Tamil Kudimagan Trailer: ’பறையரில் இருந்து பறைய எடுத்துட்டா எந்த பிரச்னையும் இருக்காது’- கவனம் பெறும் ’தமிழ்க்குடிமகன்’ ட்ரைலர்

Tamil Kudimagan Trailer: பெட்டிக்கடை மற்றும் பகிரி படங்களை இயக்கியுள்ளார் இயக்குநர் இசக்கி கார்வாணன்.

தமிழ்க்குடிமகன் பட போஸ்டர்

Tamil Kudimagan Trailer: பெட்டிக்கடை மற்றும் பகிரி படங்களை இயக்கியவர் இயக்குநர் இசக்கி கார்வாணன். இவரது இயக்கம் மற்றும் தயாரிப்பில் உருவாகியுள்ள படம் தமிழ்க்குடிமகன். இயக்குநர்கள் எஸ்.ஏ. சந்திர சேகர், சேரன், மலையாள நடிகர் லால், மறைந்த நடிகர் மயில்சாமி, வேல ராம மூர்த்தி, சென்ராயன் உள்ளிட்ட பலர் இந்த படத்தில் நடித்துள்ளனர். 

படத்தின் ட்ரைலரை வைத்துப் பார்க்கும்போது, ஒரு கிராமப்புறத்தில் ஆதிக்க சாதியைச் சார்ந்த ஒருவர் இறந்து விடுகிறார். இறந்தவரை சடங்குகள் செய்து அடக்க செய்ய வேண்டும் என்பதால், பட்டியலின சமூகத்தைச் சேர்ந்தவரை அழைக்கிறார்கள், ஆனால் பட்டியல் சமூகத்தைச் சேர்ந்தவர் வரமறுக்கவே, பிரச்சனை ஆகிறது. இதற்காக அருகில் உள்ள ஊரில் உள்ளவர்களை அழைக்கச் செல்வது போலவும், ஆனால் அந்த முயற்சி தோல்வி அடைவதால், தங்கள் சொந்த ஊரில் உள்ள பட்டியலினத்தைச் சேர்ந்தவரையே மீண்டும் அழைக்கிறார்கள். அவர் வர மறுக்கவே பிரச்சனை ஏற்படுகிறது. 

இதனால் பட்டியல் சமூகத்தைச் சேர்ந்தவர் காவல் துறையையும், நீதி மன்றத்தையும் அணுகுகிறார், அதன் பின்னர் நடப்பது க்ளைமேக்ஸ் காட்சியாக உருவாக்கப்பட்டுள்ளது. இந்த படத்தில் இயக்குநர் சேரன் பட்டியல் சமூகத்தைச் சேர்ந்தவராகவும், அவர் கிராம நிர்வாக அலுவலராக இருப்பவராகவும் உள்ளார். சேரனை இறுதிச் சடங்குகள் செய்ய அழைக்கும் காட்சியில், தான் வி.ஏ.ஓ என கூறுவதைப் போலவும், அதற்கு ஆதிக்க சாதியைச் சேர்ந்தவர், “ பெரிய மைசூர் மகாராஜா பேரன் இவரு..போடா” என கூறுவது போன்ற வசனம் உள்ளது. 

அதேபோல், சேரனின் மனைவியாக இருப்பவர், ”அனைவரும் காந்தியைப் போலவும் பெரியாரைப் போலவும் இருந்துவிட்டால் ஊர் உலகத்தில் பிரச்னை இருக்காதுல” என கூறுவது போன்ற வசனமும் இடம் பெற்றுள்ளது. 

வழக்குரைஞராக வரும் எஸ்.ஏ. சந்திர சேகர், பறையர் என்ற வார்த்தையில் இருந்து பறையை எடுத்துவிட்டால் ஐயர் மட்டும் இருக்கும், அப்பறம் என்ன நாட்டில் உள்ள அனைத்து பிரச்னையும் இருக்காது’ என கூறும் வசனமும், ’உங்களுக்கு கோமனம் கட்டியுட்டது நாங்கதான், படிக்கவெச்சது நாங்கதான், சமூக நீதி வாங்கிக்கொடுத்தது நாங்கதான் என கூறும் ஒருவர் கூட இவரது போராட்டத்திற்கு ஆதரவு தந்தார்களா? இல்லை.. காரணம் ஜாதியை வைத்துதான் அவர்கள் அரசியல் செய்து வருகின்றனர்’ என்ற வசனம் என ட்ரைலர் முழுவதும் மிகவும் கூர்மையான வசனங்களைக் கொண்டதாக உள்ளது. 

இந்த படத்தின் ட்ரைலருக்கு சமூக வலைதளத்தில் நல்ல வரவேற்பு கிடைத்துள்ளதுடன், வசனங்கள் கவனம் பெற்றுள்ளது. இப்படத்திற்கு சாம்.சி.எஸ் இசை அமைத்துள்ளார்.  மேலும் இப்படத்தின் ரிலீஸ் தேதி குறித்து இதுவரை எதுவும் அறிவிக்கப்படவில்லை.