தொழிற்சாலையில் விஷ வாயு தாக்கி ஒருவர் பலி; இருவர் கவலைக்கிடம்!

தொட்டியில் இருந்த விஷவாயு கசிந்து ரமேஷ் மூச்சு திணறி உதவிக்காக அலறியுள்ளார். அவருக்கு உதவி செய்ய கழிவு நீர் தொட்டியில் இறங்கிய அவருடைய சக தொழிலாளர்கள் ரத்தினம் (60 ) மற்றும் பிரசாந்த்  (27 ) ஆகிய இருவரையும்   விஷவாயு தாக்கியது .

ரமேஷ் 55

ஆம்பூர் அருகே  தனியார் தோல் தொழிற்சாலையில் பணியின்போது  விஷவாயு தாக்கி தொழிலாளர் ஒருவர் உயிரிழப்பு , மேலும் 2 பேர் கவலைக்கிடம் தொழிற்சாலையில் மாவட்ட காவல் கண்காணிப்பாளர் ஆய்வு.
 
திருப்பத்தூர் மாவட்டம் ஆம்பூர் மற்றும் அதன் சுற்றுவட்டார பகுதிகளில் பல தனியார்  தோல் தொழிற்சாலைகளும் , தோல்பதனிடும் தொழிற்சாலைகளும் இயங்கி வருகின்றது .

இதேபோல் ஆம்பூர் அடுத்த  துத்திப்பட்டு கிராமத்தில் NMH என்ற பெயரில் ஒரு தனியார் தோல் பதனிடும் தொழிற்சாலை இயங்கி வருகிறது. இதில் 100க்கும் மேற்பட்ட ஊழியர்கள் பணிபுரிந்து வருகின்றனர் .

 இந்நிலையில் இன்று தொழிற்சாலையில் பணியின்போது கழிவுநீர் தொட்டியில் அடைப்பு ஏற்பட்டுள்ளது . இதனை சுத்தம் செய்யும் பணியை  புத்தூர் பகுதியை சேர்ந்த ரமேஷ் (55 ) என்பவருக்கு அளிக்கப்பட்டு  அவர்  கழிவுநீர் தொட்டியில் ஏற்பட்டுள்ள அடைப்பை எடுப்பதற்காக  தொட்டிக்குள் இறக்கி விடப்பட்டுள்ளார்.

அப்பொழுது துரதிஷ்டவசமாக  தொட்டியில் இருந்த விஷவாயு கசிந்து ரமேஷ் மூச்சு திணறி உதவிக்காக அலறியுள்ளார் . அவரது அலறல் சத்தத்தை  கேட்டு அவருக்கு உதவிசெய்வதற்காக கழிவு நீர் தொட்டியில் இறங்க  அவருடைய சக தொழிலாளர்கள் , புத்தூர் கிராமத்தை சேர்ந்த  ரத்தினம் (60 ) மற்றும் மோதகபள்ளி பகுதியை சேர்ந்த பிரசாந்த்  (27 ) ஆகிய இருவரையும்   விஷவாயு தாக்கியது . கவலைக்கிடமான நிலையில் மூவரையும் ஆம்பூரில் உள்ள தனியார் மருத்துவமனையில் அனுமதிக்கப்பட்டனர் .

இதில் சிகிச்சை பலனின்றி ரமேஷ் பரிதாபமாக உயிர் இழந்தார் , மேலும் பிரஷாந்த் மற்றும் ரத்தினத்துக்கு , வேலூர் மற்றும் ஆம்பூர் பகுதியில் உள்ள தனியார் மருத்துவமனைகளில் தீவிர சிகிச்சை அளிக்கப்பட்டு வருகின்றது .

தகவலின் பேரில் திருப்பத்தூர் மாவட்ட காவல் கண்காணிப்பாளர் சிபி சக்கரவர்த்தி தலைமையில் , உமராபாத் காவல் நிலைய போலீசார் அந்த தனியார் தோல் பதனிடும் தொழிற்சாலைக்கு விரைந்து சென்று  விசாரணை மேற்கொண்டு வருகின்றனர் .

இது தொடர்பாக , தமிழ் நாடு தொழிற்சங்க நடுவனத்தின் மாநில பொதுச்செயலாளர் செ ரூபனை தொடர்பு கொண்ட பொழுது , ஒருங்கிணைந்த வேலூர் மாவட்டத்தில் 1500 கும் மேற்பட்ட தோல் தொழிற்சாலைகள் மற்றும் தோல் பதனிடும் தொழிற்சாலைகள் செயல்பட்டு வருகின்றது , இதில் பெரும்பாலான தொழிற்சாலைகளில் , தொழிலாளர்களுக்கு தேவையான பாதுகாப்பு உடைகள் மற்றும் கருவிகளை வழங்குவதில்லை  .

தொழிற்சாலை முதலாளிகளின் இந்த அலட்சியப்போக்கினால் , வருடாவருடம் பல தொழிலாளர்கள் உயிர் பறிபோககின்றது . இதுபோன்ற உயிர் இழப்புகள் ஏற்படாத வண்ணம், தொழிற்சாலைகளில் போதிய பாதுகாப்புகளை உறுதி செய்யவேண்டும் என்றும் , இறந்துபோன தொழிலார் ரமேஷுக்கு தகுந்த இழப்பீடு வழங்கவேண்டும் என்றும் , உடனடியாக சம்பவம் நடந்த தொழிற்சாலையில்  மாவட்ட தொழிலக பாதுகாப்பு மைய அதிகாரிகள் ஆய்வு செய்து அறிக்கை அளிக்க வேண்டும் என்றும் எங்கள்  தமிழ் நாடு தொழிற்சங்க நடுவனத்தின் சார்பாக கேட்டுக்கொள்கிறேன் என்று தெரிவித்தார் .