35 Years of Vedham Pudhithu: சாதி வெறியர்களுக்கு சவுக்கடி கொடுத்த படைப்பு...! வேதம் புதிது வெளியான நாள் இன்று..!

35 ஆண்டுகளுக்கு முன்னர் பெரும் அதிர்வலைகளை ஏற்படுத்திய பாரதிராஜாவின் 'வேதம் புதிது' திரைப்படம் வெளியான நாள் இன்று.

35 ஆண்டுகளாக வேதம் புதிது

வேதம் புதிது:

தமிழ் சினிமாவில் எத்தனையோ திரைப்படங்கள் சமுதாய சீர்கேடுகள், பிரச்சனைகள் என பல விஷயங்களை வெளிப்படையாக தோலுரித்து காட்டியுள்ளது. அதிலும் சாதிகளை மையமாக வைத்து ஏரளமான திரைப்படங்கள் வெளியானாலும் சாதியின் படிநிலைகளை அதன் வேரில் இருந்தே அறுத்து எறிவது போல மிகவும் வெளிப்படையாக பேசி அனைவரையும் திரும்பி பார்க்க வைத்த திரைப்படம் 1987ம் ஆண்டு பாரதிராஜாவின் இயக்கத்தில் வெளியான 'வேதம் புதிது' திரைப்படம்.

இப்படம் வெளியாகி இன்றுடன் 35 ஆண்டுகளை கடந்துவிட்டது. ஆனாலும் இது ஏற்படுத்திய அதிர்வலைகளை மிஞ்சும் வகையில், எந்த ஒரு சாதிய படத்தாலும் உரக்க குரல் கொடுக்க  முடியாது. அப்படி இனி வரும் காலங்களின் இது போன்ற படங்கள் வந்தாலும் அவை அனைத்திற்கும் முன்னோடியாய் திகழ்பவர் பாரதிராஜாவாகவே இருக்க முடியும்.

 

தணிக்கை குழு படத்திற்கு வைத்த செக்: 

பொதுவாக ஒரு படம் தணிக்கை குழுவுக்கு அனுப்பும் போது ஒரு சில காட்சிகளை வெட்டுவது உண்டு. ஆனால் ஒட்டுமொத்த படத்தையும் வெளியிட தடை விதித்து விட்டார்கள் என கூறப்பட்டது. இப்படி பல்வேறு சிக்கல்களையும் தாண்டி தான் இப்படம் வெளியானது. அதற்கு முக்கிய காரணமாக இருந்தது அந்த சமயத்தில் முதலமைச்சராக இருந்த மக்கள் திலகம் எம்.ஜி.ஆர். அவர் படத்தை பார்த்து படக்குழுவை பாராட்டி படம் வெளியாவதில் இருந்த சிக்கலை தீர்த்து வைத்தவர். இப்படம் டிசம்பர் 27ம் தேதி வெளியானது ஆனால் டிசம்பர் 24ம் தேதியன்று எம்.ஜி.ஆர் காலமானார். எனவே அவர் கடைசியாக பார்த்த திரைப்படம் வேதம் புதிது என்பது குறிப்பிடத்தக்கது.    

 

"பாலு ன்றது உங்க பேரு..தேவர் ன்றது நீங்க படிச்சு வாங்குன பட்டமா ?"

Dialogues in this film 👌

Vedham Pudhidhu(1987) pic.twitter.com/aNkawtKvi0

— Missed Movies 🎬 (@MissedMovies) April 10, 2020

 

வெரைட்டி இயக்குநர் :

தமிழ் சினிமா ஸ்டூடியோ உள்ளேயே செட் போட்டு எடுத்து வந்த காலகட்டத்தில் கேமராவின் பார்வையை வேறு பக்கமாக திருப்பி பசுமையாக காட்சிப்படுத்தி காட்டியதில் முக்கிய பங்கு வகிப்பவர் இயக்குனர் பாரதிராஜா தான். வேதம் புதிது திரைப்படத்தை தொடர்ந்து சிகப்பு ரோஜாக்கள், கிழக்கே போகும் ரயில், நிழல்கள், புதிய வார்ப்புகள், அலைகள் ஓய்வதில்லை, நிறம் மாறாத பூக்கள், காதல் ஓவியம், டிக் டிக் டிக் என அடுத்தடுத்து ரசிகரக்ளுக்கு வெரைட்டி வெரைட்டியாக கொடுத்து தமிழ் சினிமாவை அடுத்த கட்டத்திற்கு நகர்த்தி சென்றவர்.

 

நடிகர் சத்யராஜ் திரைப்பயணத்தில் அவர் நடித்த முக்கியமான கதாபாத்திரங்களில் ஒன்று இப்படத்தில் அவர் நடித்த பாலு தேவர் கதாபாத்திரம். இப்படத்தின் ஹைலைட்டே சிறப்பாகவும் ஆழமாகவும் நெற்றியில் அடித்தாற்போல் இருந்த வசனங்கள் தான். "பாலு என்பது உங்க பேரு... தேவர் என்பது நீங்கள் படித்து வாங்கின பட்டமா..?" என்ற வசனம் இன்றளவும் அந்த படத்தை பற்றி நம்மை பேசவைத்துக் கொண்டிருக்கிறது. சாதி எனும் கயிறை பிடித்து கொண்டு தொங்குபவர்களின் கன்னத்தில் அறைந்தார் போல் இருந்தது கே. கண்ணனின் வசனங்கள்.

படத்தின் பக்கபலமாக இருந்தவர்கள்: 

சத்யராஜின் மனைவியாக சரிதா ஒரு தாயின் தவிப்போடும், அமலா சாஸ்திரங்களை தாண்டியும் ஒரு யதார்த்தமான ஒரு பெண்ணாக, படத்தின் இரண்டாம் பாதியை ஆக்கிரமித்த மாஸ்டர் தசாரதி என இவர்கள் அனைவரும் சத்யராஜுக்கு இணையாக பாராட்டை வாங்கினார்கள். பிராமண சாஸ்திரியாக சாருஹாசன், சத்யராஜின் மகனாக ராஜா என இவர்கள் ஒரு சில காட்சிகளில் மட்டுமே வந்தாலும் அவர்களின் பங்களிப்பு முழுமையாக இருந்தது.


பாரதிராஜாவின் கூட்டணியில் முதல்முறையாக இசையமைத்த தேவேந்திரன் பாடல்கள் அனைத்தும் காதுகளுக்கு இனிமை. கண்ணுக்குள் நூறு நிலவா பாடல் இன்றும் பலரின் ஃபேவரைட். கே. கண்ணன் எழுதிய 'சாதிகள் இல்லையடி பாப்பா' நாவலின் திரைக்கதை வடிவம் தான் வேதம் புதிது. படத்தின் ஆரம்பம் முதல் முடிவு வரையில் நமக்குள் இருக்கும் சாதி குறித்த எண்ணங்களுக்கு சரியான அடிகொடுத்த திரைப்படம்.