"கருத்து சுதந்திரத்திற்கு எல்லை உண்டு" – உதயநிதி கைது விவகாரத்தில் நடிகர் விஷால் கருத்து
உதயநிதி ஸ்டாலின் கைது விவகாரம் குறித்து நடிகர் விஷால் கருத்து தெரிவித்துள்ளார். அவரது பேச்சு புதிய விவாதத்தை ஏற்படுத்தியுள்ளது.
எதிர்க்கட்சித் தலைவர் உதயநிதி ஸ்டாலின் கைது செய்யப்பட்ட விவகாரம் தமிழக அரசியலில் தொடர்ந்து விவாதத்தை ஏற்படுத்தி வரும் நிலையில், நடிகர் விஷால் இதுகுறித்து தெரிவித்த கருத்து கவனம் பெற்றுள்ளது. கருத்து சுதந்திரம், அரசியல் விமர்சனம் மற்றும் பொது வாழ்க்கையில் பேசப்படும் வார்த்தைகளின் பொறுப்பு குறித்து அவர் பேசியுள்ள கருத்துகள் சமூக வலைதளங்களிலும் அரசியல் வட்டாரங்களிலும் பேசுபொருளாகியுள்ளன.
உதயநிதி கருத்து குறித்து நடிகர் விஷால்
இதுகுறித்து பேசிய விஷால், "கருத்து சுதந்திரத்திற்கு ஒரு எல்லை இருக்கிறது. சில விஷயங்களைத் தவிர்க்கலாம். சில விஷயங்களை பேசக்கூடிய சூழலும் ஏற்படலாம். அதுதான் அரசியல். அரசியலில் ஸ்கிரிப்டாக பேசுவது வேறு, தற்செயலாக பேசுவது வேறு. நான் பேசும் பல விஷயங்களே சிலருக்கு சர்ச்சையாகத் தோன்றும். ஒரு லயோலா கல்லூரி சீனியர், இன்னொரு லயோலா கல்லூரி மாணவரை சிறையில் அடைப்பார் என்று நான் கனவிலும் நினைக்கவில்லை. முதலமைச்சர் குறித்து பேசினால் பிரச்சனைகள் வரலாம். நீங்கள் பேசியது தவறு என்பதால் தான் உங்களை சிறையில் வைத்தார்கள். இதுதான் அரசியல்" என்று தெரிவித்துள்ளார்.
உதயநிதி கைது பின்னணி
உதயநிதி ஸ்டாலின் கடந்த வாரம் தஞ்சாவூரில் நடைபெற்ற காவிரி உரிமை பேரணியில் உரையாற்றியபோது, நடிகை திரிஷா குறித்து எழுந்த கோஷங்களுக்கு பதிலளிக்கும் வகையில் சில கருத்துகளை தெரிவித்தார். அந்தப் பேச்சு முதலமைச்சர் விஜய் மற்றும் நடிகை திரிஷாவை அவமதிக்கும் வகையிலும், பெண்களை இழிவுபடுத்தும் வகையிலும் இருப்பதாகக் கூறி பல்வேறு அமைப்புகள் மற்றும் ஆளுங்கட்சி நிர்வாகிகள் காவல்துறையில் புகார் அளித்தனர். இதையடுத்து பல்வேறு பிரிவுகளின் கீழ் வழக்குப்பதிவு செய்த காவல்துறை, உதயநிதி ஸ்டாலினை கைது செய்து நீதிமன்றத்தில் ஆஜர்படுத்தியது. பின்னர் அவர் நீதிமன்றக் காவலுக்கு அனுப்பப்பட்டார்.
உதயநிதி கைது செய்யப்பட்டதைத் தொடர்ந்து சென்னை உள்ளிட்ட தமிழகத்தின் பல்வேறு பகுதிகளில் திமுகவினர் போராட்டத்தில் ஈடுபட்டனர். திமுக தலைவர் மு.க. ஸ்டாலின் உள்ளிட்ட கட்சியின் மூத்த நிர்வாகிகள், கருத்து சுதந்திரத்தை ஒடுக்கும் நோக்கத்திலேயே இந்த கைது நடவடிக்கை மேற்கொள்ளப்பட்டதாக குற்றம்சாட்டினர். காங்கிரஸ், விடுதலைச் சிறுத்தைகள் கட்சி, மார்க்சிஸ்ட் கம்யூனிஸ்ட் உள்ளிட்ட எதிர்க்கட்சித் தலைவர்களும் கைது நடவடிக்கைக்கு கண்டனம் தெரிவித்தனர்.
மறுபுறம், சட்டத்தை மீறும் வகையில் யார் பேசினாலும் நடவடிக்கை எடுக்கப்படும் என்றும், புகார்களின் அடிப்படையிலும் நீதிமன்ற நடைமுறைகளின்படியும் கைது மேற்கொள்ளப்பட்டதாக ஆளுங்கட்சி தரப்பில் விளக்கம் அளிக்கப்பட்டது.
இதற்கிடையில் உதயநிதி தாக்கல் செய்த ஜாமீன் மனுவை நீதிமன்றம் ஏற்றுக்கொண்டதைத் தொடர்ந்து அவர் விடுதலையானார். சிறையில் இருந்து வெளியே வந்த பிறகு, தனது அரசியல் நிலைப்பாட்டில் எந்த மாற்றமும் இல்லை என்றும், மக்களின் பிரச்சினைகளுக்காக தொடர்ந்து குரல் கொடுப்பேன் என்றும் அவர் தெரிவித்தார்.
இந்தச் சூழலில்தான் நடிகர் விஷாலும் தனது கருத்தைப் பதிவு செய்துள்ளார். கருத்து சுதந்திரத்திற்கு எல்லை இருக்கிறது என்றும், அரசியலில் பேசப்படும் வார்த்தைகளுக்கு பொறுப்பு அவசியம் என்றும் அவர் கூறியிருப்பது புதிய அரசியல் விவாதத்திற்கு வழிவகுத்துள்ளது.
தலைப்பு செய்திகள்
ட்ரெண்டிங் செய்திகள்
