ICAI CA 2026: ஆடிட்டர் ஆகலாம்.. வெளியான சிஏ தேர்வு முடிவுகள்: இன்ட்டர், பவுண்டேஷன் முடிவுகளை உடனே அறிவது எப்படி?

ICAI CA January 2026 Result: ஐசிஏஐ சிஏ தேர்வு முடிவுகள் வெளியீடு: உங்கள் மதிப்பெண்களை உடனே தெரிந்து கொள்ளுங்கள்! மெரிட் பட்டியல் மற்றும் தேர்ச்சி விவரங்கள்

சிஏ தேர்வு முடிவுகள்

Source : சிறப்பு ஏற்பாடு

ஐசிஏஐ எனப்படும் இந்திய பட்டயக் கணக்காளர்கள் நிறுவனம் (ICAI), ஜனவரி 2026-ல் நடைபெற்ற CA இடைநிலை (Intermediate) மற்றும் அடிப்படை (Foundation) தேர்வு முடிவுகளை வெளியிட்டுள்ளது. இந்தத் தேர்வை எழுதிய மாணவர்கள், தங்கள் முடிவுகளை ஐசிஏஐயின் அதிகாரப்பூர்வ இணையதளமான icai.nic.in மூலம் அறிந்து கொள்ளலாம்.

முன்னதாக ஜனவரி 2026 அமர்வுக்கான சிஏ தேர்வுகள் சமீபத்தில் நடைபெற்று முடிந்தன. இந்த முடிவுகளுடன் சேர்த்து, அகில இந்திய அளவில் முதல் 50 இடங்களைப் பிடித்த மாணவர்களின் தரவரிசைப் பட்டியலையும் (Merit List) ஐசிஏஐ வெளியிடுகிறது.

தேர்வு முடிவுகளைப் பார்ப்பது எப்படி?

1. முதலில் icai.nic.in என்ற அதிகாரப்பூர்வ இணையதளத்திற்குச் செல்லவும்.
2. முகப்புப் பக்கத்தில் காணப்படும் 'CA Intermediate' அல்லது 'CA Foundation' ஜனவரி 2026 தேர்வு முடிவுக்கான இணைப்பை கிளிக் செய்யவும்.
3. திரையில் தோன்றும் பக்கத்தில் உங்கள் பதிவு எண் (Registration Number) மற்றும் ரோல் நம்பரை (Roll Number) பிழையின்றி உள்ளிடவும்.
4. விவரங்களைச் சமர்ப்பித்ததும், உங்கள் தேர்வு முடிவுகள் திரையில் தோன்றும்.
5. எதிர்காலத் தேவைக்காக உங்கள் மதிப்பெண் பட்டியலைத் தரவிறக்கம் செய்து கொள்ளலாம் அல்லது பிரிண்ட் எடுத்து வைத்துக் கொள்ளவும்.

தேர்ச்சி எப்படி?

சிஏ தேர்வில் தேர்ச்சி பெற, மாணவர்கள் ஒவ்வொரு பாடத்திலும் குறைந்தபட்சம் 40% மதிப்பெண்களையும், மொத்தக் கூட்டுத் தொகையில் 50% மதிப்பெண்களையும் பெற்றிருக்க வேண்டும் என்பது குறிப்பிடத்தக்கது.

தேர்வு முடிவுகள் வெளியான நேரத்தையும், நேரடி இணைப்பையும் மாணவர்கள் அதிகாரப்பூர்வ இணையதளத்தில் அவ்வப்போது சரிபார்த்துக் கொள்ளுமாறு அறிவுறுத்தப்படுகிறார்கள்.

முன்னதாக சிஏ இறுதித் தேர்வு முடிவுகள் மார்ச் 1ஆம் தேதி அன்று வெளியாகின. அதில் கர்னலைச் சேர்ந்த திக்‌ஷா கோயல் அகில இந்திய அளவில் முதலிடம் பெற்றார். இவர் 600 மதிப்பெண்களுக்கு 486 மதிப்பெண்களைப் பெற்று இருந்தது குறிப்பிடத்தக்கது.

கூடுதல் விவரங்களுக்கு: icai.nic.in