ரஷ்யாவில் "தல": சமூக வலைதளங்களில் ட்ரெண்டாகும் அஜித்தின் நியூ ஸ்டில்ஸ்!
நடிகர் அஜித்குமார் ரஷ்யாவில் எடுத்துக்கொண்ட புகைப்படம் வெளியாகியுள்ளது. இந்த புகைப்படம் தற்போது சமூக வலைதளங்களில் ட்ரெண்டாகி வருகிறது.
நடிகர் அஜித்குமார் தற்போது எச்.வினோத் இயக்கத்தில் வலிமை திரைப்படத்தில் நடித்து முடித்துள்ளார். கொரோனா மற்றும் ஊரடங்கு காரணமாக வலிமை படத்தின் படப்பிடிப்பு நீண்ட நாட்களாக நடைபெற்று வந்தது. பெரும்பாலான காட்சிகள் படமாக்கப்பட்டு, படத்தின் போஸ்டரும், ஒரு பாடல் மட்டும் வெளியிடப்பட்டது. ஒரு சண்டை காட்சி மட்டும ரஷ்யாவில் படமாக்கப்பட வேண்டியிருந்தது. இந்த நிலையில், கடந்த சில தினங்களுக்கு முன்பு அஜித்குமார் உள்பட படக்குழுவினர் ரஷ்யா சென்றிருந்தனர். அங்கே மீதமிருந்த சண்டை காட்சி படம்பிடிக்கப்பட்டு, வலிமை படத்தின் படப்பிடிப்பு முழுவதும் நிறைவு பெற்றது.
இந்த நிலையில், நடிகர் அஜித்குமார் ரஷ்யாவில் நண்பர் ஒருவருடன் எடுத்துக்கொண்ட புகைப்படம் தற்போது டுவிட்டரில் ட்ரெண்டாகி வருகிறது. தனது நண்பர் ஒருவருடன் ஹோட்டல் ஒன்றில் நடிகர் அஜித்குமார் அமர்ந்திருப்பது போல ஒரு புகைப்படம் வெளியாகியுள்ளது. கருப்பு நிற டீ- சர்டில் ஹாலிவுட் நடிகரைப் போன்று அஜித்குமார் அட்டகாசமாக அந்த படத்தில் உள்ளார்.
அஜித்குமார் தீவிர பைக் பிரியர் என்றும், பைக்ரேசர் என்றும் அனைவருக்கும் தெரியும். ரஷ்யாவில் விலையுயர்ந்த பைக்கின் முன்பு பைக் ரேசின்போது அணியும்பாதுகாப்பு ஆடையுடன் அஜித்குமார் ஒரு புகைப்படம் எடுத்துள்ளார்.
பின்னர், அதே ஆடையுடன் அந்த பகுதியில் உள்ள தங்கும் விடுதிகளுக்கு நடுவில் நின்று அசத்தலான ஒரு போஸ் கொடுத்துள்ளார். பின்னர் தனது நண்பருடன் ஒரு புகைப்படம் எடுத்துள்ளார். அவரது நண்பரும் பைக் ரேஸ் உடையில் இருக்கிறார்.
நடிகர் அஜித்தை பொது இடங்கள், பொது நிகழ்ச்சிகளில் காண்பது என்பது மிகவும் அரிதானது. இதனால், அவர் வெளியில் எப்போது பங்கேற்றாலும், அவரது புகைப்படம் வெளியானாலும் அந்த புகைப்படங்கள் சமூக வலைதளங்களில் ட்ரெண்டாகி விடுவது வழக்கம்.
வலிமை படத்தின் அப்டேட்டிற்காக கோவில் பூசாரி முதல் பிரதமர் மோடி வரை கேட்ட அவரது ரசிகர்களுக்கு, நீண்ட நாட்கள் காத்திருப்பிற்கு பின்பு வலிமை போஸ்டரும், வலிமை படத்தின் பாடலும் கிடைத்தது. அதன்பின்பு தற்போது வரை வலிமை படத்தில் எந்தவொரு புகைப்படமும், அப்டேட்டும் கிடைக்கவில்லை. யுவன்ஷங்கர் ராஜா பிறந்த நாளை முன்னிட்டு வலிமை படத்தின் அடுத்த பாடல் வெளியிடப்படும் என்று எதிர்பார்த்த ரசிகர்களுக்கு ஏமாற்றமே மிஞ்சியது.
இந்த நிலையில், ரஷ்யாவில் நடிகர் அஜித்குமார் எடுத்துக்கொண்ட புகைப்படங்கள் தற்போது வெளியாகியிருப்பது அவரது ரசிகர்களுக்கு மிகுந்த உற்சாகத்தை ஏற்படுத்தியுள்ளது. அவரது ரசிகர்கள் இந்த புகைப்படத்தை சமூக வலைதளங்களில் பகிர்ந்து வருகிறார். மேலும், டுவிட்டரில் இந்த புகைப்படங்கள் தற்போது ட்ரெண்டாகி வருகிறது.
தலைப்பு செய்திகள்
ட்ரெண்டிங் செய்திகள்
