Phoenix Veezhan Teaser: விஜய் சேதுபதி மகன் சூர்யாவின் பீனிக்ஸ் விழான்! டீசர் எப்படி இருக்குது? குட்டி விமர்சனம்!

பிரபல நடிகர் விஜய் சேதுபதி மகன் சூர்யா நாயகனாக அறிமுகமாகியுள்ள பீனிக்ஸ் வீழான் படத்தின் டீசர் இன்று வெளியாகியுள்ளது.

விஜய் சேதுபதியும், அவரது மகனும் - அனல் அரசுடன் விஜய்சேதுபதி மகன் சூர்யா

தமிழ் திரையுலகின் முன்னணி நடிகர்களில் ஒருவர் விஜய் சேதுபதி. இவரது மகன் சூர்யா. இவர் ஏற்கனவே விஜய்சேதுபதியுடன் இணைந்து சிந்துபாத் என்ற படத்தின் மூலமாக அறிமுகமானார். இந்த நிலையில், விஜய் சேதுபதி மகன் சூர்யா கதாநாயகனாக அறிமுகமாகும் பீனிக்ஸ் வீழான் என்ற படம் உருவாகியுள்ளது.

விஜய் சேதுபதி மகனின் பீனிக்ஸ் வீழான்:

பிரபல ஸ்டன்ட் மாஸ்டர் அனல் அரசு இயக்கியுள்ள இந்த படத்தின் டீசர் இன்று வெளியாகியுள்ளது. நாயகனாக அறிமுகமாகியுள்ள முதல் படமே ரத்தம் தெறிக்க விஜய் சேதுபதி மகன் இந்த படத்தில் களமிறங்கியுள்ளார். டீசரின் தொடக்க காட்சியே சிறுவர் சீர்த்திருத்த சிறையுடன் தொடங்குகிறது. கையில் விலங்குடன் குற்றவாளியாக சீர்த்திருத்த பள்ளியில் முகத்தை மூடிய நிலையில் விஜய் சேதுபதி மகன் சூர்யாவின் அறிமுகம் உள்ளது.

எப்படி இருக்குது டீசர்?

அந்த காட்சியே இந்த படம் முழுக்க முழுக்க ஆக்‌ஷன் படம் என்பதை உணர்த்துகிறது. அதற்கு அடுத்த காட்சியிலே சூர்யாவின் சண்டை காட்சிகளும், அவர் பாக்ஸிங் வீரர் என்பதற்கான காட்சிகளும் காட்டப்படுகிறது. பாக்ஸிங் காட்சிகளுக்காக ஒரு பாக்ஸிங் வீரரைப் போல சூர்யா உழைத்திருக்கிறார் என்பதை அந்த காட்சி நமக்கு நன்றாகவே உணர்த்துகிறது. சூர்யாவின் வேகமான பஞ்ச்கள் அவரது உழைப்பை காட்டுகிறது.

படத்தின் பாதி டீசரிலே ஒரு பாக்ஸிங் வீரரின் கதை என்பது மிக நன்றாக நமக்கு தெரிகிறது. படத்தில் அதிகளவு ரத்தமும், வன்முறையும் உள்ளது என்பதை படத்தின் டீசர் நமக்கு சொல்கிறது. இந்த டீசரில் விஜய் சேதுபதியின் மகன் சூர்யா ண்ணோவ்.. உங்களுக்கு இது வெறும் கேம். எங்களுக்கு இது லைஃப் என்று பேசும் ஒரு வசனம் உள்ளது. சூர்யாவின் கண்கள் அப்படியே விஜய் சேதுபதியின் சாயலில் இருப்பது அவருக்கு மிகப்பெரிய பலமாக உள்ளது.

யார்? யார்? நடிகர்கள்:

இருப்பினும், ரத்தம், பாக்ஸிங் என்று உருவாகியுள்ள இந்த பீனிக்ஸ் வீழான் அனைத்து தரப்பு மக்களையும் கட்டிப்போடுமா? என்பது படம் வெளியான பிறகே தெரிய வரும். இந்த படத்தில் சூர்யாவுடன் இணைந்து வரலட்சுமி சரத்குமார், நடிகர் சம்பத், நடிகை தேவதர்ஷினி ஆகியோரும் நடித்துள்ளனர்.

படத்தில் வரலட்சுமிக்கும், சம்பத்துக்கும் மிகவும் முக்கியமான கதாபாத்திரம் என்பது டீசரிலே நன்றாக தெரிகிறது. சாம் சி.எஸ். இசையமைத்துள்ள இந்த படத்தை ஏகே ப்ரேவ்மேன் பிக்சர்ஸ் சார்பில் ராஜலட்சுமி அனல் அரசு தயாரித்துள்ளார். இந்த படத்திற்கு வேல்ராஜ் ஒளிப்பதிவு செய்துள்ளார். பிரபல தொகுப்பாளர் பிரவீன் எடிட் செய்துள்ளார். இயக்குனராக அவதாரம் எடுத்துள்ள சண்டைப் பயிற்சியாளர் அனல் அரசே இந்த படத்திற்கு சண்டைப் பயிற்சியாளராகவும் பணியாற்றியுள்ளார்.

கதாநாயகனாக அறிமுகமாகியுள்ள முதல் படமே முழுக்க முழுக்க ரத்தம் தெறிக்கும் ஆக்‌ஷன் படமாக சூர்யா தேர்வு செய்துள்ளார். இது அவருக்கு கைகொடுக்குமா? என்பது படம் வெளியான பிறகே தெரிய வரும்.