கோவையில் ஜல்லிக்கட்டு போட்டிகள் ; சீறிப்பாயும் காளைகளை அடக்கும் மாடுபிடி வீரர்கள்..

ஜல்லிக்கட்டு போட்டிகளில் பல்வேறு மாவட்டங்களை சேர்ந்த 700 காளைகளும், 300 மாடுபிடி வீரர்களும் பங்கேற்றுள்ளனர். வாடிவாசலில் இருந்து சீறிப் பாய்ந்து வரும் காளைகளை அடக்க காளையர்கள் மல்லுக்கட்டினர்.

காளையை அடக்க முயலும் வீரர்கள்

கோவையில் நடைபெற்று வரும் ஜல்லிக்கட்டு போட்டியில் சீறிப்பாய்ந்து வரும் காளைகளை அடக்க மாடுபிடி வீரர்கள் மல்லுக்கட்டி வருகின்றனர்.

கடந்த 2017 ம் ஆண்டு ஜல்லிக்கட்டு போட்டிகள் மீது விதிக்கப்பட்ட தடையை நீக்க கோரி, மாநிலம் முழுவதும் தொடர் போராட்டங்கள் நடைபெற்றன. அதன் ஒரு பகுதியாக கோவையிலும் போராட்டங்கள் நடத்தப்பட்டன. இதனைத் தொடர்ந்து ஜல்லிக்கட்டு மீதான தடை நீக்கப்பட்டதில் இருந்து, கோவை மாவட்டத்தில் ஆண்டுதோறும் பொங்கல் பண்டிகைக்கு பின்னர், ஜல்லிக்கட்டு போட்டிகள் நடத்தப்பட்டு வருகின்றன.  கடந்த 9 ம் தேதியன்று கோவையில் ஜல்லிக்கட்டு போட்டிகள் நடைபெறும் என அறிவிக்கப்பட்டு இருந்த நிலையில், கொரோனா தொற்று பரவல் காரணமாக ஒத்திவைக்கப்பட்டது.

கோவை மாவட்டம் செட்டிபாளையம் பகுதியில் ஐந்தாவது ஆண்டாக இன்று ஜல்லிக்கட்டு போட்டிகள் நடைபெற்று வருகின்றன. கோவை மாவட்ட நிர்வாகம் மற்றும் கோவை  மாவட்ட ஜல்லிக்கட்டு பேரவையும் இணைந்து ஜல்லிக்கட்டு போட்டிகளை நடத்துகின்றன. இப்போட்டிகளை மின்சாரத் துறை அமைச்சர் செந்தில்பாலாஜி கொடியசைத்து துவக்கி வைத்தார். மாடிபிடி வீரர்களின் உறுதிமொழி ஏற்றுக்கொண்டு போட்டிகளில் பங்கேற்றனர். ஜல்லிக்கட்டு போட்டிகளில் பல்வேறு மாவட்டங்களை சேர்ந்த 700 காளைகளும், 300 மாடுபிடி வீரர்களும் பங்கேற்றுள்ளனர். வாடிவாசலில் இருந்து சீறிப் பாய்ந்து வரும் காளைகளை அடக்க காளையர்கள் மல்லுக்கட்டினர். காளைகளை அடக்கிய காளையர்களுக்கும், பிடிபடாத மாடுகளின் உரிமையாளர்களுக்கும் பரிசுகள் வழங்கப்பட உள்ளன.  ஜல்லிக்கட்டு போட்டிகளின் முதல் சுற்று முடிவில் 12 பேர் மாடுகளை பிடித்து அசத்தியுள்ளனர்.

இதனிடயே கொரோனா தொற்று பரவல் காரணமாக ஜல்லிக்கட்டு போட்டிகளுக்கு பல்வேறு கட்டுப்பாடுகள் விதிக்கப்பட்டுள்ளன. மாடுகளுடன் வருபவர்களும், மாடு பிடி வீரர்களும் 2 தவணை கொரோனா தடுப்பூசி செலுத்திய சான்ற்தழ் மற்றும் 24 மணி நேரத்திற்குள் எடுக்கப்பட்ட கொரோனா பரிசோதனை சான்றிதழ் ஆகியவை கொண்டு வர வேண்டும் என அறிவுறுத்தப்பட்டுள்ளது. இச்சான்றிதழ்களை சரிபார்த்த பின்னரே போட்டிகள் நடைபெறும் பகுதிக்கு அனுமதிக்கப்பட்டன. மேலும் கொரோனா தொற்று பரவலைத் தடுக்கும் வகையில், பார்வையாளர்களுக்கு அனுமதி மறுக்கப்பட்டுள்ளது. தொலைக்காட்சிகள் மற்றும் செய்தி இணையதளங்கள் மூலம் ஜல்லிக்கட்டு போட்டிகள் நேரடி ஒளிபரப்பு செய்யப்பட்டு வருகின்றன. பொது மக்கள் வீடுகளில் இருந்து ஜல்லிக்கட்டு போட்டிகளை கண்டு ரசிக்குமாறு மாவட்ட நிர்வாகம் தெரிவித்துள்ளது. ஜல்லிக்கட்டு போட்டிகளை ஓட்டி அப்பகுதியில் 2 ஆயிரம் காவல் துறையினர் பாதுகாப்பு பணியில் ஈடுபடுத்தப்பட்டுள்ளனர்.

மேலும் செய்திகளை அறிய :ABP நாடு செய்திகளை Google News -ல் பின் தொடர இங்கே கிளிக் செய்யவும்

பேஸ்புக் பக்கத்தில் தொடர

ட்விட்டர் பக்கத்தில் தொடர

யூடிபில் வீடியோக்களை காண