”எங்களையே கைது பண்றீங்களா! வேடிக்கை பார்க்க மாட்டோம்” கடுப்பான விஜய்

புஸ்ஸி ஆனந்த் உள்ளிட்ட தவெகவினர் கைது செய்யப்பட்ட நிலையில், ஆத்திரமாக எதிர்ப்பு குரல் எழுப்பியுள்ளார் அக்கட்சித் தலைவர் விஜய்.

அண்ணா பல்கலைக்கழக மாணவி பாலியல் வன்கொடுமைக்கு உள்ளான சம்பவம் அதிர்ச்சியை ஏற்படுத்தியது. இதற்கு கண்டனம் தெரிவித்து கைப்பட கடிதம் எழுதி வெளியிட்டார் தவெக தலைவர் விஜய். நம்மை ஆளும் ஆட்சியாளர்களை எத்தனை முறை கேட்டாலும் எந்த பயனும் இல்லை என்பது தெரிந்ததே. பாதுகாப்பான தமிழகத்தை படைத்தே தீருவோம் என கூறியிருந்தார்.

இந்த கடிதத்தை வைத்துக் கொண்டு தமிழ்நாட்டின் பல்வேறு பகுதிகளில் தவெகவினர் போராட்டத்தில் இறங்கினர். தவெக பொதுச்செயலாளர் புஸ்ஸி ஆனந்தும் விஜய் எழுதிய கடித்தத்தை துண்டு பிரசுரமாக மாணவர்கள் மற்றும் பொதுமக்களுக்கு கொடுத்த காரணத்திற்காக கைது செய்யப்பட்டார். மேலும் காவல்துறை அனுமதியில்லாமல் போராட்டம் நடத்திய தவெகவினர் அடுத்தடுத்து கைது செய்யப்பட்டனர். 

இந்தநிலையில் தவெக தலைவர் விஜய் இதற்கு கடும் கண்டனம் தெரிவித்துள்ளார். இதுதொடர்பான அவரது பதிவில், ‘தமிழ்நாட்டில் அனைத்து இடங்களிலும் பெண்களுக்கான பாதுகாப்பை அரசு உறுதி செய்ய வேண்டும் என்று தமிழக வெற்றிக் கழகம் தொடர்ந்து வலியுறுத்தி வருகிறது. இந்நிலையில் சென்னை, அண்ணா பல்கலைக்கழகத்தில் மாணவி ஒருவர் பாலியல் வன்கொடுமை செய்யப்பட்ட சம்பவம், தமிழக மக்களிடையே பெரும் கொந்தளிப்பை ஏற்படுத்தியுள்ளது. இச்சூழலில், தமிழகத்துத் தங்கைகளுக்கு இன்று நான் எழுதிய கடிதம் வெளியிடப்பட்டது. அதில், "எல்லாச் சூழல்களிலும், நிச்சயமாக உங்களுடன் உறுதியாக நிற்பேன், அண்ணனாகவும், அரணாகவும். எதைப் பற்றியும் கவலைப்படாமல் கல்வியில் கவனம் செலுத்துங்கள்" என்று வேண்டுகோள் விடுத்திருந்தேன். இக்கடிதத்தின் நகல்களைத் தமிழகம் முழுவதும் பொதுமக்களிடமும் பெண்களிடமும் த.வெ.க. மகளிரணியினர் மற்றும் கட்சி நிர்வாகிகள் வழங்கியுள்ளனர். சென்னையில் பொதுமக்களிடம் இந்த நகல்களை எம் கட்சித் தோழர்கள் வழங்கவிடாமல் தடுத்த காவல் துறையினர், அவர்களைக் கைது செய்து, பின்னர் விடுவித்துள்ளனர். ஜனநாயக வழியில் பிரசுரங்களை விநியோகம் செய்ய முயன்றதற்காக அவர்களைக் கைது செய்தது கண்டனத்துக்கு உரியது. கருத்துரிமை, பேச்சுரிமை அடிப்படையில், யாருக்கும் தொந்தரவு இல்லாமல் அறவழியில் மக்களைச் சந்தித்த எம் கட்சித் தோழர்களைக் கைது செய்வது தான் ஜனநாயகமா? இது போன்ற ஜனநாயக விரோத நடவடிக்கைகளை மக்கள் வெகு காலம் வேடிக்கை பார்க்க மாட்டார்கள்” என கூறியுள்ளார்.