முதல்வர் வருகை.. 2 வருட போராட்டம்.. அனுமதியை மீறி பேரணி.. பரபரப்பில் காஞ்சிபுரம்

" திமுக பவள விழா பொதுக்கூட்டத்தில் பங்கேற்ற முதலமைச்சர் வரும் நிலையில், பரந்தூர் விமான நிலைய எதிர்ப்பு குழுவினர் பேரணி நடத்தப்படும் என அறிவித்துள்ளனர் " 

பரந்தூர் விமான நிலையம் போராட்டம்

Source : X

திராவிட முன்னேற்றக் கழகத்தின் கூட்டணி கட்சி தலைவர்கள் பங்கேற்கும் மாபெரும் பொதுக்கூட்டம் காஞ்சிபுரத்தில் உள்ள பச்சையப்பன் ஆடவர் கல்லூரி திடலில் இன்று (28 ஆம் தேதி ) மாலை 5 மணிக்கு நடைபெற உள்ளது. சிறப்பு வாய்ந்த முக்கூட்டத்திற்கு , திமுக பொதுச் செயலாளர் துரைமுருகன் தலைமை வகிக்கிறார். காஞ்சிபுரம் தெற்கு மாவட்ட செயலாளரும், எம்எல்ஏவுமான க.சுந்தரம் வரவேற்புரையாற்றுகிறார்.

கூட்டணி கட்சிகள் பங்கேற்பு

காஞ்சிபுரம் வடக்கு மாவட்ட செயலாளரும், அமைச்சருமான தா.மோ.அன்பரசன் முன்னிலை வகிக்கிறார். தமிழக முதல்வரும், திமுக தலைவருமான மு.க. ஸ்டாலின் சிறப்புரையாற்ற உள்ளார். இந்த கூட்டத்தில் கி. வீரமணி, இரா. முத்தரசன், எம்.எச்.ஜவாஹிருல்லா பொன்.குமார் கருணாஸ், கு. செல்வப்பெருந்தகை, வைகோ, கே.எம்.காதர்மொய்தீன், ஈ.ஆர்.ஈஸ்வரன், எர்ணாவூர் நாராயணன், அதியமான், தொல். திருமாவளவன், தி.வேல்முருகன், முருகவேல் ராஜன், திருப்பூர் அல்தாப், கே. பாலகிருஷ்ணன், கமல்ஹாசன், ஜி.எம்.தர் வாண்டையார், தமீமுன் அன்சாரி, பி.என்.அம்மாவாசி என முக்கியத் தலைவர்கள் பங்கேற்று வாழ்த்துரை என்ன தகவல்கள் தெரிவிக்கப்பட்டுள்ளது. கூட்டணி கட்சி தலைவர்கள் கலந்து கொள்ளும் முக்கிய நிகழ்ச்சி என்பதால் , திமுகவின் பவள விழா பொதுக்கூட்டம் கவனம் பெற்றுள்ளது.

பரந்தூர் விமான நிலையம்

சென்னை மீனம்பாக்கத்திற்கு அடுத்தபடியாக மிகப்பெரிய விமான நிலையம் அமைக்க வேண்டும் என மத்திய மாநில அரசுகள் முடிவு செய்து, காஞ்சிபுரம் மாவட்டத்தில் பரந்தூர் சுற்று வட்டார 20 கிராமப்புறங்களை உள்ளடக்கி சுமார் 5746 ஏக்கர் பரப்பளவில் பரந்தூர் பசுமைவெளி விமான நிலையம் அமைக்க மத்திய மாநில அரசுகள் நடவடிக்கை மேற்கொண்டு வருகிறது.‌ பரந்தூர் பசுமைவெளி விமான நிலையம் அமைக்கப்படுவதால் குடியிருப்புகள், விலை நிலங்கள், நீர்நிலைகள், உள்ளிட்டவைகள் பாதிக்கப்படும் எனக் கூறி கிராம மக்கள் தொடர் போராட்டங்களில் ஈடுபட்டு வருகின்றனர்.

தொடர் போராட்டத்தில் கிராம மக்கள் 

உண்ணாவிரதப் போராட்டம், கருப்புக்கொடி போராட்டம், சாலை மறியல், தலைமை செயலகத்தை நோக்கி பேரணி, கிராம சபை கூட்டத்தில் தீர்மானம், கிராம சபை கூட்டம் புறக்கணிப்பு, பள்ளிப் புறக்கணிப்பு, நாடாளுமன்ற தேர்தல் புறக்கணிப்பு, என பல்வேறு விதமான போராட்டங்களை மேற்கொண்டு வரும் நிலையில் 796வது நாளாக இரவு நேரங்களில் ஒன்று கூடி மத்திய மாநில அரசுகளை எதிர்த்து கோஷங்களை எழுப்பி நாள்தோறும் தொடர் போராட்டத்தில் ஈடுபட்டு வருகின்றனர்.

முதல்வரிடம் மனு 

தொடர்ந்து இரண்டு வருட காலமாக போராடிவரும் பரந்தூர் விமான நிலைய எதிர்ப்பு குழுவினர், தமிழ்நாடு முதலமைச்சரை நேரில் சந்தித்து விமான நிலையம் அமைக்க எதிர்ப்பு தெரிவித்து மனு அளிக்கும் உள்ளதாக அறிவித்திருந்தனர். இதனைத் தொடர்ந்து மாவட்ட நிர்வாகத்திடமும் இதுகுறித்து போராட்ட குழுவினர் கோரிக்கையை வைத்திருந்தனர். இந்தநிலையில் நேற்று காஞ்சிபுரம் மாவட்ட ஆட்சியர் வளாகத்தில் நடைபெற்ற, பேச்சுவார்த்தை அடிப்படையில் மாவட்ட நிர்வாகத்தால் முதலமைச்சர் சந்திக்க அனுமதி வழங்கும் அதிகாரம் கிடையாது.

இது தொடர்பாக பாதுகாப்பு அதிகாரிகளுக்கு தகவல் தெரிவிக்கப்படும் என தெரிவித்திருந்தனர். இந்தநிலையில் தமிழ்நாடு முதலமைச்சரை சந்தித்து மனு அளிக்க, அனுமதி மறுக்கப்பட்டுள்ளதாக போராட்டக் குழுவினர் தெரிவித்துள்ளனர். இதனால் கிராமத்திலிருந்து பேரணியாக சென்று, முதலமைச்சரிடம் மனு அளிக்கும் போராட்டம் நடைபெறும் எனவும் போராட்டக் குழுவினர் அறிவித்துள்ளனர் ‌. இதனால் அப்பகுதியில் பெரும் பரபரப்பு ஏற்பட்டுள்ளது. அனுமதியை மீறி போராட்டக் குழுவினர் பேரணியாக சென்றால், பாதுகாப்பு கருதி கிராம மக்கள் கைது செய்ய வாய்ப்புள்ளதாக காவல்துறை வட்டாரங்கள் தெரிவித்துள்ளனர்.