வேண்டும் என்ற கோரிக்கையை வரைவுத் தீர்மானம் மீண்டும் வலியுறுத்தும். உக்ரைனின் டோனெட்ஸ்க், கெர்சன், லுஹான்ஸ்க் அல்லது சபோரிஜியா பகுதிகளின் நிலைகளில் ரஷ்யாவின் எந்த மாற்றத்தையும் அங்கீகரிக்க வேண்டாம் என்றும், எந்த நடவடிக்கையிலிருந்தும் விலகி இருக்குமாறும் அனைத்து மாநிலங்கள், சர்வதேச அமைப்புகள் மற்றும் ஐக்கிய நாடுகளின் சிறப்பு முகமைகளுக்கு இந்த தீர்மானம் அழைப்பு விடுக்கும். 

இந்தியாவின் நிலைப்பாடு

புதுதில்லியில், வெளியுறவு அமைச்சக செய்தித் தொடர்பாளர் அரிந்தம் பாக்சி கூறுகையில், விரோதப் போக்கை அதிகரிப்பது யாருக்கும் நல்லதில்லை, மேலும் நிலைமையை சீராக்கும் நோக்கில் இதுபோன்ற அனைத்து முயற்சிகளையும் ஆதரிக்க இந்தியா தயாராக இருப்பதாகக் குறிப்பிட்டார். "உக்ரைனில் உள்கட்டமைப்பு மற்றும் பொதுமக்களின் மரணம் உள்ளிட்ட மோதல்கள் தீவிரமடைந்து வருவதில் இந்தியா ஆழ்ந்த கவலை கொண்டுள்ளது," என்று அவர் கூறினார், போர்களை உடனடியாக நிறுத்துமாறு வலியுறுத்தினார். உக்ரைன் மீதான ரஷ்ய படையெடுப்பை இந்தியா இதுவரை கண்டிக்கவில்லை, மேலும் இராஜதந்திரம் மற்றும் பேச்சுவார்த்தை மூலம் நெருக்கடி தீர்க்கப்பட வேண்டும் என்று நிலைநிறுத்தியது. ஐநா பொதுச் சபை மற்றும் பாதுகாப்பு கவுன்சிலில் உக்ரைன் மோதல் குறித்த வாக்கெடுப்பில் இந்தியா வாக்களிக்கவில்லை என்பது குறிப்பிடத்தக்கது.