Vidamuyarchi Update: ஆகஸ்ட்டில் தொடங்கும் ‘விடாமுயற்சி’ படப்பிடிப்பு... அஜித் ரசிகர்களுக்கு குட் நியூஸ்... முழு விபரம்!

விடாமுயற்சி திரைப்படம் ஜூன் மாதமே தொடங்கும் எனத் தகவல்கள் வெளியாகின. ஆனால் தொடர்ந்து  படப்பிடிப்பு பணிகள் பல்வேறு காரணங்களால் தள்ளிப்போய் வந்தன.

அஜித், மகிழ்திருமேனி

நடிகர் அஜித்தின் விடாமுயற்சி படப்பிடிப்பு தொடங்கும் தேதி வெளியாகியுள்ளது. தடையற தாக்க தொடங்கி கலகத் தலைவன் வரை திரைப்படங்கள் இயக்கி, தன் தனித்துவ ஆக்‌ஷன் பாணி படங்களால் தமிழ் சினிமா ரசிகர்களை ஈர்த்தவர் இயக்குநர் மகிழ் திருமேனி.

இவர் முதன்முறையாக கோலிவுட் டாப் நட்சத்திரங்களில் ஒருவரான நடிகர் அஜித் உடன் இணையும் திரைப்படம் விடாமுயற்சி. லைகா நிறுவனம் இப்படத்தை இயக்கும் நிலையில், அனிருத் இப்படத்துக்கு இசையமைக்கிறார். நீரவ்ஷா இப்படத்துக்கு ஒளிப்பதிவு செய்ய உள்ளதாகத் தகவல்கள் வெளியாகியுள்ளன.

இப்படத்தில் ஜி, கிரீடம், மங்காத்தா, என்னை அறிந்தால் படங்களின் வரிசையில் நடிகர் அஜித் உடன் 5ஆவது முறையாக த்ரிஷா இணைவதாகவும் தகவல்கள் வெளியாகி வருகின்றன. 

விடாமுயற்சி திரைப்படம் ஜூன் மாதமே தொடங்கும் எனத் தகவல்கள் வெளியாகின. ஆனால் தொடர்ந்து  படப்பிடிப்பு பணிகள் பல்வேறு காரணங்களால் தள்ளிப்போய் வந்தன. இந்நிலையில் தற்போது இப்படத்தின் ஷூட்டிங் பணிகள் தொடங்கும் தேதி பற்றிய தகவல் வெளியாகி அஜித் ரசிகர்களை மகிழ்ச்சியில் ஆழ்த்தியுள்ளது.

அதன்படி, விடாமுயற்சி திரைப்படத்தின் படப்பிடிப்பு வரும் ஆகஸ்ட் 21ஆம் தேதி ஹைதராபாத்தில் தொடங்க உள்ளதாகவும், இதற்கான செட் அமைக்கும் பணிகள் தொடர்ந்து நடைபெற்று வருவதாகவும் சினிமா வட்டாரத்தில் தகவல்கள் பகிரப்பட்டு வருகின்றன.

நடிகர் அஜித் நடிப்பில் பொங்கல் வெளியீடாக வந்த துணிவு பட வெற்றியடைந்த நிலையில், அவரது அடுத்த படமான ஏகே 62 படத்தின் அப்டேட்டுகளை எதிர்நோக்கி ரசிகர்கள் தொடர்ந்து காத்திருந்து வருகின்றனர்.

இப்படத்தில் முதலில் இயக்குநர் விக்னேஷ் சிவன் ஒப்பந்தம் செய்யப்பட்டு பின் படத்தின் கதையில் திருதி இல்லாத காரணத்தால் லைகா நிறுவனம் அதிருப்தி தெரிவித்ததாகத் தகவல்கள் வெளியாகின. தொடர்ந்து இப்படத்தில் இருந்து விக்னேஷ சிவன் விலகிய தகவல் வெளியாகி கோலிவுட் வட்டாரத்தில் பரபரப்பை ஏற்படுத்தியுள்ளது.

தொடர்ந்து இந்த பரபரப்பு அடங்கியதும் மகிழ்திருமேனி இப்படத்தின் இணைந்த அறிவிப்பும், படத்தின் தலைப்பு விடாமுயற்சி என்ற அறிவிப்பும் வெளியானது. இதனிடையே நடிகர் அஜித் ‘ஏகே மோட்டோ ரைட்’ எனும் புதிய பைக் சுற்றுலா நிறுவனம் ஒன்றைத்  தொடங்கியதாக அதிகாரப்பூர்வத் தகவல்கள் வெளியாகின.

“இந்தியாவின் இயற்கை எழில் கொஞ்சும் நிலப்பரப்புகளில் மட்டுமல்லாமல்,  சர்வதேச சாலைகளிலும் பயணம் மேற்கொள்ள ஆர்வமுள்ள ரைடர்கள், சாகச ஆர்வலர்கள், பயண விரும்பிகளுக்கு ஏகே மோட்டோ ரைடு  நிறுவனம் சுற்றுப்பயணங்களை வழங்கும்” என அஜித்தின் மேனேஜர் சுரேஷ் சந்திரா அறிவித்திருந்தார். 

இந்நிலையில், இதன் காரணமாக விடாமுயற்சி படப்பிடிப்பு தாமதமாகுமோ என ரசிகர்கள் கவலைத் தெரிவித்து வந்த நிலையில், தற்போது படப்பிடிப்பு பற்றிய அப்டேட் வெளியாகியுள்ளது.