Vijaya Prabhakaran : சர்வதேச இசை நிகழ்ச்சியில் விஜய பிரபாகரன்.. சினிமாவில் சாதிப்பாரா விஜய்காந்த் மகன்?

உலக அளவில் மிகவும் பிரபலமான இசைக் கலைஞரை வைத்து பிரமாண்ட இசை நிகழ்ச்சியை நடத்தும் விஜயகாந்தின் மகன் விஜய பிரபாகரன்

விஜயபிரபாகரன் இசை நிகழ்ச்சி

உலக அளவில் மிகவும் பிரபலமான இசைக் கலைஞரை வைத்து பிரமாண்ட இசை நிகழ்ச்சியை விஜயகாந்தின் மகன் விஜய பிரபாகரன் நடத்த உள்ளதாக அறிவிக்கப்பட்டுள்ளது.

தமிழ் திரையுலகில் ஆக்‌ஷனில் அசத்தி முன்னடி நடிகராக வலம் வந்த விஜயகாந்த், தேமுதிக என்ற கட்சியை தொடங்கி, அரயலிலும் தனக்கான முத்திரையை பதித்தவர். தற்போது அவரது உடல்நிலை காரணமாக அரசியல் மற்றும் சினிமாவில் இருந்து ஒதுங்கி ஓய்வில் இருந்து வருகிறார். அவருக்கு பதிலாக அரசியல் மற்றும் சினிமாவில் கவனம் செலுத்தி வரும் விஜயகாந்தின் மகன் விஜய பிரபாகரன், மதுரை வீரன் உள்ளிட்ட ஒருசில படங்களில் நடித்துள்ளார். தற்போது இவரது தலைமையில் உலக புகழ் பெற்ற இசை நிகழ்ச்சி நடத்த திட்டமிடப்பட்டுள்ளது

சர்வதேச அளவில் மிகவும் பிரபலமான கிராமி மற்றும் எம்மி விருதுகளை பெற்று இசையுலகில் தனக்கு என தனி இடத்தை பிடித்தவர் கர்டிஸ் ஜாக்சன் என்ற 50 சென்ட். அமெரிக்கரான இவர் ராப் பாடல்கள் மற்றும் ஆல்பன் பாடல்களை வெளியிட்டு இசையில் பெரிய ரசிகர்கள் பட்டாளத்தையே வைத்திருப்பவர். இந்த நிலையில் இந்தியாவில் நவம்பர் மாதம் நடைபெறும் உலகளாவிய இசைக்கச்சேரியில் 50 சென்ட் பங்கேற்கிறார். மும்பையில்,  "The Final Lap Tour 2023" என்ற பெயரில் சர்வதேச இசை விழா நடைபெற உள்ளது. அதில்,  "Get Rich or Die Tryin" என்ற தனது 20 வது ஆல்பத்தை  50 சென்ட் வெளியிடுகிறார். 

நேரடி பொழுதுபோக்கு, திரைப்பட தயாரிப்பு மற்றும் கலைஞர்கள் ஒருங்கிணைப்பு துறையில் ஒரு அங்கமாக இருக்கும் விஜய பிரபாகரனின் வி.ஜெ.பி. (VJP) என்ற நிறுவனமும், டராக்டிகல் (Tracktical) கான்சர்ட்ஸ் என்ற முன்னணி பொழுதுபோக்கு நிறுவனமும் இணைந்து இசை விழாவுக்கு ஏற்பாடு செய்துள்ளன. அதில், 50 சென்ட்டின் வாழ்க்கை வரலாறு, பிரபல பாடல்கள் மற்றும் அதிகம் எதிர்பார்க்கப்படும் பாடல்கள் வெளியிட  உள்ளன. இந்த நிகழ்ச்சியில் சர்வதேச அளவில் புகழ்பெற்ற இசைக் கலைஞர்கள் கலந்து கொண்டு ராப் உள்ளிட்ட பாடல்களை பாடி ரசிகர்களை உற்சாகப்படுத்த உள்ளனர்.

தன்னிகரற்ற பாடல் வரிகளை எழுதுவதில் புகழ்பெற்ற 50 சென்ட், முதன் முதலில் வெளியிட்ட "Get Rich or Die Tryin" என்ற ஆல்பல் பட்டிதொட்டி எங்கும் சென்றடைந்து, இசை உலகில் நீங்கா இடம் பிடித்தது. இந்த ஆல்பம் அவருக்கு சர்வதேச அளவில் புகழையும் தேடி தந்தது. இந்த ஆல்பத்தில் உள்ள "In da club," "p.i.m.p," மற்றும் "candy shop" போன்ற பாடல்கள் கலாச்சார புரிதலையும், ஆழமான கதையையும் கொண்டதாக ரசிகர்கள் கொண்டாடியுள்ளனர். 

இந்தியாவில் நடைபெறும் இசை நிகழ்ச்சியில் பங்கேற்பது குறித்து பேசிய 50 சென்ட், தனது இந்திய பயணம் அன்பால் நிறைந்து இருப்பதாகவும், 16 ஆண்டுகளுக்கு முன்பு இந்தியாவுக்கு வந்தது குறித்து பகிர்ந்து கொண்டார்.  தனது தலைமையில் நடைபெறும் இசை நிகழ்ச்சி குறித்து பேசிய விஜய பிரபாகரன், திரை மற்றும் கலை உலகில் தனது தந்தையான விஜயகாந்த்துக்கு தனி அடையாளம் இருப்பதாகவும், அதை முன் எடுத்துச் செல்லும் வழியில் தனது முயற்சி இருப்பதாகவும், கலை துறையில் மாறுபட்ட தொடக்கத்தை செயல்படுத்துவதாகவும் தெரிவித்துள்ளார்.