இளைஞர்களே இதான் சான்ஸ் : 8,000 -க்கும் மேல் உதவித்தொகை..! ஆட்சியரின் அசத்தல் அறிவிப்பு..
மயிலாடுதுறை மாவட்டத்தில் உதவித்தொகையுடன் கூடிய தொழிற்பழகுநர் பயிற்சிக்கான சேர்க்கை முகாம் டிசம்பர் 8 -ம் தேதி நடைபெற உள்ளதாக மாவட்ட ஆட்சியர் அறிவிப்பு வெளியிட்டுள்ளார்.
மயிலாடுதுறை மாவட்ட இளைஞர்கள் வேலைவாய்ப்பு மற்றும் திறன் மேம்பாட்டில் முன்னேறுவதற்காக, தேசிய தொழிற்பழகுநர் பயிற்சி அபிவிருத்தி திட்டத்தின் கீழ் (National Apprenticeship Promotion Scheme), மாபெரும் தொழிற்பழகுநர் பயிற்சி (Apprenticeship) சேர்க்கை முகாம் ஒன்று நடைபெற உள்ளது. ஆர்வமுள்ள இளைஞர்கள் இந்த அரிய வாய்ப்பைப் பயன்படுத்திக்கொள்ளுமாறு மயிலாடுதுறை மாவட்ட ஆட்சியர் ஹெச்.எஸ். ஸ்ரீகாந்த், கேட்டுக்கொண்டுள்ளார்.
முகாம் நடைபெறும் நாள் மற்றும் இடம்
இந்தச் சிறப்புச் சேர்க்கை முகாம் வருகிற டிசம்பர் 8, 2025 ஆம் தேதி (திங்கட்கிழமை) அன்று நடைபெற உள்ளது.
நேரம் : காலை 9.00 மணி
இடம் : ஏழுமலையான் தனியார் தொழிற்பயிற்சி நிலைய வளாகம், மயிலாடுதுறை மாவட்டம்.
அரசு மற்றும் தனியார் நிறுவனங்கள் பங்கேற்பு
இந்த முகாமில் மயிலாடுதுறை மாவட்டத்தில் இயங்கி வரும் பல்வேறு முன்னணி அரசு மற்றும் தனியார் நிறுவனங்கள் கலந்துகொண்டு, தகுதியான இளைஞர்களைத் தொழிற்பழகுநர் பயிற்சிக்காகத் தேர்வு செய்ய உள்ளனர்.
முக்கியமாகப் பங்கேற்கும் நிறுவனங்கள்
* தமிழ்நாடு அரசுப் போக்குவரத்துக் கழகம்
* மின் உற்பத்தி மற்றும் பகிர்மானக் கழகம் (TANGEDCO)
* ஆவின் (Aavin) உள்ளிட்ட அரசு பொதுத்துறை நிறுவனங்கள்.
* சிறு, குறு மற்றும் நடுத்தர தொழில் நிறுவனங்கள் (SME Sector) இந்த நிறுவனங்கள், ஐ.டி.ஐ. (ITI) பயிற்சி முடித்தவர்களை அவர்களின் பயிற்சிப் பிரிவுகளுக்கு ஏற்பத் தேர்வு செய்ய இருக்கின்றனர்.
கல்வித் தகுதிகள் மற்றும் பயிற்சி விவரங்கள்
தொழிற்பழகுநர் பயிற்சிக்குத் தேர்வு செய்யப்படுவதற்கு இரண்டு வகையான தகுதிகள் அறிவிக்கப்பட்டுள்ளன.
1. ஐ.டி.ஐ. பயிற்சி முடித்தவர்கள்:
ஐ.டி.ஐ. பயிற்சி முடித்தவர்கள் நேரடியாகச் சம்பந்தப்பட்ட நிறுவனங்களில் தொழிற்பழகுநர் பயிற்சிக்காகத் தேர்வு செய்யப்படுவார்கள்.
2. புதிய தொழிற்பழகுநர்கள் (Fresher Apprentices):
ஐ.டி.ஐ. பயிற்சி முடிக்காத, 8, 10 மற்றும் 12-ஆம் வகுப்பு கல்வித்தகுதி உடைய இளைஞர்கள் நேரடியாக தொழிற்சாலைகளில் புதிய தொழிற்பழகுநர்களாக (Fresher Apprentice) சேர்க்கப்படுவார்கள். இவர்களுக்குப் பின்வரும் கால அவகாசத்தில் பயிற்சி அளிக்கப்படும்
* அடிப்படைப் பயிற்சி: 3 முதல் 6 மாத காலம்.
* தொழிற்பழகுநர் பயிற்சி: அடிப்படைப் பயிற்சிக்குப் பிறகு ஓராண்டு முதல் ஈராண்டுகள் வரை.
இந்த முழுமையான பயிற்சிக்குப் பிறகு, அவர்களுக்கு தேசிய தொழிற்பழகுநர் சான்றிதழ் (National Apprenticeship Certificate - NAC) வழங்கப்படும்.
உதவித்தொகை மற்றும் பலன்கள்
* உதவித்தொகை: தொழிற்பழகுநர் பயிற்சியின்போது, நிறுவனம் சார்பில் உதவித்தொகையாக ₹8,000/- முதல் வழங்கப்படும்.
* வேலைவாய்ப்பில் முன்னுரிமை: தேசிய தொழிற்பழகுநர் சான்றிதழ் (NAC) பெறுவதன் மூலமாக, அரசு மற்றும் தனியார் வேலைவாய்ப்பில் இளைஞர்களுக்கு முன்னுரிமை அளிக்கப்படும்.
* பணி வாய்ப்புகள்: இச்சான்றிதழ் இந்திய அளவிலும், அயல்நாடுகளிலும் பணிபுரிந்திட மிகவும் பயனுள்ளதாக அமையும். இது இளைஞர்களின் திறன் மேம்பாட்டுக்கும் எதிர்கால வேலைவாய்ப்புக்கும் ஒரு வலுவான அடித்தளமாக அமையும்.
தொடர்புக்கு
இந்த அரிய வாய்ப்பினை மயிலாடுதுறை மாவட்ட இளைஞர்கள் தவறாமல் பயன்படுத்திக் கொள்ள வேண்டும் என மயிலாடுதுறை மாவட்ட ஆட்சித் தலைவர் ஹெச்.எஸ். ஸ்ரீகாந்த் வலியுறுத்தியுள்ளார்.
இந்த முகாம் மற்றும் தொழிற்பழகுநர் பயிற்சி குறித்து மேலும் தகவல்கள் தேவைப்பட்டால், கீழ்க்கண்ட அதிகாரியைத் தொடர்புகொள்ளலாம் என கூறப்பட்டுள்ளது.
உதவி இயக்குநர்,
மாவட்ட திறன் பயிற்சி அலுவலகம்,
தஞ்சாவூர், மயிலாடுதுறை (பொறுப்பு).
தொலைபேசி எண்: 9499055725
தலைப்பு செய்திகள்
ட்ரெண்டிங் செய்திகள்
