Muthiah Muralitharan: விஜய் சேதுபதி விலகிய “800” படத்தின் ஃபர்ஸ்ட் லுக் போஸ்டர் வெளியீடு .. ஹீரோ யார் தெரியுமா?
முன்னாள் இலங்கை அணியின் சுழற்பந்து வீச்சாளர் முத்தையா முரளிதரனின் வாழ்க்கை வரலாற்று படத்தின் ஃபர்ஸ்ட் லுக் போஸ்டர் வெளியாகி ரசிகர்களை கவர்ந்துள்ளது.
முன்னாள் இலங்கை அணியின் சுழற்பந்து வீச்சாளர் முத்தையா முரளிதரனின் வாழ்க்கை வரலாற்று படத்தின் ஃபர்ஸ்ட் லுக் போஸ்டர் வெளியாகி ரசிகர்களை கவர்ந்துள்ளது.
சர்ச்சைகளில் சிக்கிய படம்
கடந்த 2020 ஆம் ஆண்டு மூவி டிரெயின் மோஷன் பிக்சர்ஸ் வழங்கும் இயக்குநர் எம்.எஸ். ஸ்ரீபதி இயக்கத்தில் முன்னாள் இலங்கை அணியின் சுழற்பந்து வீச்சாளர் முத்தையா முரளிதரன் பயோபிக் படத்தில் நடிகர் விஜய் சேதுபதி நடிக்க இருப்பதாக அறிவிக்கப்பட்டது. இந்த படத்தின் ஃபர்ஸ்ட் லுக் மற்றும் மோஷன் போஸ்டர்களும் வெளியாகியது. முரளிதரனின் டெஸ்ட் கிரிக்கெட்டில் 800 விக்கெட்டுகளை வீழ்த்தியதை குறிப்பிடும் வகையில் இந்த படத்திற்கு “800” என பெயரிடப்பட்டது.
தமிழில் எடுக்கப்படும் இப்படத்தை இந்தி, வங்காளம், சிங்களம் என டப்பிங் செய்யவும் முடிவு செய்யப்பட்டிருந்தது. ஆனால் பல்வேறு அரசியல் கட்சித் தலைவர்கள், இலங்கைத் தமிழர்கள், திரையுலக பிரபலங்கள் என பலரும் விஜய் சேதுபதி இப்படத்தில் நடிக்க வேண்டாம் என கோரிக்கை விடுத்தனர். தொடர் சர்ச்சைகள் காரணமாக முரளிதரனே விஜய் சேதுபதியை இந்த படத்தில் விலகி கொள்ளுமாறு சமூக வலைத்தளங்களில் கோரிக்கை விடுத்தார். இதுதொடர்பான பதிவை குறிப்பிட்டு “நன்றி வணக்கம்” என விஜய் சேதுபதி பதில் தெரிவித்திருந்தார்.
பின்னர் நடைபெற்ற பத்திரிக்கையாளர் சந்திப்பில் 800 படம் குறித்து கேள்வியெழுப்பப்பட, அதற்கு “நன்றி வணக்கம்” என சொன்னவுடனே அது முடிந்துவிட்டது என்று அர்த்தம். இனி அதைப்பற்றி பேச ஒன்றும் இல்லை
என விளக்கமளித்தார். இதனால் இந்த சர்ச்சை முடிவுக்கு வந்தது.
மீண்டும் வந்த “800”
இதனிடையே இன்று முத்தையா முரளிதரன் தனது 51வது பிறந்தநாளை கொண்டாடுகிறார். இதனை முன்னிட்டு அவரது வாழ்க்கை வரலாற்று திரைப்படமான '800' படத்தின் ஃபர்ஸ்ட் லுக் போஸ்டர் வெளியாகியுள்ளது.
இந்த படத்தில் ‘ஸ்லம்டாக் மில்லியனர்’ படத்தில் நடித்த நடிகர் மதுர் மிட்டல் முத்தையா முரளிதரனாகவும், மஹிமா நம்பியார் மதிமலராகவும் நடிக்கின்றனர். இயக்குநர் வெங்கட்பிரபுவிடம் அசோசியேட் இயக்குநராக இருந்தவரும், ‘கனிமொழி’ (2010) படத்தின் மூலம் இயக்குநராக அறிமுகமானவருமான ஸ்ரீபதி, தற்போது '800' படத்தின் மூலம் மீண்டும் இயக்கத்திற்கு திரும்பி உள்ளார்.
இலங்கை, சென்னை, கொச்சி, இங்கிலாந்து மற்றும் ஆஸ்திரேலியாவில் படமாக்கப்பட்டு இதன் படப்பிடிப்பு தற்போது முடிவடைந்துள்ளது. தமிழ், தெலுங்கு, இந்தி, ஆங்கிலம் ஆகிய மொழிகளில் இப்படம் விரைவில் வெளியாகவுள்ளது.இந்த படத்துக்கு ஆர்.டி.ராஜசேகர் ஒளிப்பதிவாளராகவும், ஜிப்ரான் இசையமைப்பாளராகவும், பிரவீன் கே.எல். எடிட்டராகவும் பணியாற்றவுள்ளனர் என்பது குறிப்பிடத்தக்கது.
மேலும் படிக்க: 19 Years of Gilli: ஆல் ஏரியாவுல நம்ப கில்லிடா...! ரீமேக் படத்திற்கு பின்னால் நடந்த சுவாரஸ்யமான சம்பவங்கள் தெரியுமா?
தலைப்பு செய்திகள்
ட்ரெண்டிங் செய்திகள்
