உசிலம்பட்டி: மிக்ஜாம் புயலால் பாதிக்கப்பட்ட சென்னை மக்களுக்கு நிவாரண பொருட்கள் அனுப்பி வைப்பு

மிக்ஜாம் புயலால் பாதிக்கப்பட்ட சென்னை மக்களுக்கு உசிலம்பட்டி ஊராட்சி ஒன்றிய நிர்வாகத்தினர் சார்பில் 75 ஆயிரம் மதிப்பிலான நிவாரண பொருட்களை சென்னைக்கு அனுப்பி வைத்தனர்.

உசிலம்பட்டி ஊராட்சி ஒன்றியம்

புரட்டி போட்ட மிக்ஜாம் புயல்

தலைநகர் சென்னையை  மிக்ஜாம் புயல் உலுக்கி எடுத்து சென்றுவிட்டது. வங்கக்கடலில் உருவான மிக்ஜாம் புயல் காரணமாக சென்னை, திருவள்ளூர், காஞ்சிபுரம், செங்கல்பட்டு ஆகிய வட கடலோர தமிழகத்தில் கடுமையான பாதிப்பு ஏற்பட்டது. முன் எப்போதும் இல்லாத வகையில் 40 செ.மீ மழை பதிவானது. இதனால் சென்னையில் இருக்கும் அனேக பகுதிகளில் வெள்ள நீர் சூழ்ந்துள்ளது. சென்னையில் வடபழனி, சூளைமேடு, கோடம்பாக்கம், பெருங்குடி ராயப்பேட்டை , ஊரப்பாக்கம், துறைமுகம் , எண்ணூர் , வியாசர்பாடி , சைதாபேட்டை, வேளச்சேரி, மடிப்பாக்கம், முடிச்சூர், வரதராஜபுரம் உள்ளிட்ட இடங்களில் வெள்ள நீர் புகுந்துள்ளது.  47 ஆண்டுகளுக்கு பிறகு  வரலாறு காணாத அளவிற்கு மழை பெய்த காரணத்தால் சென்னை மாநகரின் அனைத்து பகுதிகளிலும் மழைநீர் சாலைகளில் வெள்ளமாக பெருக்கெடுத்து ஓடியது.

#madurai | மிக்ஜாம் புயலால் பாதிக்கப்பட்ட சென்னை மக்களுக்கு மதுரை மாவட்டம் உசிலம்பட்டி ஊராட்சி ஒன்றிய நிர்வாகத்தினர் சார்பில் 75 ஆயிரம் மதிப்பிலான நிவாரண பொருட்களை சென்னைக்கு அனுப்பி வைத்தனர்.

| #ChennaiFloods | #ChennaiFloods2023 | #chennaicyclone | #madurai | @usilaigeetha |. pic.twitter.com/1Fsl0n3ZFz

— arunchinna (@arunreporter92) December 6, 2023

தொடரும் மீட்புப்பணிகள்

இதனால், அத்தியாவசிய தேவைகள் கடுமையாக பாதிக்கப்பட்டது. பால், தண்ணீர், மின்சாரம் போன்றவைகள் இல்லாமல் மூன்று நாளாக மக்கள் தவித்து வருகின்றனர். சில இடங்களில் மழைநீர் வடிந்து மின்சாரம் வழங்கப்பட்டது. இருப்பினும், தாழ்வான பகுதிகளில் மின்சாரம் கிடைக்காமலும்,  மழைநீர் வடியாமலும் மக்கள் தவித்து வருகின்றனர். எனவே, மூன்றாவது நாட்களாக மீட்பு பணிகள் தீவிரமாக நடைபெற்று வருகிறது. மாநகராட்சி பணியாளர்கள், தீயணைப்பு வீரர்கள், மாநில பேரிடர் மீட்புப் படை, இந்திய விமானப்படை, கடலோர காவல் படை, தேசிய பேரிடர் மீட்பு படையைச் சேர்ந்தவர்கள் மீட்புப் பணியில் தீவிரமாக ஈடுபட்டு வருகின்றனர். படகுகளை வாடகைக்கு எடுத்தது மட்டுமின்றி, மீனவர்களின் படகுகளும் மீட்பு பணிக்காக பயன்படுத்தப்பட்டுள்ளன.

மிக்ஜாம் புயல் தாக்குதலால் சென்னை மாநகரம் இன்றும் மீளமுடியாது பல்வேறு பகுதிகளில் மழைநீர் தேங்கி காணப்படுகிறது. இதனால் தங்களின் இயல்பு வாழ்க்கை பாதிக்கப்பட்டு, உணவு, மின்சாரமின்றி பலரும் மழைநீரில் தவித்து வரும் சூழலில் பல்வேறு கட்சியினர் மற்றும் அமைப்பினர் நிவாரண பொருட்களை வழங்கி அவர்களுக்கு ஆறுதல் தெரிவித்து வருகின்றனர். இதன் ஒரு பகுதியாக மதுரை மாவட்டம் உசிலம்பட்டி ஊராட்சி ஒன்றியம் சார்பில், ஊராட்சி ஒன்றிய அலுவலக பணியாளர்கள், ஊராட்சி மன்ற தலைவர்கள், கவுன்சிலர்கள் ஒருங்கிணைந்து சென்னை மக்களுக்காக சுமார் 75 ஆயிரம் மதிப்பில் அரிசி, பருப்பு, எண்ணெய், சீனி, பிஸ்கட் உள்ளிட்ட நிவாரண பொருட்களை அனுப்பி வைத்தனர். உசிலம்பட்டி ஊராட்சி ஒன்றிய அலுவலகத்திலிருந்து உசிலம்பட்டி ஊராட்சி ஒன்றிய சேர்மன் ரஞ்சனி சுதந்திரம், வட்டார வளர்ச்சி அலுவலர்கள் தங்கவேல், கண்ணன் உள்ளிட்டோர் பொருட்களை வாகனத்தில் ஏற்றி சென்னைக்கு அனுப்பி வைத்தனர்.,

 

 

மேலும் சென்னை தொடர்பான செய்திகள் படிக்க இங்கே கிளிக் செய்யவும் - Cyclone Michaung: ”சென்னையில் 80 சதவீதம் மின் விநியோகம் சரி செய்யப்பட்டுள்ளது" - தலைமை செயலாளர் சிவ்தாஸ் மீனா

 

இதைப் படிக்க மிஸ் பண்ணாதீங்க பாஸ் - ”மழை நீர் வடிகாலுக்கு 4 கோடி கூட செலவு செய்யவில்லை” - முன்னாள் அமைச்சர் செல்லூர் ராஜூ பேட்டி !