மயிலாடுதுறையில் ‘நடப்போம் நலம் பெறுவோம்’  திட்டம் தொடக்கம் - ஆட்சியர், எம்.பி., எம்எல்ஏக்கள் பங்கேற்பு

மயிலாடுதுறை மாவட்ட ஆட்சியர் அலுவலகத்தில் மருத்துவம் மற்றும் மக்கள் நல்வாழ்வுத்துறையின் “நடப்போம் நலம் பெறுவோம் 8 கி.மீ சுகாதார நடைபாதை திட்டம் இன்று  தொடங்கப்பட்டுள்ளது.

நடப்போம் நலம் பெறுவோம் திட்ட தொடக்க நிகழ்ச்சி

நடைபயிற்சி செய்யும் பழக்கத்தை பொதுமக்களிடம் ஊக்குவிக்கும் வகையில் 'நடப்போம் நலம் பெறுவோம்' (Health Walk) என்ற சிறப்பு திட்டத்தை தமிழக சுகாதாரத் துறை சார்பில் இன்று செயல்படுத்துகிறது. அத்திட்டத்தை இன்று காலை சென்னை பெசன்ட் நகர் கடற்கரையில் இளைஞர் நலன் மற்றும் விளையாட்டு துறை அமைச்சர் உதயநிதி ஸ்டாலின் தொடங்கி வைத்தார். அதனை தொடர்ந்து தமிழகத்தில் மற்ற மாவட்டங்களிலும் இந்த திட்டத்தை அமைச்சர்கள், மாவட்ட ஆட்சியர் என பலரும் தொடங்கி வைத்துள்ளனர்.

மயிலாடுதுறை மாவட்ட ஆட்சியர் அலுவலகத்தில் மருத்துவம் மற்றும் மக்கள் நல்வாழ்வுத்துறையின் “நடப்போம் நலம் பெறுவோம் 8 கி.மீ சுகாதார நடைபாதை health walk’’ திட்டத்தினை மயிலாடுதுறை மாவட்ட ஆட்சியர் ஏ.பி.மகாபாரதி, மயிலாடுதுறை நாடாளுமன்ற உறுப்பினர் இராமலிங்கம், மயிலாடுதுறை சட்டமன்ற உறுப்பினர் ராஜகுமார் ஆகியோர் கூட்டாக தொடங்கி வைத்தனர். இந்நிகழ்ச்சியில் மாவட்ட ஆட்சியர் பேசுகையில், மருத்துவம் மற்றும் மக்கள் நல்வாழ்வுத்துறையின் சார்பில் “நடப்போம் நலம் பெறுவோம் 8 கி.மீ சுகாதார நடைபாதை health walk’’எனும் திட்டம் இன்று  இளைஞர்நலன் மற்றும் விளையாட்டு மேம்பாட்டுத்துறை அமைச்சரால், சுகாதாரதுறை அமைச்சர் முன்னிலையில்  காணொளி காட்சி மூலம் தொடங்கி வைக்கப்பட்டுள்ளது.

     

நடைபயிற்சியானது நம்மை சுறுசுறுப்பாகவும், ஆரோக்கியமான எடையுடன் இருக்கவும், நாள்பட்ட உடல்நல பிரச்சனைகள் மற்றும் மன அழுத்தத்தை குறைக்கவும் உதவுகிறது. மேலும், இந்த நடைப்பயிற்சி இனி ஒவ்வொரு மாதத்திலும் முதல் ஞாயிற்றுக்கிழமை நடைபெறும். நடைபயிற்சியானது மாவட்ட ஆட்சியர் அலுவலத்தில் தொடங்கி மயூரநாதர் தெற்கு வீதி, சின்னக்கடை தெரு, தரங்கம்பாடி சாலை வழியாக புதிய மாவட்ட ஆட்சியர் அலுவலகம் வரை சென்று மீண்டும் அதே வழியில் திரும்ப வந்து மாவட்ட ஆட்சியர் அலுவலகத்தில் நிறைவடையும் வகையில் 8 கி.மீ தேர்வு செய்யப்பட்டுள்ளது. இவற்றில் குடிநீர், இருக்கை வசதிகளுடன் மாதந்தோறும் முதல் ஞாயிற்றுக்கிழமை மருத்துவ முகாம் நடத்திடவும் திட்டமிடப்பட்டுள்ளது. நடைபாதையும் எத்தனை கி.மீ நடைபயிற்சி மேற்கொண்டோம் என்பதை அறியும் வகையில் ஒவ்வொரு கி.மீ தூரத்தை குறிக்கும் வகையில் பதாகைகள் வைக்கப்பட்டுள்ளது.

உடல் ஆரோக்கியத்திடன் இருக்க நடைபயிற்சி அவசியம் என்பதை அனைவரும் அறிந்து நடப்போம் நலம் பெறுவோம் 8 கி.மீ சுகாதார நடைபாதை Health Walk ’’எனும் திட்டத்தில் இணைந்து செயல்படவும் என மயிலாடுதுறையில் மாவட்ட ஆட்சியர் மகாபாரதி பேசினார். இந்நிகழ்ச்சியில் மயிலாடுதுறை மாவட்ட காவல் கண்காணிப்பாளர் மீனா, மாவட்ட வருவாய் அலுவலர் மணிமேகலை, மயிலாடுதுறை நகர்மன்ற தலைவர் செல்வராஜ், சுகாதாரதுறை துணை இயக்குநர் மருத்துவர் அஜீத் பிரபுகுமார், சுகாதார துறை இணை இயக்குநர் மருத்துவர் குருநாதன் கந்தையா, மாவட்ட விளையாட்டு அலுவலர் அப்துல்லாஷா மற்றும் அரசு அலுவலர்கள், விளையாட்டு வீரர்கள், வீராங்கனைகள், நடைபயிற்சியாள்கள் கலந்து கொண்டார்கள்.