தென்பெண்ணை ஆற்றில் வினாடிக்கு 400 கனஅடி நீர் திறப்பு - 5 மாவட்டங்களுக்கு வெள்ள அபாய எச்சரிக்கை

’’கர்நாடக மாநிலம் நந்திமலையில் உருவாகும் தென் பெண்ணை ஆறு கிருஷ்ணகிரி, தருமபுரி, திருவண்ணாமலை, விழுப்புரம் மாவட்டங்களில் பயணித்து கடலூரில் கடலில் கலக்கிறது’’

தென் பெண்ணை ஆறு

கர்நாடக மாநிலம் நந்திமலையில் உற்பத்தி யாகும் தென்பெண்ணை ஆறு கிருஷ்ணகிரி, தர்மபுரி, திருவண்ணாமலை, விழுப்புரம் வழியாக சென்று கடலூர் மாவட்டத்தில் கடலில் கலக்கிறது. தமிழகத்தில் இந்த அணையின் குறுக்கே கிருஷ்ணகிரி மாவட்டத்தில் ஓசூர் அருகே உள்ள கெலவரப்பள்ளி, முத்தூர் மற்றும் திருவண்ணாமலை மாவட்டம் சாத்தனூர் ஆகிய இடங்களில் அணைகள் கட்டப்பட்டு உள்ளது.

இந்த அணைகள் மூலம் பல ஆயிரக்கணக்கான விவசாய நிலங்கள் பாசன வசதி பெற்று வருகின்றது. கிருஷ்ணகிரி அணை மூலம் பெரியமுத்தூர், சுண்டேகுப்பம், திம்மாபுரம், சவுட்டள்ளி, தளிஅள்ளி, கால்வே அள்ளி, குண்டலப்பட்டி, பெண்ணேஸ்வரமடம், காவேரிப்பட்டணம், பாலே குளி, மாரிசெட்டிஅள்ளி, நாகோஜனஅள்ளி, ஜனபர் அள்ளி, என  16 பஞ்சாயத்துகளில் உள்ள  9,012 ஏக்கர் நிலங்கள் பாசன வசதி பெறுகிறது. 

இந்நிலையில், இந்த அணையில் இருந்து கடந்த ஜூலை மாதம் 26 ஆம் தேதி முதல் நவம்பர் மாதம் 22 ஆம் தேதி வரை 120 நாட்களுக்கு முதல்போக சாகுபடிக்காக தண்ணீர் திறந்துவிடப்பட்டுள்ளது.  இந்நிலையில், கடந்த சில நாட்களாக தென்பெண்ணை ஆற்றின் நீர்பிடிப்பு பகுதியில் தொடர்ந்து கன மழை பொழிந்து வருவதால், கிருஷ்ணகிரி அணைக்கு வரும் நீரின் அளவும் படிப்படியாக உயர்ந்து வருகிறது. நேற்று மாலை நிலவரப்படி அணைக்கு 711 கன அடி தண்ணீர் வந்து கொண்டிருந்தது. இதனால் அணையின் மொத்த உயரமான 52 அடியில் தற்போது 51 அடிக்கு தண்ணீர் தேங்கி கடல் போல் காட்சியளிக்கிறது. அணையில் இருந்து பாசனத்திற்காக வலது மற்றும் இடதுபுற கால் வாய்களில் 177 கன அடி தண்ணீரும். தென்பெண்ணை ஆற்றில் 400 கன அடி தண்ணீரும் திறந்து விடப்பட்டுள்ளது.

அணைக்கு வரும் நீரின் அளவை பொருத்து, அணையின் பாதுகாப்பு கருதியும் தொடர்ந்து கூடுதலாக தண்ணீர் திறக்க வாய்ப்புள்ளதால், பொதுப்பணித்துறை அதிகாரிகள் கிருஷ்ணகிரி, தர்மபுரி, திருவண்ணாமலை, விழுப்புரம் மற்றும் கடலூர் மாவட்ட தென்பெண்ணை ஆற்றங்கரை யோர மக்களுக்கு வெள்ள அபாய எச்சரிக்கை விடுத்துள்ளனர். இதற்கிடையில் கிருஷ்ணகிரி மாவட்ட ஆட்சியர் ஜெயசந்திரபானு ரெட்டி, அணைக்கு வரும் நீரின் அளவு தொடர்ந்து அதிகரித்து வருவதால், அணையின் பாதுகாப்பு கருதி, அணைக்குவரும் தண்ணீர் முழுவதும் அணையில் இருந்து வெளியேற்றப்பட வேண்டியுள்ளதால், தென்பெண்ணை ஆற்றங்கரையோரத்தில் மற்றும் தாழ்வான பகுதிகளில் வசிக்கும் பொதுமக்கள் பாதுகாப்பான இடத்திற்கு செல்லுமாறு எச்சரித்துள்ளார்.

கிருஷ்ணகிரி மாவட்டம் தொடர்பான மேலும் பல செய்திகளுக்கு இந்த லிங்கை க்ளிக் செய்யவும்