விவசாயிகளுக்கு இதுதான் கடைசி வாய்ப்பு! வேளாண் அடுக்ககம் திட்டத்தில் இணைய தவறினால் அரசின் நலத்திட்டங்கள் கிடைக்காது!
மயிலாடுதுறை மாவட்ட விவசாயிகள் வேளாண் அடுக்ககம் திட்டம் இணைந்து மத்திய மாநில அரசின் நலத்திட்டங்களை பெற இறுதி வாய்ப்பு வழங்கப்பட்டுள்ளது.
மயிலாடுதுறை: மத்திய மற்றும் மாநில அரசுகளின் பல்வேறு வேளாண் நலத் திட்டங்களின் பலன்களை விவசாயிகள் இனி எந்தவித காலதாமதமும் இன்றி விரைவாகப் பெறுவதற்காக, தமிழ்நாட்டில் செயல்படுத்தப்பட்டு வரும் வேளாண் அடுக்ககம் (Agri Stack) திட்டத்தில் மயிலாடுதுறை மாவட்ட விவசாயிகள் உடனடியாகப் பதிவு செய்யுமாறு மாவட்ட ஆட்சியர் ஹெச்.எஸ். ஸ்ரீகாந்த் முக்கிய அறிவிப்பை வெளியிட்டுள்ளார்.
ஏற்கனவே கால அவகாசம் அளிக்கப்பட்டிருந்தும், மாவட்டத்தில் இன்னும் 38 சதவீத விவசாயிகள் இந்த முக்கிய திட்டத்தில் இணையாமல் இருப்பது கவலை அளிப்பதாகவும், உடனடியாகப் பதிவு செய்தால் மட்டுமே எதிர்காலத்தில் அனைத்து நலத்திட்டங்களையும் தடையின்றிப் பெற முடியும் எனவும் ஆட்சியர் தனது அறிக்கையில் திட்டவட்டமாகத் தெரிவித்துள்ளார்.
வேளாண் அடுக்ககம் என்றால் என்ன? ஏன் அவசியம்?
விவசாயிகள் அரசின் திட்டப்பலன்களைப் பெறும்போது, ஒவ்வொரு முறையும் நில உடைமை விவரங்கள், பயிர் சாகுபடி அறிக்கை போன்ற ஆவணங்களைச் சமர்ப்பிக்க வேண்டிய நிலை உள்ளது. இதனால் ஏற்படும் காலதாமதம் மற்றும் ஆவணச் சிக்கல்களைத் தவிர்க்கும் நோக்கத்துடன், விவசாயிகளின் அனைத்துத் தொடர்புடைய விவரங்களையும் மின்னணு முறையில் ஒரே இடத்தில் சேகரித்து ஒருங்கிணைக்கும் மாபெரும் திட்டமே வேளாண் அடுக்ககம் ஆகும்.
இந்தத் திட்டம் விவசாயிகளின் விவரங்களை ஒரே குடையின் கீழ் கொண்டு வருவதன் மூலம், அவர்கள் குறித்த நேரத்தில் அரசின் திட்டங்களில் பயன்பெற ஏதுவாகிறது. அனைத்து ஆவணங்களும் மின்னணு முறையில் இணைக்கப்பட்ட பின்னர், ஒவ்வொரு விவசாயிக்கும் ஒருங்கிணைக்கப்பட்ட ஆதார் எண் போன்ற தனித்துவமான தேசிய அளவிலான அடையாள எண் ஏற்படுத்தப்படும். இந்த அடையாள எண் எதிர்காலத்தில் திட்டப்பலன்களைப் பெறுவதற்கான ஒற்றைச் சாளரமாகச் செயல்படும்.
மயிலாடுதுறை மாவட்டத்தில் பின்னடைவு!
