Special Bus: பொங்கல் சிறப்பு பேருந்துகள்! கோவையில் எந்தெந்த பேருந்துகள் எங்கிருந்து கிளம்பும்?

தொழில் மற்றும் கல்விக்காக வெளியூரில் இருந்து கோவையில் வந்து தங்கியுள்ளவர்கள், பொங்கலுக்கு சொந்த ஊர்களுக்கு செல்ல சிறப்பு பேருந்து வசதிகள் செய்யப்பட்டுள்ளன.

பேருந்து நிலையம்

தமிழர் திருநாளாம் பொங்கல் பண்டிகை அடுத்த வாரம் கொண்டாடப்படும் நிலையில், சென்னை, கோவை உட்பட வெளியூர்களில் பணியாற்றுவோர் தங்களது சொந்த ஊர்களுக்குச் செல்ல ஆயத்தமாகி வருகின்றனர். வெளியூர்களில் இருந்து சொந்த ஊர்களுக்கு செல்ல ஏதுவாக சிறப்புப் பேருந்துகள் இயக்கப்பட உள்ளன.

இதையொட்டி 12ஆம் தேதி முதல் 3 நாட்களுக்கு சிறப்புப் பேருந்துகள் இயக்கப்பட உள்ளன. அதன்படி, சென்னையில் இருந்து வழக்கமாக இயக்கக் கூடிய 2,100 பேருந்துகளுடன் கூடுதலாக 4,706 சிறப்புப் பேருந்துகள் என 3 நாட்களுக்கு மொத்தம் 11,006 பேருந்துகளும், திருச்சி, கோவை உள்ளிட்ட பிற ஊர்களில் இருந்து 8,478 சிறப்புப் பேருந்துகளும் இயக்கப்பட உள்ளன.

சிறப்பு பேருந்துகள்:

இதன் ஒரு பகுதியாக தொழில் மற்றும் கல்விக்காக வெளியூரில் இருந்து கோவையில் வந்து தங்கியுள்ளவர்கள், பொங்கலுக்கு சொந்த ஊர்களுக்கு செல்ல சிறப்பு பேருந்து வசதிகள் செய்யப்பட்டுள்ளன. அரசு போக்குவரத்து கழகத்தின் சார்பில் கூட்ட நெரிசலை சமாளிக்க பேருந்து நிலைய மாற்றங்கள் செய்யப்பட்டுள்ளன. அதன்படி சிங்காநல்லூர் பேருந்து நிலையத்தில் இருந்து மதுரை, தேனி உள்ளிட்ட தென் மாவட்டங்களுக்கு செல்லும் பேருந்துகள் இயக்கப்பட உள்ளன. சூலூர் பேருந்து நிலையத்தில் இருந்து கரூர், திருச்சி மார்க்கமாக செல்லும் பேருந்துகள் இயக்கப்பட உள்ளன.

இதேபோல காந்திபுரம் மத்திய பேருந்து நிலையத்தில் இருந்து சேலம், ஈரோடு, மேட்டுப்பாளையம், சத்தியமங்கலம் மார்க்கமாக செல்லும் பேருந்துகள் இயக்கப்பட உள்ளன. சாய்பாபா காலனி பகுதியில் உள்ள புதிய பேருந்து நிலையத்தில் இருந்து ஊட்டி,கூடலூர் செல்லும் பேருந்துகள் இயக்கப்பட உள்ளன. கோவை - மதுரை இடையே 200 பேருந்துகள், கோவை - திருச்சி இடையே 200 பேருந்துகள், கோவை - தேனி இடையே 100 பேருந்துகள், கோவை - சேலம் இடையே 240 பேருந்துகள் என மொத்தம் 750 சிறப்பு பேருந்துகள் இயக்கப்பட உள்ளன. பொதுமக்கள் இந்த பேருந்து வசதிகளை பயன்படுத்தி கொள்ள வேண்டும் என போக்குவரத்து கழக அதிகாரிகள் கேட்டுக்கொண்டுள்ளனர்.

இறைச்சி விற்பனைக்கு தடை:

ஒவ்வொரு ஆண்டும் பொங்கல் திருநாளின் ஒரு நிகழ்வாக தை மாதத்தின் இரண்டாவது நாளான மாட்டுப் பொங்கல் திருநாளன்று, திருவள்ளுவர் நாளாக கொண்டாடப்படுகிறது. ஆண்டுதோறும் திருவள்ளுவர் தினத்தன்று இறைச்சி கடைகள் செயல்பட தடை விதிக்கப்படுவது வழக்கம். வருகின்ற ஜனவரி 16 ம் தேதி திருவள்ளுவர் தினம் கொண்டாடப்படுகிறது. அதேபோல வருகின்ற 25 ம் தேதி வள்ளலார் தினம் கொண்டாடப்படுகிறது. அன்றைய தினம் தமிழக அரசால் ஆடு, மாடு மற்றும் கோழிகளை வதை செய்வதும், இறைச்சிகளை விற்பனை செய்வதும் தடை செய்யப்பட்டுள்ளது.

எனவே, கோயம்புத்தூர் மாநகராட்சிக்குட்பட்ட பகுதிகளில் ஆட்டிறைச்சி, மாட்டிறைச்சி, கோழி இறைச்சி மற்றும் பன்றி இறைச்சி கடைகளை மூடும்படி மாநகராட்சி நிர்வாகம் தெரிவித்துள்ளது. அன்றைய தினம் கோயம்புத்தூர் மாநகராட்சியால் செயல்படுத்தப்பட்டு வரும் உக்கடம், சக்தி ரோடு, போத்தனூர், அறுவைமனைகள், மற்றும் துடியலூர் மாநகராட்சி இறைச்சி கடைகள் செயல்படாது எனவும் தெரிவிக்கப்பட்டுள்ளது. இந்த உத்தரவை மீறி செயல்படுவோர் மீது மாநகராட்சி அதிகாரிகளால் கடுமையான நடவடிக்கை எடுக்கப்படும் என கோவை மாநகராட்சி ஆணையாளர் சிவகுரு பிரபாகரன் தெரிவித்துள்ளார்.