Cauliflower Chilli :காலிஃப்ளவர் சில்லி ...இந்த மாதிரி செய்து பாருங்க... அசத்தல் சுவையில் இருக்கும்...

சுவையான காலிஃப்ளவர் சில்லி எப்படி செய்வதென்று பார்க்கலாம்.

காலிஃப்ளவர் சில்லி

காலி ஃப்ளவரில் பக்கோடா, மஞ்சூரியன், கிரேவி உள்ளிட்ட ஏராளமான வகைகளை செய்யலாம்.  காலிஃப்ளவர் சில்லி மிகவும் சுவையாக இருக்கும். வாங்க இந்த ரெசிபியை எப்படி செய்வது என்று பார்க்கலாம்.

தேவையான பொருட்கள்:

காலிபிளவர் – 250 கிராம், மிளகாய் தூள் – 2 ஸ்பூன், சிக்கன் சில்லி 65 அல்லது மட்டன் சில்லி மசாலா – 2 ஸ்பூன், சோள மாவு – 3 ஸ்பூன், கடலை மாவு – 4 ஸ்பூன், அரிசி மாவு – 2 ஸ்பூன், எலுமிச்சை பழச்சாறு – 1 டேபிள்ஸ்பூன், தேவையான அளவு உப்பு, தேவைப்பட்டால் கலர் பவுடர் – 1/2 ஸ்பூன் அளவு சேர்த்துக் கொள்ளலாம். 

செய்முறை

முதலில் காலிபிளவரை தண்டு பகுதிகளோடு வெட்டி சுடுதண்ணீரில் போட்டு, 7 செகண்டில் சுடு தண்ணீரில் இருந்து வெளியே எடுத்து விட வேண்டும். காம்பு இல்லாமல் காலிஃப்ளவரை  சில்லி போட்டாலும் காலிபிளவர் சில்லி சரியாக வராது. 

சுடுதண்ணீரில் இருந்து எடுத்த காலிஃப்ளவரை தண்ணீரை வடித்து விட்டு ஒரு அகலமான பெளலில் போட்டுக் கொள்ள வேண்டும். இதில் தேவையான அளவு உப்பு, மிளகாய்த்தூள், சில்லி சிக்கன் 65 பவுடர், பஜ்ஜி மாவு எலுமிச்சை பழச்சாறு ஆகியவற்றை சேர்த்து, நன்றாக பாத்திரத்தை குலுக்கி விட வேண்டும். 

மாவு காலிஃப்ளவரில் ஒட்டாததுபோலவே தெரியும். ஆனாலும் இந்த இடத்தில் தண்ணீர் தெளித்து மசாலாக்களை காலிபிளவரோடு ஒட்ட வைக்க கூடாது. 2 நிமிடங்கள் நன்றாக குலுக்கி விட்டு, ஒரு மூடி போட்டு 5 நிமிடங்கள் அப்படியே வைத்து விட வேண்டும். அதன் பின்பு உங்கள் கைகளைக் கொண்டு காலிபிளவர் உடையாமல் கொஞ்சம் அழுத்தம் கொடுத்து பிசையும் போது, மசாலாக்கள் காலிபிளவரோடு நன்றாக ஒட்டிக் கொள்ளும்.

இறுதியாக இந்த காலிஃப்ளவரில் 2 டேபிள் ஸ்பூன் எண்ணெயை ஊற்றி, நன்றாக பிசைந்து கொள்ள வேண்டும். காலிபிளவரில் எண்ணெய் சேர்த்து செய்யும் போது காலிபிளவர் மொறுமொறுவென வரும். எண்ணெய் சேர்த்த பின்  20 நிமிடங்கள், மூடி போட்டு அப்படியே ஊற வைத்து, அதன் பின்பு 5 நிமிடம் ஃப்ரீசரில் வைத்து எடுத்துக் கொள்ள வேண்டும். 

கடாயில் எண்ணெயை ஊற்றி நன்றாக காய வைத்து அடுப்பை மிதமான தீயில் வைத்து பின்பு சில்லியை போட்டு எடுக்க வேண்டும். காலிஃப்ளவரை பக்குவமாக வேக வைத்து எடுத்தால்,  சுவையான காலிபிளவர் சில்லி தயார்.

மேலும் படிக்க