Ashes: கடைசி ஆஷஸ் டெஸ்ட் போட்டியை வென்று சமன் செய்யுமா இங்கிலாந்து?

Ashes 2023 : இருவரும் அரைசதம் விளாச அணியின் எண்ணிக்கை மளமளவென உயர்ந்தது. நான்காம் நாள் ஆட்ட முடிவில் ஆஸ்திரேலியா, விக்கெட் இழப்பின்றி 135 ரன்கள் எடுத்தது.

டேவிட் வார்னர்

ஆஷஸ் தொடரின் கடைசி டெஸ்ட் போட்டி தற்போது நடந்து வருகிறது. இதில் முதல் இன்னிங்ஸில் இங்கிலாந்து அணி 283 ரன்கள் எடுத்து ஆட்டமிழந்தது.

பின்னர் களமிறங்கி தனது முதல் இன்னிங்ஸை தொடங்கிய ஆஸ்திரேலியா, 295 ரன்கள் எடுத்து இங்கிலாந்தை விட 12 ரன்கள் முன்னிலையில் இருந்த போது அனைத்து விக்கெட்டையும் இழந்தது.

இதனை தொடர்ந்து மூன்றாவது நாள் ஆட்டத்தில் இங்கிலாந்து அணி 12 ரன்கள் பின்னடைவில் இருந்து, சிறப்பான ஆட்டத்தை வெளிப்படுத்தியது. மூன்றாம் நாள் முடிவில் 9 விக்கெட்டுக்கு 389 ரன்கள் எடுத்தது இங்கிலாந்து.

நேற்று நடந்த நான்காம் நாள் ஆட்டத்தை ஸ்டூவர்ட் பிராட் மற்றும் ஜேம்ஸ் ஆண்டர்சன் தொடங்கினர். 395 ரன்கள் எடுத்தபோது ஜேம்ஸ் ஆண்டர்சன் அவுட் ஆனார். இதன் மூலம் ஆஸ்திரேலியா அணிக்கு 384 ரன்கள் வெற்றி இலக்காக நிர்ணயிக்கப்பட்டது.

ஆஸ்திரேலிய அணியின் தொடக்க ஆட்டக்காரர்களாக வார்னர் மற்றும் கவாஜா களமிறங்கினர். இருவரும் சிறப்பான தொடக்கத்தை தந்ததால் ஆஸ்திரேலியா ரசிகர்களுக்கு கொண்டாட்டமாக இருந்தது.

இருவரும் அரைசதம் விளாச அணியின் எண்ணிக்கை மளமளவென உயர்ந்தது. நான்காம் நாள் ஆட்ட முடிவில் ஆஸ்திரேலியா, விக்கெட் இழப்பின்றி 135 ரன்கள் எடுத்தது. கடைசி நாளான இன்று 249 ரன்கள் எடுத்தால் ஆஸ்திரேலியா அணி வெற்றியை ருசிக்கலாம்.