Anbil Mahesh | விஜயை பார்க்க போய் விபத்து ”செலவை நான் பார்த்துக்கிறேன்” நேரில் சென்ற அன்பில்

விஜயை பார்க்க போன போது விபத்தில் சிக்கி மருத்துவமனையில் சிகிச்சை பெற்று வரும் மாணவரை நேரில் சந்தித்தார் நலம் விசாரித்தார் அன்பில் மகேஷ். செலவுகளை நினைத்து மாணவரின் தந்தை பேசிய வீடியோ கலங்க வைத்த நிலையில், மருத்துவ செலவுகளை கவனித்துக் கொள்வதாக உறுதி கொடுத்துள்ளார் அன்பில். 

சட்டப்பேரவை தேர்தல் நெருங்கும் நிலையில் தவெக தலைவர் விஜய் தஞ்சாவூர் மாவட்டம் செங்கிப்பட்டியில் பிரச்சாரம் செய்தார். திருச்சியில் இருந்து காரில் தஞ்சாவூர் சென்ற விஜயை பார்ப்பதற்காக ரசிகர்கள் காரை பின் தொடர்ந்து வந்தனர். இதனால் விபத்துகள் ஏற்படுவதால் யாரும் பின் தொடர்ந்து வர வேண்டாம் என விஜய் கையெடுத்து கும்பிட்டும் எந்த பலனும் இல்லை. தஞ்சாவூருக்கு வந்த விஜய்யின் காரின் பின் தொடர்ந்து வந்த கல்லூரி மாணவர் விக்னேஷ் விபத்தில் தலையில் அடிபட்டு மருத்துவமனையில் சிகிச்சை பெற்று வருகிறார்.

காலேஜுக்கு போறேனு சொல்லி, விஜய்யை பார்க்க போய் இப்போ ICU-ல படுத்திருக்கான் என விக்னேஷின் தந்தை வருத்தம் தெரிவித்தார். ”41 பேர் இறந்தப்போவே பார்க்காதவங்க இங்க வந்தா பார்க்கப் போறாங்க, கட்சி வந்து என்ன பண்ணப் போகுது” என ஆதங்கப்பட்டார். பால் வியாயாரியான விக்னேஷின் தந்தை பாண்டியன் எவ்வளவு செலவானாலும் சமாளித்து மகனை காப்பாற்றுவேன் என சொன்னது கண்கலங்க வைத்தது.

இந்தநிலையில் மருத்துவமனையில் சிகிச்சை பெற்று வரும் விக்னேஷை நேரில் சந்தித்து நலம் விசாரித்துள்ளார் அமைச்சர் அன்பில் மகேஷ். அதோடு மருத்துவ செலவுகளையும் கவனித்துக் கொள்வதாக உறுதி கொடுத்துள்ளார். மேலும் மருத்துவர்களிடமும் மாணவர்களின் உடல்நிலை குறித்து கேட்டறிந்தார். தஞ்சாவூர் நாடாளுமன்ற உறுப்பினர் முரசொலியும் அன்பில் மகேஷுடன் வந்து மாணவரை சந்தித்து ஆறுதல் தெரிவித்தார்.