AK Moto Ride: 'ஏகே மோட்டோ ரைடு’ ... சுற்றுலா நிறுவனத்தை தொடங்கிய நடிகர் அஜித்.. ஆச்சரியத்தில் கோலிவுட்..!

நடிகர் அஜித்குமார்(Ajith Kumar) புதிதாக பைக் சுற்றுலா நிறுவனம் ஒன்றை தொடங்கியுள்ளதாக அவரது மேலாளர் சுரேஷ் சந்திரா ட்வீட் செய்துள்ளார். 

நடிகர் அஜித்குமார்

நடிகர் அஜித்குமார்(Actor Ajith Kumar) புதிதாக பைக் சுற்றுலா நிறுவனம் ஒன்றை தொடங்கியுள்ளதாக அவரது மேலாளர் சுரேஷ் சந்திரா ட்வீட் செய்துள்ளார். 

தமிழ் சினிமாவில் முன்னணி நடிகராக உள்ள நடிகர் அஜித் அடுத்ததாக இயக்குநர் மகிழ்திருமேனி இயக்கும் “விடாமுயற்சி” படத்தில் நடிக்க உள்ளார். இந்த படத்தின் ஷூட்டிங் விரைவில் தொடங்க உள்ளது. இதற்கிடையில்ன் பைக் பயணங்களில் ஆர்வம் கொண்ட அவர், முன்னதாக நடித்த துணிவு பட ஷூட்டிங்கின் போது  ஐரோப்பிய நாடுகளுக்கு பைக்கில் சுற்றுப்பயணம் மேற்கொண்டார். 

தொடர்ந்து லடாக் பயணத்தை மேற்கொண்டார்.  இதன் புகைப்படங்கள், வீடியோக்கள் இணையத்தில் வைரலானது. இதன்பின்னர் தான் விடாமுயற்சி பட அறிவிப்பு வெளியானது. இதனைத் தொடர்ந்து, அஜித் மேனேஜர் சுரேஷ் சந்திரா ட்வீட் ஒன்றை வெளியிட்டார். அதில், ”லைகா நிறுவனம் தயாரிக்கும் தனது அடுத்த படத்துக்கு பிறகு ,திரு அஜித் குமார் துவங்க இருக்கும் 2ஆவது சுற்று உலக மோட்டார் சைக்கிள் சுற்று பயணத்துக்கு #rideformutualres (பரஸ்பர மரியாதை பயணம்) என்று பெயரிடப்பட்டு உள்ளது” என தெரிவிக்கப்பட்டிருந்தது. 

‘ஏகே மோட்டோ ரைடு’ | AK Moto Ride

இந்நிலையில் தான் புதிதாக பைக் சுற்றுலா நிறுவனம் ஒன்றை தொடங்கியுள்ளார். ‘ஏகே மோட்டோ ரைடு” என இந்நிறுவனத்துக்கு பெயரிடப்பட்டுள்ளது. 

இதுதொடர்பாக அஜித்தின் மேனேஜர் சுரேஷ் சந்திரா, அறிக்கை ஒன்றை ட்வீட் செய்துள்ளார். அதில், “இந்த மேற்கோளை நான் நீண்ட காலமாக விரும்பி வாழ்ந்து வருகிறேன்: 'வாழ்க்கை ஒரு அழகான  பயணம். அதன் எதிர்பாராத தருணங்கள், திருப்பங்கள் மற்றும் திறந்த பாதைகளைக் கொண்டாடுங்கள்'.

மோட்டார் சைக்கிள்கள் மற்றும் வெளிப்புறங்களில் எனது ஆர்வத்தை ஒரு தொழில்முறை முயற்சியாக மாற்றும் விதத்தில் ஏகே மோட்டோ ரைடு (AK Moto Ride)  என்ற மோட்டார்சைக்கிள் சுற்றுலா நிறுவனத்தை கொண்டு வந்திருக்கிறேன் என்பதை பகிர்ந்து கொள்வதில் மகிழ்ச்சி அடைகிறேன்.

இந்தியாவின் இயற்கை எழில் கொஞ்சும் நிலப்பரப்புகளில் மட்டுமின்றி, அழகான சர்வதேச சாலைகளிலும் பயணம் மேற்கொள்ள ஆர்வமுள்ள ரைடர்ஸ், சாகச ஆர்வலர்கள் மற்றும் பயண விரும்பிகளுக்கு ஏகே மோட்டோ ரைடு சுற்றுப்பயணங்களை வழங்கும்.

பாதுகாப்பு மற்றும் சௌகரியத்தில் அசைக்க முடியாத அர்ப்பணிப்புடன் சுற்றுப்பயணங்கள் முழுவதிலும் நம்பகத்தன்மை மற்றும் செயல்திறனை உறுதி செய்து, உன்னிப்பாக பராமரிக்கப்படும் சாகச சுற்றுலா சூப்பர் பைக்குகளை ஏகே மோட்டோ ரைடு வழங்கும். தொழில்முறை வழிகாட்டிகள், மோட்டார் சைக்கிள் சுற்றுப்பயணங்களின் நுணுக்கங்களை நன்கு அறிந்தவர்கள் மற்றும் உள்ளூர் பழக்கவழக்கங்கள் மற்றும் மரபுகள் பற்றிய விரிவான அறிவைக் கொண்டவர்கள் தொடக்கம் முதல் இறுதி வரை ரைடர்களுக்கு தடையற்ற மற்றும் அதிவேக அனுபவத்தை வழங்குவார்கள்” என தெரிவிக்கப்பட்டுள்ளது.