யோகாவில் மிரட்டிய சிறுவர்–சிறுமிகள்!! கோவையில் நடந்த உலக சாதனை முயற்சி...

கோவையில் நடைபெற்ற உலக சாதனை யோகா முயற்சியில் சிறுவர்–சிறுமிகள் கடினமான ஆசனங்களை செய்து அசத்தினர்.

கோவையில் 14 சிறுவர்–சிறுமிகள் யோகாவில் அசத்தல்

Source : abp nadu

கோவையில் சிறுவர், சிறுமிகள் பங்கேற்ற யோகா உலக சாதனை முயற்சி நிகழ்ச்சி பார்வையாளர்களை வியப்பில் ஆழ்த்தியது. உடல் மற்றும் மன ஆரோக்கியத்தின் முக்கியத்துவத்தை எடுத்துரைக்கும் வகையில் நடைபெற்ற இந்த நிகழ்ச்சி, சரவணம்பட்டியில் உள்ள விருக்ஷம் யோகாலயா வளாகத்தில் நடைபெற்றது.

இந்த உலக சாதனை முயற்சியில் ஐந்து வயது முதல் பதினான்கு வயது வரையிலான 14 சிறுவர், சிறுமிகள் இரண்டு குழுக்களாக பங்கேற்றனர். நிகழ்ச்சியில் குழந்தைகள் அரிய மற்றும் சிரமமான யோகாசனங்களை துல்லியமாக செய்து அசத்தியது அனைவரின் பாராட்டையும் பெற்றது.

முதல் குழுவில் இடம்பெற்ற மூன்று மாணவர்கள் கர்பாசனம், புஜங்காசனம் மற்றும் மச்சாசனம் ஆகிய ஆசனங்களை தொடர்ந்து அரை மணி நேரம் செய்து சாதனை முயற்சியில் ஈடுபட்டனர். நீண்ட நேரம் ஒரே ஆசனத்தில் கவனத்துடனும், உடல் கட்டுப்பாட்டுடனும் இருந்த அவர்கள் பார்வையாளர்களை கவர்ந்தனர். இதேபோல், மற்றொரு குழுவில் இடம்பெற்ற 11 மாணவர்கள் மரூதாசனம், திம்பாசனம், சக்ராசனம் ட்விஸ்ட், சிவலிங்காசனம், ஏகபாத சிரசாசனம், பூர்ண சலபாசனம் மற்றும் பூர்ண புஜங்காசனம் உள்ளிட்ட கடினமான யோகாசனங்களை ஒரு நிமிடத்தில் பலமுறை வேகமாக செய்து திறமையை வெளிப்படுத்தினர்.

இந்த உலக சாதனை முயற்சி குறித்து பேசிய விருக்ஷம் யோகாலயா நிறுவனர்களும், யோகா சாதனையாளர்களுமான ரூபிகா மற்றும் பவ்யஸ்ரீ, “யோகா மூலம் உடல் மற்றும் மன ஆரோக்கியத்தை மேம்படுத்துவதோடு, இளம் தலைமுறையினரிடம் ஒழுக்கம், ஒருமைப்பாடு மற்றும் தன்னம்பிக்கையை வளர்க்கும் நோக்கில் இந்த நிகழ்ச்சி நடத்தப்பட்டது” என தெரிவித்தனர்.

நிகழ்ச்சியில் பெற்றோர்கள், யோகா பயிற்சியாளர்கள் மற்றும் பொதுமக்கள் பலர் கலந்து கொண்டு மாணவர்களின் சாதனையை கைத்தட்டலுடன் பாராட்டினர். உலக சாதனை அமைப்புகளின் அதிகாரப்பூர்வ பிரதிநிதிகள் மாணவர்களுக்கு பதக்கங்கள் மற்றும் சான்றிதழ்கள் வழங்கி கவுரவித்தனர்.