IND vs WI: சிங்கம் போல சீறிய சாம்சன்.. கெத்தா அரையிறுதியில் நுழைந்த இந்தியா! வெளியேறிய வெஸ்ட் இண்டீஸ்!
T20 WC 2026 IND vs WI: டி20 உலகக்கோப்பையில் சூப்பர் 8 போட்டியில் வெஸ்ட் இண்டீஸ் அணி நிர்ணயித்த 196 ரன்கள் இலக்கை சேஸ் செய்த இந்தியா அரையிறுதிக்கு முன்னேறியது.
டி20 உலகக்கோப்பையில் இன்று கொல்கத்தா ஈடன் கார்டன் மைதானத்தில் சூப்பர் 8 போட்டியில் இந்தியா - வெஸ்ட் இண்டீஸ் அணிகள் மோதின. இந்த போட்டியில் வெற்றி பெறும் அணியே அரையிறுதிக்குச் செல்லும் என்ற நிலையில், இரு அணிகளும் வெற்றியை மட்டும் இலக்காக கொண்டு களமிறங்கியது.
196 ரன்கள் டார்கெட்:
டாஸ் வென்ற இந்திய கேப்டன் சூர்யகுமார் யாதவ் முதலில் பந்துவீச்சைத் தேர்வு செய்தார். வெஸ்ட் இண்டீஸ் அணிக்கு சாய் ஹோப் நிதானமாக ஆடி அவுட்டாக, சேஸ் 40 ரன்களும், ஹெட்மயர் 27 ரன்களும் எடுக்க கடைசியில் ஹோல்டர் 37 ரன்களும், பவெல் 34 ரன்களும் எடுக்க இந்தியாவிற்கு 196 ரன்கள் இலக்காக நிர்ணயிக்கப்பட்டது.
ஏமாற்றிய அபிஷேக், இஷான்:
கடினமான இலக்கு, வெற்றி பெற்றாக வேண்டிய நெருக்கடியில் களமிறங்கிய இந்திய அணிக்கு சாம்சன் அதிரடி தொடக்கம் அளித்தார். அபிஷேக் சர்மா 2 பவுண்டரிகள் விளாசினாலும் 11 பந்துகளில் 10 ரன்கள் எடுத்து அவுட்டானார். அடுத்து வந்த வேகத்தில் இஷான் கிஷன் 10 ரன்களுக்கு அவுட்டாக, சூர்யகுமார் யாதவ் சாம்சனுடன் ஜோடி சேர்ந்தார்.
அசத்திய சாம்சன்:
கிடைத்த வாய்ப்பை அருமையாக பயன்படுத்திக் கொண்ட சாம்சன் பவுண்டரியும், சிக்ஸரும் விளாசினார். இதனால், ஓவருக்கு 10 ரன்களுக்கு குறையாமல் இந்தியா ரன் எடுத்தது. அபாரமாக ஆடிய சாம்சன் அரைசதம் விளாச, மறுமுனையில் கேப்டன் சூர்யகுமார் யாதவ் 16 பந்துகளில் 18 ரன்கள் எடுத்து அவுட்டாக, 11வது ஓவரில் 99 ரன்களுக்கு 3 விக்கெட்டுகளை இழந்தது.
ஆனாலும், சாம்சனுடன் அடுத்து ஜோடி சேர்ந்த திலக் வர்மா அதிரடியாக ஆடினார். கடைசி 7 ஓவர்களில் 75 ரன்கள் இந்தியாவின் வெற்றிக்குத் தேவைப்பட்டது. இந்த ஜோடியைப் பிரிக்க கேப்டன் சேஸ் சுழல் தாக்குதல் நடத்தினார். ஆனால், இவர்கள் அதிரடியாகவே ஆடினார்கள். தொடர்ந்து அதிரடியாக ஆடிய திலக் வர்மா 15 பந்துகளில் 4 பவுண்டரி 1 சிக்ஸருடன் 27 ரன்கள் எடுத்த நிலையில் அவுட்டானார்.
5 ஓவர்களில் 50 ரன்கள் தேவை:
அடுத்து ஹர்திக் பாண்ட்யா சாம்சனுடன் ஜோடி சேர்ந்தார். கடைசி 5 ஓவர்களில் இந்திய அணியின் வெற்றிக்கு 50 ரன்கள் தேவைப்பட்டது. பதட்டமின்றி இந்த ஜோடி ஏதுவான பந்துகளை பவுண்டரிக்கு அனுப்பியது. இதனால், பந்துகளும் இலக்கும் சமமான அளவிற்கு வந்தது. 24 பந்துகளில் 35 ரன்கள் தேவை என்ற நிலை இருந்தபோது பாண்ட்யா கைக்கே கொடுத்த கேட்ச்சை ஹோல்டர் தவறவிட்டார்.
கடைசியில் சாம்சன் பவுண்டரிகளை விளாச ஆட்டம் இந்தியாவின் கட்டுக்குள் வந்தது. 14 பந்துகளில் 19 ரன்களே தேவைப்பட்டது. ஆனால், எதிர்பாராத விதமாக பாண்ட்யா 19வது ஓவரில் அவுட்டானார். அவர் 14 பந்துகளில் 19 ரன்கள் எடுத்து அவுட்டாக, அடுத்து வந்த ஷிவம் துபே முதல் பந்தையே பவுண்டரி விளாச இந்தியா வெற்றிக்கு 7 பந்துகளில் 9 ரன்கள் தேவைப்பட்டது.
கடைசி 6 பந்துகளில் 7 ரன்கள் மட்டுமே தேவைப்பட்ட நிலையில், வெஸ்ட் இண்டீஸ் அணிக்கு ஸ்லோ ஓவர் பெனால்டி விதிக்கப்பட்டது. இதனால், வெளியில் 4 ஃபீல்டர்கள் மட்டுமே நிறுத்தப்பட்டனர். சாம்சன் முதல் பந்தையே சிக்ஸருக்கு அனுப்ப இந்தியாவிற்கு 1 ரன் மட்டுமே தேவைப்பட்டது. அடுத்த பந்தை பவுண்டரிக்கு விளாச இந்தியா 5 விக்கெட் வித்தியாசத்தில் வெற்றி பெற்று அரையிறுதிக்கு முன்னேறியது. இதனால், வெஸ்ட் இண்டீஸ் தொடரை விட்டு வெளியேறியது. சாம்சன் கடைசி வரை அவுட்டாகாமல் 50 பந்துகளில் 12 பவுண்டரி 4 சிக்ஸருடன் 97 ரன்கள் விளாசி வெற்றி பெற வைத்தார்.
தலைப்பு செய்திகள்
ட்ரெண்டிங் செய்திகள்
