பூம்புகாரில் நாளை மகளிர் மாநாடு: ராமதாஸ் தலைமையில் பாமக! முக்கிய தீர்மானங்கள் என்னென்ன?
பாமகவில் ராமதாஸ் மற்றும் அன்புமணி ராமதாஸ் இடையே கருத்து வேறுபாடு நிலவி வரும் நிலையில், பூம்புகாரில் நடைபெற உள்ள வன்னியர் சங்க மகளிர் மாநாடு அரசியலில் பெரும் எதிர்பார்ப்பை ஏற்படுத்தியுள்ளது.
மயிலாடுதுறை மாவட்டம், சீர்காழி அருகே உள்ள பூம்புகாரில் பாட்டாளி மக்கள் கட்சியின் சார்பில், அதன் நிறுவனர் மருத்துவர் ராமதாஸ் தலைமையில் நாளை (ஆகஸ்ட் 10) மகளிர் மாநாடு நடைபெற உள்ளது. இதற்கான இறுதிக்கட்ட ஏற்பாடுகள் முழுவீச்சில் நடைபெற்று வருகின்றன. பிரம்மாண்ட பந்தல்கள் அமைப்பது, மேடை அலங்காரம், ஒலி மற்றும் ஒளி அமைப்புகள் உள்ளிட்ட பணிகள் வேகமாக நடந்து வருகின்றன. இந்தப் பணிகளைப் பா.ம.க.வின் கௌரவத் தலைவர் ஜி.கே. மணி நேரில் பார்வையிட்டார்.
மாநாட்டின் நோக்கம்
பணிகளை ஆய்வு செய்த பின்னர் செய்தியாளர்களைச் சந்தித்த ஜி.கே. மணி, இந்த மாநாட்டின் முக்கிய நோக்கம் குறித்து விரிவாக செய்தியாளர்களிடம் பேசினார். அப்போது அவர் கூறுகையில் "இது வன்னியர் சங்கத்தின் மகளிர் பெருவிழாவாக நாளை மதியம் 3 மணிக்குத் தொடங்க உள்ளது. பெண்களைப் போற்றுவது, குடும்பத்தின் வாழ்வை மேம்படுத்துவது, போதைப்பொருள் பயன்பாட்டை முற்றிலுமாக ஒழிப்பது போன்ற சமூகப் பொறுப்புகளை மையமாக வைத்தே இந்த மாநாடு நடத்தப்படுகிறது.
இந்த மாநாட்டில் லட்சக்கணக்கான பெண்கள் கலந்துகொள்வார்கள் என எதிர்பார்க்கிறோம். கண்ணகி மற்றும் கோவலனின் பெருமையைப் போற்றும் வகையில், பல்வேறு நாடகங்கள் மற்றும் கலை நிகழ்ச்சிகள் ஏற்பாடு செய்யப்பட்டுள்ளன" என்றார்.
முக்கியத் தீர்மானங்கள்
இந்த மாநாட்டில் பல முக்கியத் தீர்மானங்கள் முன்வைக்கப்படவுள்ளதாக ஜி.கே. மணி தெரிவித்தார். அதில், குறிப்பாக, "வன்னியர்களுக்கு 10.5 சதவீத இடஒதுக்கீடு, அனைத்து சமூகங்களுக்கும் உரிய இடஒதுக்கீடு வழங்குதல், மற்றும் சாதிவாரி கணக்கெடுப்பு நடத்துதல்" ஆகியவை முக்கியத்துவம் என்றும், இந்தத் தீர்மானங்கள் சமூக நீதியை நிலைநிறுத்துவதற்கும், அனைத்து தரப்பு மக்களின் முன்னேற்றத்திற்கும் வழிவகுக்கும் என்று அவர் நம்பிக்கை தெரிவித்தார்.
போக்குவரத்து மற்றும் பாதுகாப்பு ஏற்பாடுகள்
மாநாட்டிற்கு வருகை தரும் மக்களின் வசதிக்காக விரிவான ஏற்பாடுகள் செய்யப்பட்டுள்ளன. வட தமிழகத்தில் இருந்து வருபவர்கள் சீர்காழி மற்றும் திருவெண்காடு வழியாகவும், டெல்டா மாவட்டங்களில் இருந்து வருபவர்கள் மயிலாடுதுறை, ஆக்கூர் மற்றும் முக்கூட்டு வழியாகவும் பூம்புகாருக்குச் செல்வதற்கான வழித்தடங்கள் அமைக்கப்பட்டுள்ளன. பெண்கள் அதிக அளவில் பங்கேற்பதால், அவர்களுக்குத் தேவையான சிறப்புப் பாதுகாப்பு ஏற்பாடுகள் செய்யப்பட்டுள்ளதாகவும், காவல்துறை அனுமதி அளித்துள்ள நிபந்தனைகளின்படி, அமைதியான முறையில் மாநாடு நடத்தப்படும் என்றும் அவர் உறுதியளித்தார்.
அன்புமணி ராமதாஸ் குறித்த கேள்வி
பா.ம.க.வின் பொதுக்குழுவை நடத்த அன்புமணி ராமதாஸுக்கு நீதிமன்றம் அனுமதி அளித்திருப்பது குறித்த கேள்விக்கு பதிலளித்த ஜி.கே. மணி, "நீதிமன்றத் தீர்ப்புக் குறித்து நாங்கள் கருத்து சொல்ல முடியாது," என்றார். அவர் மேலும் பேசுகையில், "பாட்டாளி மக்கள் கட்சி ஒரு வலிமையான கட்சி. மருத்துவர் ராமதாஸ் கடந்த 46 ஆண்டுகளாகக் கட்சி வளர்ச்சிக்காக உழைத்துள்ளார். அன்புமணி ராமதாஸை முன்னிலைப்படுத்தி கட்சி அனைவரும் இணைந்து செயல்பட வேண்டும். அதற்கு மருத்துவர் ராமதாஸும், அன்புமணி ராமதாஸும் இணைந்து பேச வேண்டும் என நாங்களும் விரும்புகிறோம்," என்று அவர் கூறினார்.
மொத்தத்தில், பூம்புகாரில் நடைபெறும் இந்த மகளிர் மாநாடு, பா.ம.க.வின் அரசியல் மற்றும் சமூக நிலைப்பாடுகளைத் தெளிவுபடுத்தும் ஒரு முக்கிய நிகழ்வாகப் பார்க்கப்படுகிறது. மாநிலம் முழுவதும் இருந்து திரண்டு வரும் பெண்கள், கட்சிக்கு மேலும் பலம் சேர்க்கும் என எதிர்பார்க்கப்படுகிறது.
தலைப்பு செய்திகள்
ட்ரெண்டிங் செய்திகள்
