தருமபுர ஆதீன கலைக்கல்லூரி பவளவிழாவில் முதல்வர் பங்கேற்பு; விழா ஏற்பாடுகள் தீவிரம்

மயிலாடுதுறையில் வருகின்ற 24 -ம் தேதி தருமபுர ஆதீன கலைக்கல்லூரி பவளவிழா நிறைவு விழாவில் முதலமைச்சர் ஸ்டாலின் பங்கேற்க உள்ளதால் விழா ஏற்பாடுகள் தீவிரமாக நடைபெற்று வருகிறது.

தருமபுரம் ஆதீனத்தை சந்திக்கும் அமைச்சர் மெய்யநாதன்

மயிலாடுதுறையில் சைவத்தையும் தமிழையும் பரப்பும் தொன்மை வாய்ந்த தருமபுரம் ஆதீன திருமடம் அமைந்துள்ளது. இவ்வாதீனத்தால் 1946 -ஆம் ஆண்டு தொடங்கப்பட்ட கலைக்கல்லூரி தருமபுரம் ஆதீனத்திற்கு எதிரே செயல்பட்டு வருகிறது. இக்கல்லூரி தமிழ் கல்லூரியாக தொடங்கப்பட்டு 1988 -ஆம் ஆண்டு கலைக்கல்லூரியாக வளர்ச்சி பெற்றது.  அதனைத் தொடர்ந்து தற்போது கல்லூரியின் 75-ம் ஆண்டு பவள விழா ஆண்டாக கொண்டாடப்பட்டு வருகிறது. பவளவிழாவை முன்னிட்டு கல்லூரி வளாகத்தில் 3000 பேர் அமரும் வகையில் 80 அடி அகலமும் 220 அடி நீளமும்  கொண்ட பிரமாண்ட கலையரங்கம் கட்டப்பட்டு  10 லட்சம் ரூபாய் மதிப்பீட்டில் 12 அடி நீளம் கொண்ட 5 ராட்சச மின்விசிறிகள் அமைக்கப்பட்டுள்ளது.

இந்நிலையில் இந்த கலையரங்கத்தை தமிழ்நாடு முதலமைச்சர் மு.க.ஸ்டாலின் வருகின்ற 24 -ம் தேதி (நாளை) மாலை நேரில் திறந்து வைக்க உள்ளார் என தருமபுரம் ஆதீன 27 -வது மடாதிபதி ஸ்ரீலஸ்ரீ மாசிலாமணி தேசிக ஞானசம்பந்த பிரம்மச்சாரிய சுவாமிகள் தெரிவித்துள்ளார். மேலும், தருமையாதீன தொலைக்காட்சி, வானொளி பதிவகத்தை திறந்து வைத்தும் பவளவிழா மலர் மற்றும் திருக்குறள் ஆதீன உரை விளக்க நூல்களை வெளியிட்டு முதலமைச்சர் மு.க.ஸ்டாலின் சிறப்புரையாற்ற உள்ளார்.  

தமிழ்நாடு முதலமைச்சர் மு.க.ஸ்டாலின் வருகை தர உள்ளதால் விழா ஏற்பாடுகள் குறித்து சுற்றுசூழல் மற்றும் காலநிலை மாற்றத்துறை அமைச்சர் மெய்யநாதன் தருமபுரம் ஆதீனம் கல்லூரியில் ஆய்வு செய்தார். தருமபுரம் ஆதீன கர்த்தரை சந்தித்து விழா முன்னேற்பாடுகள் குறித்து கலந்தாலோசனை செய்தார். அப்போது மயிலாடுதுறை திமுக மாவட்ட செயலாளரும், பூம்புகார் சட்டமன்ற உறுப்பினருமான  நிவேதா எம்.முருகன், சீர்காழி சட்டமன்ற உறுப்பினர் பன்னீர்செல்வம் மற்றும் திமுக நிர்வாகிகள் பலர் உடனிருந்தனர்.

25 வது ஆதீனம் காலத்தில் தமிழ் கல்லூரியாக தொடங்கப்பட்டு 26வது சன்னிதானம் காலத்தில் கலைக்கல்லூரியாக மாற்றப்பட்டு நடைபெற்று வருகிறது. இந்த கல்லூரியின் வெள்ளிவிழா ஆண்டில் அப்போதைய முதல்வர் கலைஞர் கருணாநிதி பங்கேற்றார். பொன்விழா ஆண்டில் அப்போதைய கல்வித்துறை அமைச்சர் அன்பழகன், கோசிமணி பங்கேற்றனர். தற்போது 75 வது பவளவிழா ஆண்டில் முதலமைச்சர் கலந்து கொள்வது சிறப்புக்குறியது என்றும்,  அனைவரும் இவ்விழாவில் கலந்து கொள்ள வேண்டும் என தருமபுரம் ஆதீனம் 27 ஆவது குரு மகா சன்னிதானம் ஸ்ரீலஸ்ரீ மாசிலாமணி தேசிக ஞானசம்பந்த பரமாச்சாரியார் சுவாமிகள் தெரிவித்தார்.