Cauvery Issue : "நாங்களே வறட்சியில் இருக்கோம்! ஹெலிகாப்டர்ல வந்து பாருங்க" விஜய்க்கு DKS அழைப்பு!

காவிரி நீர் ஒழுங்காற்றுக் குழுவின் உத்தரவை எதிர்த்து காவிரி நீர் மேலாண்மை வாரியத்திடம் மேல்முறையீடு செய்யப் போவதாகத் தெரிவித்துள்ள கர்நாடக அரசு, அம்மாநிலத்தின் காவிரிப் படுகையில் நிலவும் கள நிலவரத்தை நேரில் வந்து பார்வையிடுமாறு தமிழ்நாடு முதல்வர் ஜோசப் விஜய்க்கு அழைப்பு விடுத்துள்ளது.

தமிழ்நாட்டிற்கு நாள்தோறும் 3,500 கனஅடி நீரை 15 நாட்களுக்குத் திறந்துவிடுமாறு கர்நாடகாவிற்கு காவிரி நீர் ஒழுங்காற்றுக் குழு உத்தரவிட்டது. கர்நாடகாவின் நீர்ப்பிடிப்புப் பகுதிகளில் கடும் வறட்சி மற்றும் மழைப் பொழிவு பற்றாக்குறை நிலவி வரும் சூழலில் பிறப்பிக்கப்பட்ட இந்த உத்தரவு, மாண்டியா மற்றும் மைசூர் உள்ளிட்ட முக்கிய ஆற்றுப் படுகை மாவட்டங்களில் தீவிர போராட்டங்களைத் தூண்டியுள்ளது

இந்த நிலையில் டெல்லியில் செய்தியாளர்களிடம் பேசிய கர்நாடகா முதல்வர் டி.கே சிவகுமார், "காவிரி நீர் மேலாண்மை வாரியத்தில் மேல்முறையீடு செய்வதற்கான ஆயத்தப் பணிகள் தற்போது நடைபெற்று வருகின்றன. "இருப்பினும், இந்த முறை கர்நாடகா தண்ணீர் திறந்துவிட உத்தரவிட்டுள்ளது. நீர்வளத்துறை அமைச்சர் ராமலிங்க ரெட்டி மற்றும் சம்பந்தப்பட்ட அதிகாரிகளுடன் சாத்தியமான அனைத்து சட்ட வழிகள் குறித்தும் ஆலோசித்துள்ளோம்," என்று அவர் கூறினார்.

"காவிரி ஆற்றுப் படுகையின் நிலைமையை நேரில் வந்து பார்வையிடுமாறு முதல்வர் விஜய்யிடம் நாங்கள் கோரிக்கை விடுத்துள்ளோம். அவரது பயணத்திற்குத் தேவையான ஹெலிகாப்டர் வசதிகள் உள்ளிட்ட அனைத்து ஏற்பாடுகளையும் கர்நாடக அரசு செய்யும் என்றும் அவருக்குத் தெரிவித்துள்ளேன். அவர் கள நிலவரத்தை நேரில் பார்த்துவிட்டு, அதன்பிறகு என்ன முடிவு எடுக்கிறார் என்று பார்ப்போம்," என்றும் சிவகுமார்  கூறினார்.

நீண்டகாலமாக நீடித்து வரும் காவிரி நீர்ப் பகிர்வுப் பிரச்சனை, வழக்கமாக வறட்சி மற்றும் குறைந்த மழைப்பொழிவு உள்ள ஆண்டுகளில் மேலும் தீவிரமடைகிறது. நீர் திறப்பிற்கு எதிர்ப்பு தெரிவிக்கும் கர்நாடகா, காவிரிப் படுகையில் உள்ள நான்கு அணைகளுக்கான மொத்த நீர்வரத்து கடந்த 30 ஆண்டுகளின் சராசரியை விட சுமார் 66 சதவீதம் குறைவாக இருப்பதாக கூறியுள்ளது. இதனால், அம்மாநிலத்தின் குடிநீர் தேவையைப் பூர்த்தி செய்யவே போதுமான தண்ணீர் இல்லாத நிலை உள்ளதாகவும் தெரிவித்துள்ளது.

அதேவேளையில், குறுவை சாகுபடியைக் காப்பாற்றவும், டெல்டா விவசாயிகளின் குடிநீர் மற்றும் விவசாயத் தேவைகளைப் பூர்த்தி செய்யவும் உச்ச நீதிமன்றத் தீர்ப்பின்படி தங்களுக்குச் சேர வேண்டிய உரிய நீரை கர்நாடகா உடனடியாகத் திறந்துவிட வேண்டும் என்பதில் தமிழ்நாடு அரசு உறுதியாக உள்ளது.