இரவில் கார் ஓட்டுகிறீர்களா?பயணத்தில் கவனிக்க வேண்டிய மிக முக்கிய விஷயங்கள்
சோர்வு காரணமாக எதிர்வினை ஆற்றும் திறன் குறைய வாய்ப்புள்ளது. எனவே, இரவு நேரப் பயணத்தைச் பாதுகாப்பானதாக மாற்ற நீங்கள் கடைபிடிக்க வேண்டிய விஷயங்களை காணலாம்
இரவு நேரப் பயணம் பகல் நேரத்தைப் போல எளிதானது அல்ல. குறைவான வெளிச்சம், உடல் சோர்வு மற்றும் எதிர்பாராத தடைகள் என இரவு நேரப் பயணம் சவாலானது. போதிய வெளிச்சமின்மை தூரத்தைக் கணிக்க சிரமத்தை ஏற்படுத்துகிறது. எதிரே வரும் வாகனங்களின் முகப்பு விளக்குகள் (Headlights) பார்வையைப் பாதிக்கலாம். சோர்வு காரணமாக எதிர்வினை ஆற்றும் திறன் குறைய வாய்ப்புள்ளது. எனவே, இரவு நேரப் பயணத்தைச் பாதுகாப்பானதாக மாற்ற நீங்கள் கடைபிடிக்க வேண்டிய விஷயங்கள் இதோ:
1. பார்வைத் திறன் - முகப்பு விளக்குகளின் பராமரிப்பு
இரவில் சாலை அடையாளங்கள் மற்றும் திருப்பங்களைக் கண்டறிவது கடினம். எனவே, வாகனத்தின் முகப்பு விளக்குகள் எப்போதும் சுத்தமாகவும், சரியாகப் பொருத்தப்பட்டும் இருக்க வேண்டும்.இருட்டான சாலைகளில் 'ஹை பீம்' (High beam) பயன்படுத்தலாம், ஆனால் எதிரே வாகனம் வரும்போது உடனடியாக 'லோ பீம்' (Low beam) முறைக்கு மாற வேண்டும்.முன்பக்கக் கண்ணாடி மற்றும் கண்ணாடிகளில் (Mirrors) தூசி இல்லாமல் பார்த்துக்கொள்ளுங்கள்.
2. சிறிய இடைவேளைகள் கட்டாயம்
நாள் முழுவதும் வேலை செய்துவிட்டு இரவு பயணத்தைத் தொடங்கும்போது தூக்க உணர்வு ஏற்படலாம். கொட்டாவி விடுவது மற்றும் கவனம் சிதறுவது ஆபத்தின் அறிகுறி.ஒவ்வொரு இரண்டு மணி நேரத்திற்கும் ஒருமுறை சிறிய இடைவேளை எடுப்பது உடலைப் புத்துணர்ச்சியுடன் வைத்திருக்கும்.காபி போன்ற பானங்கள் தற்காலிகமாக விழிப்புணர்வைத் தந்தாலும், அவை தூக்கத்திற்கு மாற்றாகாது. பயணத்திற்கு முன் நல்ல உறக்கம் அவசியம்.
3. எதிரே வரும் வாகனங்களின் வெளிச்சத்திலிருந்து பாதுகாப்பு
ஒற்றைச் சாலைகளில் வரும் வாகனங்களின் அதிகப்படியான வெளிச்சம் கண்களைப் பறிக்கலாம். அப்போது நேரடியாக அந்த விளக்குகளைப் பார்க்காமல், சாலையின் விளிம்பைப் பார்த்து வாகனத்தை ஓட்டவும். அதே போல் பின்னால் வரும் வாகனங்களின் வெளிச்சம் கண்ணாடியில் பட்டுத் தெரியாமல் இருக்க, உள்ளே இருக்கும் ‘ரியர் வியூ மிரரை’ (Rear View Mirror) ‘நைட் மோடில்’ (Night mode) மாற்றவும்.
4. வேகக் கட்டுப்பாடு
குறைந்த வெளிச்சத்தில், ஒரு தடையைப் பார்த்த பிறகு எதிர்வினை ஆற்ற குறைந்த நேரமே கிடைக்கும். எனவே, வேகத்தைக் குறைத்து ஓட்ட வேண்டும். மேலும் முன்னால் செல்லும் வாகனத்திற்கும் உங்கள் வாகனத்திற்கும் இடையே போதிய இடைவெளியைப் பராமரிக்கவும். இது திடீரென பிரேக் போட வேண்டிய சூழலில் உதவும்.
5. கவனம் சிதறாமல் இருக்க..
அதே போல் காரின் டேஷ்போர்டு விளக்குகள் அதிக வெளிச்சத்துடன் இருந்தால் அது உங்கள் பார்வையைப் பாதிக்கும். எனவே, கண்களுக்கு அசௌகரியம் இல்லாதவாறு அதன் வெளிச்சத்தைச் சீரமைக்கவும். காரில் செல்லும் போது சத்தமான இசை, அலைபேசி பயன்பாடு, சக பயணிகளுடன் அதிக உரையாடல் போன்றவை கவனத்தைச் சிதறடிக்கும். மேலும் மழை மற்றும் பனி மூட்டமான காலநிலையில் வாகனம் ஓட்டுவது மிகவும் கடினம். அப்போது 'ஃபாக் லேம்ப்' (Fog lamps) விளக்குகளைப் பயன்படுத்தி, மிகக் குறைந்த வேகத்தில் பயணம் செய்ய வேண்டும்.
தலைப்பு செய்திகள்
ட்ரெண்டிங் செய்திகள்
