Ditwah cyclone :வடிகால் வசதியின்றி தவிக்கும் கோரகொல்லை: வீடுகளை சூழ்ந்த வெள்ளம், வெளியேற முடியாமல் தவிக்கும் மக்கள்! மாவட்ட ஆட்சியருக்கு அவசர கோரிக்கை

வடிகால் வசதியின்மையால் தத்தளிக்கும் கோரகொல்லை: சீர்காழி அருகே வீடுகளை சூழ்ந்த வெள்ளம்; மக்கள் வெளியேற முடியாமல் தவிப்பு! 

மழை நீர் சூழ்ந்த பகுதிகள்

Source : ABP

மயிலாடுதுறை : தென்மேற்கு வங்கக் கடலில் உருவாகிய 'டிட்வா' புயல் சின்னத்தின் தீவிர தாக்கம் காரணமாக, மயிலாடுதுறை மாவட்டம் சீர்காழி மற்றும் அதனைச் சுற்றியுள்ள பகுதிகளில் கடந்த இரண்டு நாட்களாகக் கனமழை கொட்டித் தீர்த்து வருகிறது. இந்த அதீத மழையின் விளைவாக, சீர்காழிக்கு அருகே உள்ள கோபாலசமுத்திரம் ஊராட்சிக்குட்பட்ட கோரகொல்லை கிராமத்தில் சுமார் 35 வீடுகளை மழை நீர் சூழ்ந்துள்ளதால், மக்கள் வீட்டை விட்டு வெளியேற முடியாமல் இரண்டு நாட்களாகத் தவித்து வருகின்றனர். அடிப்படை வடிகால் வசதி கூட இல்லாததால், தங்கள் வாழ்வாதாரம் பாதிக்கப்பட்டுள்ளதாகக் கிராம மக்கள் வேதனையுடன் மாவட்ட நிர்வாகத்திற்குக் கோரிக்கை விடுத்துள்ளனர்.

டிட்வா புயல் தாக்கம் – சீர்காழியில் பதிவான கனமழை

சென்னை வானிலை ஆய்வு மையம், கடலோர மற்றும் டெல்டா மாவட்டங்களில் அதிதீவிர கனமழை பெய்யக்கூடும் என விடுத்த எச்சரிக்கையின்படி, சீர்காழி மற்றும் அதனைச் சுற்றியுள்ள பகுதிகளில் இடைவிடாது மழை பெய்தது. சீர்காழி, கொள்ளிடம், வைத்தீஸ்வரன் கோவில், புத்தூர், தைகால், அகனி, சட்டநாதபுரம், தென்பாதி, புதிய பேருந்து நிலையம், திருவெண்காடு, மணிகிராமம், மங்கைமடம் உள்ளிட்ட சுற்றுவட்டாரப் பகுதிகள் முழுவதும் மழை நீரின் தாக்கத்திற்கு உள்ளாகியுள்ளன.

பல ஆண்டுகாலப் பிரச்சனை

சீர்காழியின் புறநகர்ப் பகுதியான் கோரகொல்லை கிராமம், ஒவ்வொரு மழைக்காலத்திலும் இதேபோன்ற துயரத்தைச் சந்தித்து வருகிறது. இந்தக் கிராமத்தில் உள்ள சுமார் 35 வீடுகளை தற்போது பெய்த மழை நீர் முழுவதுமாகச் சூழ்ந்துள்ளது. வீடுகளைச் சுற்றிலும் முழங்கால் அளவுக்குத் தண்ணீர் தேங்கி நிற்பதால், கிராம மக்கள் கடந்த இரண்டு நாட்களாக அத்தியாவசியத் தேவைகளுக்காகக்கூட வீட்டை விட்டு வெளியே வர முடியாமல் முடங்கிப் போயுள்ளனர்.

கிராம மக்களின் கூற்றுப்படி, இந்தக் கிராமத்தில் கடந்த 15 ஆண்டுகளுக்கும் மேலாக நிரந்தரமான வடிகால் வசதி ஏதும் ஏற்படுத்தப்படவில்லை. இதனால், கனமழை பெய்யும்போதெல்லாம், வீடுகளைச் சுற்றிலும் தண்ணீர் தேங்கி, வீடுகளுக்குள்ளும் நீர் புகும் நிலை ஏற்படுகிறது.

