"மயிலாடுதுறை பயணிகளுக்கு குட் நியூஸ்! நவீன வசதிகளுடன் திறக்கப்பட்ட காமராஜர் பேருந்து நிலையம் - முழு விவரம்."
மயிலாடுதுறை நகராட்சியில் ரூ.29.01 கோடி மதிப்பீட்டில் கட்டப்பட்டுள்ள பெருந்தலைவர் காமராஜர் புதிய பேருந்து நிலையத்தை முதல்வர் மு.க.ஸ்டாலின் காணொளி வாயிலாகத் திறந்து வைத்தார்.
மயிலாடுதுறை: மயிலாடுதுறை மாவட்ட மக்களின் பல ஆண்டுகால கனவை நனவாக்கும் வகையில், நகராட்சி நிர்வாகம் மற்றும் குடிநீர் வழங்கல் துறை சார்பில் நவீன வசதிகளுடன் கட்டப்பட்டுள்ள 'பெருந்தலைவர் காமராஜர் புதிய பேருந்து நிலையத்தை' தமிழ்நாடு முதலமைச்சர் மு.க.ஸ்டாலின் இன்று காணொளி காட்சி வாயிலாகத் திறந்து வைத்தார்.
அமைச்சர் கொடியசைத்து தொடக்கம்
மயிலாடுதுறை புதிய பேருந்து நிலைய வளாகத்தில் நடைபெற்ற விழாவில், பிற்படுத்தப்பட்டோர் நலத்துறை அமைச்சர் சிவ.வீ. மெய்யநாதன் கலந்துகொண்டு குத்துவிளக்கேற்றி வைத்தார். பின்னர், புதிய பேருந்து நிலையத்திலிருந்து பேருந்துகளின் இயக்கத்தைப் பச்சைக்கொடி அசைத்துத் தொடங்கி வைத்தார். மாவட்ட ஆட்சியர் ஹெச்.எஸ். ஸ்ரீகாந்த் தலைமையில் நடைபெற்ற இந்த விழாவில், பூம்புகார் சட்டமன்ற உறுப்பினர் நிவேதா எம். முருகன் மற்றும் மயிலாடுதுறை சட்டமன்ற உறுப்பினர் எஸ். ராஜகுமார் ஆகியோர் முன்னிலை வகித்தனர்.
மயிலாடுதுறையின் வளர்ச்சித் திட்டங்கள்
விழாவில் அமைச்சர் சிவ.வீ. மெய்யநாதன் ஆற்றிய உரையில் குறிப்பிட்டதாவது:
"மயிலாடுதுறை மாவட்டத்தின் வளர்ச்சிக்கு முதலமைச்சர் மிகுந்த முக்கியத்துவம் அளித்து வருகிறார்கள். ரூ.46 கோடி மதிப்பீட்டில் மாவட்ட அரசு தலைமை மருத்துவமனை கூடுதல் கட்டிடம், புதிய வருவாய் கோட்டாட்சியர் அலுவலகம் எனப் பல்வேறு திட்டங்கள் நிறைவேற்றப்பட்டுள்ளன. குறிப்பாக, மாவட்ட மக்களின் நீண்ட நாள் கோரிக்கையான மயிலாடுதுறை புறவழிச்சாலை பணிகள் ரூ.185.35 கோடி மதிப்பீட்டில் விறுவிறுப்பாக நடைபெற்று வருகின்றன.
கடற்கரை மீனவ கிராமங்களின் முன்னேற்றத்திற்காக மீன்பிடித் துறைமுகங்கள் மேம்பாடு மற்றும் கடல்நீர் உட்புகுவதைத் தடுக்கும் பணிகள் என ரூ.1500 கோடிக்கும் மேலான திட்டங்கள் செயல்படுத்தப்பட்டுள்ளன.
ஆறுபாதி கிராமத்தில் நிலத்தடி நீர் மாசுபாட்டைத் தடுக்க ரூ.19 கோடி மதிப்பீட்டில் 10 ஆண்டு பராமரிப்புச் செலவுடன் கூடிய குடிநீர் சுத்திகரிப்பு நிலையம் அமைக்கப்பட்டு வருகிறது. விரைவில் மயிலாடுதுறை நகராட்சியில் பாதாள சாக்கடைத் திட்டமும் செயல்படுத்தப்பட உள்ளது" எனத் தெரிவித்தார்.
புதிய பேருந்து நிலையத்தின் சிறப்பம்சங்கள்
ரூ.29.01 கோடி மதிப்பீட்டில் கட்டப்பட்டுள்ள இந்தப் புதிய பேருந்து நிலையத்தில் பின்வரும் வசதிகள் செய்யப்பட்டுள்ளன:
* பேருந்து வசதிகள்: 28 பேருந்துகள் ஒரே நேரத்தில் நிற்கும் வசதி மற்றும் 1000 மீட்டர் நீளமுள்ள விசாலமான சாலைகள்.
* வணிக வசதிகள்: 49 கடைகள், 2 உணவகங்கள் மற்றும் ஏடிஎம் (ATM) மையம்.
* பயணிகள் நலன்: 10 காத்திருப்பு அறைகள், தாய்மார்கள் பாலூட்டும் 2 தனி அறைகள் மற்றும் சுத்திகரிக்கப்பட்ட குடிநீர் வசதி.
* நிர்வாகம்: போக்குவரத்துத் துறை முன்பதிவு மையம், 2 நேரக் காப்பாளர் அறைகள், போலீஸ் புறக்காவல் நிலையம் மற்றும் நவீன கட்டுப்பாட்டு அறை.
*சுகாதாரம்: ஆண்கள் மற்றும் பெண்களுக்குத் தனித்தனியே தலா 16 இருக்கைகள் கொண்ட நவீன கழிப்பறைகள் மற்றும் மாற்றுத் திறனாளிகளுக்கான பிரத்யேக கழிப்பறை வசதிகள்.
மேலும், இருசக்கர வாகன நிறுத்துமிடம், மேற்கூரைகள், நவீன இருக்கைகள் மற்றும் பாதுகாப்புச் சுற்றுச்சுவர் என அனைத்து உட்கட்டமைப்பு வசதிகளும் போர்க்கால அடிப்படையில் முடிக்கப்பட்டு மக்கள் பயன்பாட்டிற்குக் கொண்டு வரப்பட்டுள்ளன.
இந்நிகழ்ச்சியில் கூடுதல் ஆட்சியர் (வளர்ச்சி) கோகுல், மாவட்ட வருவாய் அலுவலர் ஆர். பூங்கொடி, நகர்மன்றத் தலைவர் செல்வராஜ், நகராட்சி ஆணையர் வீரமுத்துக்குமார் உள்ளிட்ட அரசு அலுவலர்கள் மற்றும் உள்ளாட்சிப் பிரதிநிதிகள் பெருந்திரளாகக் கலந்துகொண்டனர். இந்தப் புதிய பேருந்து நிலையம் திறக்கப்பட்டதன் மூலம் மயிலாடுதுறை நகரின் போக்குவரத்து நெரிசல் குறைவதோடு, பொதுமக்களின் பயண அனுபவம் இனிமையாக அமையும் என எதிர்பார்க்கப்படுகிறது.
தலைப்பு செய்திகள்
ட்ரெண்டிங் செய்திகள்
