SP Velumani On EPS : இபிஎஸ் எடுத்த தவறான முடிவுகள்? சசிகலா,டிடிவியை சேர்க்கணும்!அதிமுக சீனியர்கள் செக்

தமிழக வெற்றிக் கழகத்துடன் கூட்டணி வைக்கும் வாய்ப்பை எடப்பாடி பழனிசாமி பயன்படுத்தவில்லை என்றும்  தேர்தலுக்கு பின் ஆட்சியமைக்க இபிஎஸ் திமுகவுடன் தன்னிச்சையாக பேச்சுவார்த்தை நடத்தியதாகவும் எஸ்.பி.வேலுமணி, நத்தம் விஸ்வநாதன் ஆகியோர் குற்றச்சாட்டு வைத்துள்ளனர்.

சட்டமன்றத்தில் தவெக-வுக்கு ஆதரவாக வாக்களித்த விவகாரத்தில் எஸ்.பி.வேலுமணி, சி.வி.சண்முகம் உள்ளிட்ட மூத்த நிர்வாகிகளை கட்சிப் பொறுப்பிலிருந்து இபிஎஸ் நீக்கியிருந்தார். சில நாள்கள் கழித்து இபிஎஸ் அவர்களை மீண்டும் சேர்த்துக்கொண்டாலும், அவர்களுக்கு மீண்டும் அந்தந்த பதவிகள் கொடுக்கப்படவில்லை.

பின்னர், எஸ்.பி,வேலுமணிக்கு துணைப் பொதுச் செயலாளர் பதவி அளிக்கப்பட்டது. இருப்பினும், தன்னை நம்பி வந்த 30 மாவட்ட செயலாளர்களுக்கும் மீண்டும் பொறுப்பு கொடுக்கும் வரையில் துணைப் பொதுச் செயலாளர் ஏற்கப் போவதில்லை எஸ்.பி வேலுமணி மீண்டும் போர்க்கொடி தூக்கினார்.இந்த நிலையில் பழனிசாமி தலைமையில் அதிமுகவில் பல தவறான முடிவுகள் எடுகப்பட்டதாகவும், இதனால் அதிமுக தோல்வியை சந்தித்தாகவும் எஸ்.பி வேலுமணி மற்றும் நத்தம் விஸ்வநாதன் இருவரும் கூட்டாக அறிக்கை வெளியிட்டனர். 

அ.இ.அ.தி.மு.க-வின் தொடர் தேர்தல் பின்னடைவுகள், கூட்டணி அமைப்பதில் ஏற்பட்ட குளறுபடிகள் மற்றும் நிர்வாகிகளின் நீக்கம் ஆகியவற்றைச் சுட்டிக்காட்டி, கட்சியின் தலைமைக்கு எதிராக முக்கிய நிர்வாகிகள் மற்றும் தொண்டர்கள் மத்தியில் பெரும் கொந்தளிப்பு ஏற்பட்டுள்ளது. கட்சியின் 47 சட்டமன்ற உறுப்பினர்களில் 25 பேர் தலைமையின் தன்னிச்சையான போக்கிற்கும், தி.மு.க-வுடன் ஏற்பட்ட இரகசியப் பேச்சுவார்த்தைகளுக்கும் எதிர்ப்பு தெரிவித்து, புரட்சித்தலைவர் எம்.ஜி.ஆர் மற்றும் புரட்சித்தலைவி அம்மா ஆகியோர் வகுத்துத் தந்த தி.மு.க எதிர்ப்புக் கொள்கைப் பாதையிலேயே தொடர்ந்து பயணிக்கப்போவதாக உறுதியேற்றுள்ளனர். 

2019 மற்றும் 2021 தேர்தல்களில் அமமுக, தே.மு.தி.க, புதிய தமிழகம் போன்ற தோழமைக் கட்சிகளைச் சரியாக அரவணைக்காமல் வெளியேற்றியதும், 2024 நாடாளுமன்றத் தேர்தலில் பா.ஜ.க மற்றும் பா.ம.க போன்ற கட்சிகளுடன் கூட்டணி அமைப்பதில் ஏற்பட்ட காலதாமதமும் தி.மு.க கூட்டணி வெற்றி பெற வழிவகுத்தது. 

மேலும், 2026 சட்டமன்றத் தேர்தலில் தே.மு.தி.க, புதிய தமிழகம் மற்றும் தமிழக வெற்றிக் கழகம் போன்ற கட்சிகளுடன் மெகா கூட்டணி அமைக்கும் வாய்ப்புகள் இருந்தும், தலைமையின் தன்னிச்சையான செயல்பாடுகளால் அந்த வாய்ப்புகள் பாழாக்கப்பட்டுள்ளன.

1972 முதல் கட்சிக்கு உழைத்தவர்கள், அம்மாவின் விசுவாசிகள் மற்றும் செயற்குழு, பொதுக்குழு உறுப்பினர்கள் என 400-க்கும் மேற்பட்டோர் ஜனநாயக விரோதமான முறையில் கட்சியிலிருந்து நீக்கப்பட்டுள்ளனர். 

கோவை, திருப்பூர், நீலகிரி, கடலூர், திருச்சி, தஞ்சாவூர், விழுப்புரம் உள்ளிட்ட பல்வேறு மாவட்டங்களில் சிறப்பாகப் பணியாற்றிய முக்கிய நிர்வாகிகள் எந்தவிதக் காரணமுமின்றி பொறுப்புகளிலிருந்து விடுவிக்கப்பட்டுள்ளது கட்சியை மேலும் பலவீனப்படுத்தியுள்ளது.

எனவே, எதிர்வரும் உள்ளாட்சித் தேர்தலைச் சந்தித்து, கட்சியை மீண்டும் வெற்றிப் பாதைக்கு அழைத்துச் செல்ல மே 13, 2026-க்குப் பிறகு பொறுப்புகளிலிருந்து விடுவிக்கப்பட்ட அனைவரையும் மீண்டும் அதே பொறுப்புகளில் நியமித்து, புரட்சித்தலைவர் மற்றும் அம்மாவின் வழியில் 'மறப்போம், மன்னிப்போம்' என்ற அடிப்படையில் செயல்பட வலியுறுத்தப்பட்டுள்ளது. மேலும், கட்சியின் நலன் கருதி வி.கே. சசிகலா, டி.டி.வி. தினகரன் மற்றும் மாற்றுக்கட்சிக்குச் சென்ற மூத்த முன்னோடிகளுடன் பேச்சுவார்த்தை நடத்தி அவர்களை மீண்டும் கழகத்தில் இணைக்கவும், தேர்தல் வியூகங்களில் மூத்த நிர்வாகிகள் மற்றும் மாவட்டச் செயலாளர்களுடன் கலந்தாலோசித்து கூட்டு முடிவுகளை எடுக்கவும் கழகத் தலைமைக்குக் கோரிக்கை விடுக்கப்பட்டுள்ளது.