"நாங்கள் கடந்த 15 வருடங்களாக இந்த அவதியில்தான் வாழ்கிறோம். ஒவ்வொரு மழைக் காலத்திலும் குழந்தைகள், முதியோர்கள் என அனைவரும் மிகுந்த சிரமப்படுகிறோம். அத்தியாவசியப் பொருட்களை வாங்கவோ, வேலைக்குச் செல்லவோ வழியில்லாமல் இரண்டு நாட்களாக வீட்டுக்குள்ளேயே அடைந்து கிடக்கிறோம். ஒரு முறைகூட இதற்குத் தீர்வு காணப்படவில்லை," என்று கோரகொல்லை கிராம மக்கள் வேதனையுடன் தெரிவித்தனர்.

பலன் தராத மனுக்கள்

வடிகால் வசதி ஏற்படுத்தித் தரக் கோரி, கோரகொல்லை கிராம மக்கள் இதற்கு முன்னரும் பலமுறை கொள்ளிடம் ஊராட்சி ஒன்றிய ஆணையரிடம் மனு அளித்துள்ளனர். ஆனாலும், இதுவரை உரிய நடவடிக்கை எடுக்கப்படவில்லை எனப் பாதிக்கப்பட்ட மக்கள் குற்றம் சாட்டுகின்றனர். நகரப் பகுதிகளில் மட்டும் சீரமைப்புப் பணிகள் நடப்பதாகவும், தங்கள் கிராமப் பகுதியை அதிகாரிகள் கண்டுகொள்ளவில்லை எனவும் அவர்கள் தெரிவிக்கின்றனர்.

சீர்காழி நகர்ப் பகுதிகளிலும் வெள்ள பாதிப்பு

கோரகொல்லை கிராமம் மட்டுமின்றி, சீர்காழி நகர்ப் பகுதிகளிலும் மழை நீர் தேங்கியுள்ளது. தக்ஷிணாமூர்த்தி நகர், பாலசுப்ரமணிய நகர், வசந்தம் நகர், உக்கடையார் நகர், திருக்கோளக்கா தெரு, தாடாலன் கோவில் வீதி போன்ற தாழ்வான குடியிருப்புப் பகுதிகளில் வீடுகளைச் சூழ்ந்த மழை நீரால் பொதுமக்களின் இயல்பு வாழ்க்கை கடுமையாகப் பாதிக்கப்பட்டுள்ளது.

இந்த நகர்ப் பகுதிகளிலும் வடிகால் வாய்க்கால்கள் சரியாகப் பராமரிக்கப்படாததால், தண்ணீர் வெளியேற வழியின்றித் தேங்கிக் கிடப்பதாகப் பொதுமக்கள் புகார் தெரிவிக்கின்றனர்.

மாவட்ட ஆட்சியருக்குக் கோரிக்கை

தற்போது மழை நீர் சூழ்ந்துள்ளதால், சுகாதாரக் கேடு ஏற்பட்டு தொற்று நோய்கள் பரவும் அபாயம் உள்ளது. மேலும், தொடர்ந்து பெய்து வரும் மழையால் நீர்மட்டம் உயர்ந்து, வீடுகள் மேலும் பாதிப்புக்குள்ளாகும் அபாயமும் ஏற்பட்டுள்ளது.

எனவே, கோரகொல்லை கிராம மக்கள், இனி வரும் காலங்களிலாவது நிரந்தரமான வடிகால் வசதியை ஏற்படுத்தித் தந்து, தங்களது வாழ்வாதாரத்தைப் பாதுகாக்கும் வகையில் உடனடியாக நடவடிக்கை எடுக்க வேண்டும் என்று மயிலாடுதுறை மாவட்ட ஆட்சியருக்குக் கோரிக்கை விடுத்துள்ளனர்.

சீர்காழி நகர் பகுதி மக்கள் மற்றும் கோரகொல்லை கிராம மக்களின் துயரத்தைக் கருத்தில் கொண்டு, மாவட்ட நிர்வாகம் போர்க்கால அடிப்படையில் வடிகால்களைச் சீரமைத்து, தேங்கியுள்ள தண்ணீரை வடிய வைக்க நடவடிக்கை எடுக்க வேண்டும் என்பதே அப்பகுதி மக்களின் ஒருமித்த எதிர்பார்ப்பாக உள்ளது.