“ரகிட ரகிட” பாடல் எங்கே ஷூட் செய்யப்பட்டது தெரியுமா ? மனம்திறந்த சந்தோஷ் நாராயணன்!

பிரிட்டிஷ் பேண்ட் குழுவினர் மற்றும் இசை கலைஞர்கள், ஸ்காட்டிஷ் இசை கலைஞர்கள் என உலகம் முழுவதிலிருந்தும் பல திறமையாளர்களுடன் இணைந்து இப்படத்தில் இசை அமைத்துள்ளேன் சந்தோஷ் நாராயணன்!

இசையமைப்பாளர் சந்தோஷ் நாராயணன்

இந்திய அளவில் அனைத்து சினிமா ரசிகர்களும், ‘ரகிட ரகிட’ மெட்டை இசைத்தவாறு Netflix உடைய “ஜகமே தந்திரம்” வெளியீட்டுக்காக ஆவலுடன் காத்திருக்கிறார்கள். இப்படத்தில் இருந்து ஏற்கனவே வெளியான “ரகிட ரகிட, புஜ்ஜி, நேத்து” என்ற 3 பாடல்கள் வெளியாகி இந்திய அளவில் பெரும் வரவேற்பை பெற்றுள்ளது. இதற்கு முழுமையான காரணம் இசையமைப்பாளர் சந்தோஷ் நாராயணனின் உழைப்பே. தமிழ் சினிமாவில் முன்னனி இசையமைப்பாளராக வலம் வரும் சந்தோஷ் நாராயணன், ஒவ்வொரு முறையும் தனது வித்தியாசமான இசையமைப்பில் மூலம் மாயங்களை நிகழ்த்தி, ரசிகர்களின் மனதை பரவசப்படுத்திக்கொண்டே இருக்கிறார்.

ஜகமே தந்திரம் திரைப்படத்தில் அதிக அளவில் சுதந்திரமாகவும், இசையமைக்க உரிய நேரமும் கிடைத்ததால் ரசிகர்கள் அனைவரும் விரும்பும் வகையிலான இசையை அமைத்துள்ளதாக சந்தோஷ் நாராயணன் தெரிவித்துள்ளார்.

ஜகமே தந்திரம் படத்திற்கு இசையமைத்தது குறித்து பகிர்ந்து கொண்டுள்ள சந்தோஷ் நாராயணன் "இப்படத்தின் இசைப்பணிகளுக்காக மிகப்பெரிய அளவில் நேரம் கிடைத்தது. உலக அளவில் பயணப்படும் படம் என்பதால் நிறைய மெனக்கெட்டேன். பல இடங்களில் இருந்து நிறைய கற்றுக்கொண்டேன். இந்த படத்தின் இசை நம் மக்களுக்கு அந்நியமாக இருக்ககூடாது என்பதில் உறுதியாக இருந்தேன். இந்த படம் ஒரு வகையில் பிரிட்டிஷ் படைப்பென்றே சொல்லலாம். அதிலும் பிரிட்டிஷ் பேண்ட் குழுவினர் மற்றும் இசை கலைஞர்கள், ஸ்காட்டிஷ் இசை கலைஞர்கள் என உலகம் முழுவதிலிருந்தும் பல திறமையாளர்களுடன் இணைந்து இப்படத்தில் பணிபுரிந்திருக்கிறேன். மதுரை நாட்டுப்புற இசையையும் இப்படத்தில் முயற்சித்திருக்கிறேன்" என்று தெரிவித்துள்ளார்.

மேலும் மற்ற படங்களில் படப்பிடிப்பு தளத்திற்கு எல்லாம் சென்றதில்லை ஆனால் “ஜகமே தந்திரம் படப்பிடிப்பிலும் தான் கலந்து கொண்டதாக தெரிவித்துள்ளார். அதனால் படத்தில் இசை காட்சிகளில் எப்படி பொருந்தும், எது பொருந்தாது என்கிற தெளிவு இருந்தது. இந்த அனுபவமே புதுமையாக இருந்தது. ஒரு கலைஞனாக, பல விதமான புதிய முயற்சிகளுக்கு இப்படத்தில் இடம் கிடைத்தது, மிகப்பெரும் மகிழ்ச்சி" என்று சந்தோஷ் நாராயணன் தெரிவித்துள்ளார்.

ஜகமே தந்திரம் படத்திலேயே மிகவும் பிரபலம் அடைந்த பாடல் “ரகிட ரகிட” பாடல் தான், ஆனால் இது ஸ்டூடியோ உள்ளே எடுக்கப்பட்ட பாடல் இல்லை என ஆச்சரியத்தை ஏற்படுத்தியுள்ளார் சந்தோஷ் நாராயணன். அவர் தெரிவிக்கையில் "ரகிட ரகிட பாடல் முதல்முறையாக எனது ஸ்டூடியோவிற்கு வெளியே பதிவு செய்த பாடல். அந்த பாடலே ஒரு அனுபவத்தின் உணர்வின் வெளிப்பாடுதான். ரசிகர்கள் அந்த அனுபவத்தை உணர வேண்டும் என்று நினைத்தோம்" என தெரிவித்துள்ளார். மேலும் படத்தின்  மொத்த குழுவினர், குறிப்பாக இயக்குநர் கார்த்திக் சுப்புராஜுக்கு நன்றி. இப்படத்தில் அவருடன் இணைந்து நூற்றுக்கணக்கான புதிய முயற்சிகளை செய்தேன். ஆனால் “ஜகமே தந்திரம்” படத்திற்கு, காட்சிக்கு தேவையான மண்ணின் இசையை, படத்தில் கொண்டுவந்துள்ளோம். ரசிகர்கள் படத்தை கொண்டாடுவார்கள் என நம்புவதாக தெரிவித்துள்ளார்.

இசையமைப்பாளர் சந்தோஷ் நாராயணன் உடைய  மாயாஜால இசையை, வரும் ஜூன் 18-ஆம் தேதி Netflix தளத்தில் வெளியாகும் “ஜகமே தந்திரம்” படத்துடன் இணைந்து கொண்டாட ரசிகர்கள் பலர் ஆர்வமாக காத்துள்ளனர்.