Kia Car Price: எகிறப்போகும் கியா கார்களின் விலை - ஏப்ரல் 1 முதலான நிலவரம் என்ன தெரியுமா?

Kia Car Price: கியா நிறுவன கார்களின் விலை வரும் ஏப்ரல் 1ம் தேதி முதல் உயர உள்ளது.

கியா கார் மாடல்கள்

Kia Car Price: கியா நிறுவன கார்களின் விலை வரும் ஏப்ரல் 1ம் தேதி முதல், 3 சதவிகிதம் வரை உயர்த்தப்பட உள்ளது.

கியா கார்கள்:

இந்திய ஆட்டோமொபைல் சந்தையில் கார்களின் விற்பனை தொடர்ந்து அதிகரித்து வருகிறது. மாதமாத விற்பனையும் தொடர்ந்து ஏறுமுகத்தில் உள்ளது. அதேநேரம், சர்வதேச அளவில் விநியோக சங்கிலியில் நிலவும் சிக்கல் மற்றும் பொருட்களின் உற்பத்தி செலவு அதிகரிப்பு கார் உற்பத்தியாளர்களுக்கு நீண்டகால சிக்கலாக உள்ளது. இதனை காரணம் காட்டி, கியா நிறுவனம் இந்திய சந்தையில் கார்களின் விலையை உயர்த்த உள்ளது. இந்த புதிய விலையானது வரும் ஏப்ரல் 1ம் தேதி முதல் அமலுக்கு வரவுள்ளது.

கியா கார் விலை உயர்வு:

கியா இந்தியா நிறுவனம் தனது கார் மாடல்களுக்கு மூன்று சதவிகிதம் வரை விலையை உயர்த்த உள்ளது. நடப்பாண்டில் கியாவால் அமல்படுத்தப்படும் முதல் விலை உயர்வு நடவடிக்கை இதுவாகும். செல்டோஸ் , சோனெட் மற்றும் கேரன்ஸ் ஆகியவற்றை உள்ளடக்கிய கியா நிறுவன மாடல்களின் புதிய விலைகள் ஏப்ரல் முதல் வாரத்தில் வெளியிடப்படும் என்று எதிர்பார்க்கப்படுகிறது.

தற்போதைய விலை நிலவரம்:

தற்போதைய சூழலில் 19 வேரியண்ட்களில் கிடைக்கும் கியா சோனேட் விலை  7.99 லட்சத்தில் தொடங்கி 15.69 லட்சம் வரை நிர்ணயிக்கப்பட்டுள்ளது. 32 வேரியண்ட்களில் கிடைக்கும் கியா செல்டோஸ் கார் மாடலின் தொடக்க விலை 10 லட்சத்து 90 ஆயிரம் ரூபாயாகவும், அதிகபட்ச விலை 20 லட்சத்து 30 ஆயிரம் ரூபாயாக நிர்ணயிக்கப்பட்டுள்ளது. 23 வேரியண்ட்களில் கிடைக்கும் கியா காரென்ஸ் கார் மாடல், தொடக்க விலை 10.45 லட்சமாகவும் அதிகபட்ச விலை 19.45 லட்சமாகவும் நிர்ணயிக்கப்பட்டுள்ளது. இரண்டு வேரியண்ட்களாக கிடைக்கும் EV6 விலை 60.95 - 65.95 லட்சம் வரை நிர்ணயிக்கப்பட்டுள்ளது. இந்த சூழலில் 3 சதவிகிதம் வரை விலை உயர்த்தப்பட்டால், ஒவ்வொரு காரின் மீதும் சில ஆயிரங்கள் விலை உயரக்கூடும்.

விற்பனை எப்படி?

விற்பனையைப் பொறுத்தவரை, கியா 1.16 மில்லியன் ஒட்டுமொத்த யூனிட்களை விற்றுள்ளது. நடுத்தர அளவிலான எஸ்யூவி செல்டோஸ் 6.13 லட்சம் யூனிட் விற்பனையைத் தாண்டியுள்ளது, சோனெட் 3.95 லட்சத்திற்கும் அதிகமான யூனிட்களையும், கேரன்ஸ் எம்பிவி 1.59 லட்சம் யூனிட்களையும் விற்பனை செய்துள்ளது. எலக்ட்ரானிக் ஆயில் பம்ப் கன்ட்ரோலரில் ஏற்படக்கூடிய கோளாறை சரிசெய்ய கியா கடந்த மாதம் பெட்ரோல்-சிவிடி செல்டோஸின் 4,358 யூனிட்களை திரும்பப் பெற்றது குறிப்பிடத்தக்கது. இதனிடையே, கியா EV9, நியூ கார்னிவால், க்ளாவிஸ் மற்றும் EV9 ஆகிய புதிய கார் மாடல்களை சந்தைக்கு கொண்டு வர கியா நிறுவனம் திட்டமிட்டுள்ளது.