Facebook: லொகேஷன் தொடர்பான சேவைகளை நிறுத்தும் பேஸ்புக்! இனி இந்த அம்சமெல்லாம் கிடைக்காதா?

நியர்பை ஃப்ரெண்ட்ஸ் என்பது மக்கள் தங்களின் தற்போதைய இருப்பிடத்தை அவர்களின் Facebook நண்பர்களுடன் பகிர்ந்து கொள்ள அனுமதிக்கும் அம்சமாகும்.

பேஸ்புக்

9to5Mac என்னும் டெக் பக்கம் வெளியிட்டுள்ள அறிக்கையின்படி, பேஸ்புக் அதன் லொகேஷன் சார்ந்த சேவைகளை ஜூன் மாதத்தில் நிறுத்தப்போவதாக முடிவெடுத்துள்ளதாக தெரிகிறது. லொகேஷன் தொடர்பாக பேஸ்புக் ‘அருகில் உள்ள நண்பர்கள் (nearby friends)', 'வானிலை எச்சரிக்கைகள் (weather alert)', 'இருப்பிட வரலாறு (location history)' மற்றும் சில அம்சங்களை வழங்கி வந்தது. இவை இனி இந்த மாத இறுதிக்குப் பிறகு கிடைக்காது என்று மெட்டா நிறுவனம் பேஸ்புக் பயனர்களுக்குத் தெரிவிக்கத் தொடங்கியுள்ளது. இந்த அம்சங்கள் நிறுத்தப்பட்டதற்கான சரியான காரணத்தை நிறுவனம் கூறவில்லை, ஆனால் இந்த அம்சங்கள் தொடர்பான அனைத்து பயனர் தகவல்களும் பேஸ்புக் சேவையகங்களிலிருந்து நீக்கப்படும் என்று கூறப்பட்டுள்ளது. ஃபேஸ்புக் பயனர்கள் இந்த அம்சங்களின் முடிவு குறித்த அறிவிப்பை பேஸ்புக் மொபைல் செயலியின்மூலம் பெற்று வருகின்றனர். நியர்பை ஃப்ரெண்ட்ஸ் என்பது மக்கள் தங்களின் தற்போதைய இருப்பிடத்தை அவர்களின் Facebook நண்பர்களுடன் பகிர்ந்து கொள்ள அனுமதிக்கும் அம்சமாகும்.

ஆகஸ்ட் 1, 2022 வரை பயனர்கள் தங்கள் பின்னணி இருப்பிடத் தரவு மற்றும் லொகேஷன் ஹிஸ்டரி அணுகவும் பதிவிறக்கவும் முடியும் என்றும் பேஸ்புக் அறிவித்தது. இந்த தேதிக்குப் பிறகு, சேகரிக்கப்பட்ட அனைத்து தரவுகளும் நிரந்தரமாக நீக்கப்படும் என்று அதன் அறிக்கை குறிப்பிடுகிறது.

பயனர் தரவு சேகரிப்பைக் குறைப்பதை இலக்காகக் கொண்ட இந்த நடவடிக்கையின் சரியான காரணத்தை மெட்டா வெளிப்படுத்தவில்லை என்றாலும், இந்த நடைமுறைகள் குறித்து பல்வேறு அரசாங்கங்கள் மற்றும் கண்காணிப்புக் குழுக்களிடமிருந்து கிடைத்த ஆய்வு காரணமாக இருக்கலாம் என்று கூறப்படுகிறது.

Facebook to discontinue Nearby Friends and other location-based features https://t.co/oK4nekNOkn by @filipeesposito

— 9to5Mac (@9to5mac) May 6, 2022

அமெரிக்காவிற்கு தரவுகளை பகிர்வதற்கு அனுமதிக்காவிட்டால், ஐரோப்பிய ஒன்றிய நாடுகளில் இருந்து பேஸ்புக் மற்றும் இன்ஸ்டாகிராம் அகற்றப்படும் என்று இந்த ஆண்டு பிப்ரவரியில் மெட்டா நிறுவனம் மிரட்டியது. இந்த தரவு பரிமாற்றங்கள் அமெரிக்க அரசாங்கத்தின் ஸ்னூப்பிங்கிலிருந்து பயனர்களைப் பாதுகாக்கவில்லை என்று கண்டறியப்பட்ட பின்னர், ஐரோப்பிய ஒன்றிய கட்டுப்பாட்டாளர்கள் பேஸ்புக் நிறுவனத்திற்கு அட்லாண்டிக் நாடுகடந்த தரவு பரிமாற்றத்தை நிறுத்துமாறு அழுத்தம் கொடுத்ததை அடுத்து இந்த நடவடிக்கை எடுக்கப்பட்டது குறிப்பிடத்தக்கது. ஏப்ரல் மாதத்தில், ஐரோப்பிய ஒன்றியம் டிஜிட்டல் சேவைகள் சட்டத்திற்கான விவரங்களை இறுதி செய்துள்ளது. இந்த விவரங்கள், பேஸ்புக், கூகுள் மற்றும் பிற தொழில்நுட்ப நிறுவனங்கள் தங்களது பயனர்களின் டேட்டாக்களை எவ்வாறு கட்டுப்படுத்துகிறது என்பதில் பல கட்டுப்பாடுகளை விதித்துள்ளது.