வேளாண் அடுக்ககம் திட்டத்தில் பதிவு செய்ய கால அவகாசம் கொடுக்கப்பட்ட போதிலும், மயிலாடுதுறை மாவட்டத்தில் இதுநாள்வரை 20,193 பட்டாதாரர்கள் மட்டுமே பதிவேற்றம் முடித்துள்ளனர். இது மொத்த விவசாயிகளில் 62 சதவீதமே ஆகும். இன்னும் 38 சதவீத விவசாயிகள் வேளாண் அடுக்ககம் திட்டத்தில் இணையாமல் உள்ளனர்.
மாவட்ட ஆட்சியர் ஹெச்.எஸ்.ஸ்ரீகாந்த், பதிவு செய்யாமல் விடுபட்டுள்ள இந்த விவசாயிகள் காலத்தின் முக்கியத்துவத்தை உணர்ந்து, உடனடியாகத் தங்கள் விவரங்களைப் பதிவேற்றம் செய்யுமாறு கேட்டுக்கொண்டுள்ளார்.
திட்டப்பலன்கள் தொடர்ந்து கிடைக்க இதுவே வழி
வேளாண் அடுக்ககம் திட்டத்தில் பதிவு செய்வது என்பது இனிமேல் வரும் மத்திய மற்றும் மாநில அரசின் அனைத்து வேளாண் நலத்திட்டப் பலன்களையும் பெறுவதற்கு அடிப்படை தேவையாகிறது. குறிப்பாக, பிரதம மந்திரி கவுரவ நிதித் திட்டத்தின் (PM-KISAN) கீழ் நிதி உதவி பெறும் விவசாயிகள் தடையின்றித் திட்டப் பலன்களைத் தொடர்ந்து பெற இத்திட்டத்தில் இணைவது கட்டாயம்.
முக்கிய அறிவிப்பு: அடுத்த தவணை தொகை, வேளாண் அடுக்ககம் திட்டத்தில் இணைந்து பதிவு செய்த விவசாயிகளுக்கு மட்டுமே வழங்கப்படும் என மாவட்ட ஆட்சியர் திட்டவட்டமாகத் தெரிவித்துள்ளார். மேலும், 2025-2026 ஆம் நிதி ஆண்டு முதல், PM-KISAN, பயிர்க் காப்பீடுத் திட்டம் (PMFBY) போன்ற ஒன்றிய மற்றும் மாநில அரசின் திட்டங்களில் விவசாயிகள் எளிதில் பயன்பெற, இந்த தேசிய அளவிலான தனித்துவ அடையாள எண் மிகவும் அவசியம்.
பதிவு செய்வதற்கான வழிமுறைகள் மற்றும் கடைசி நாள்
விவசாயிகளின் நலன் கருதி, மயிலாடுதுறை மாவட்ட நிர்வாகம், சிறப்பு முகாம்கள் மற்றும் பொது சேவை மையங்கள் மூலம் பதிவு செய்யும் வசதியை ஏற்படுத்தியுள்ளது.
பதிவு செய்யத் தேவையான விவரங்கள்
* நில உடைமை ஆவண விவரங்கள்
* ஆதார் எண்
* கைபேசி எண்
பதிவு செய்ய அணுக வேண்டிய இடங்கள்
* சிறப்பு முகாம்கள்: விவசாயிகள் தங்களது கிராமங்களில் உள்ள ஊராட்சி மன்ற அலுவலகம் அல்லது கிராம நிர்வாக அலுவலகங்களில் வேளாண்மை உழவர் நலத்துறை அலுவலர்களால் நடத்தப்படும் சிறப்பு முகாம்களுக்கு நேரடியாகச் செல்லலாம்.
* கள அலுவலர்கள்: தங்கள் கிராமத்திற்கு ஒதுக்கீடு செய்யப்பட்ட தோட்டக்கலைத்துறை மற்றும் வேளாண்மைத்துறை கள அலுவலர்களை கிராம நிர்வாக அலுவலகத்தில் நேரில் சந்தித்து விவரங்களை அளிக்கலாம்.
* பொது சேவை மையங்கள் (CSCs): அருகில் உள்ள பொது சேவை மையங்களுக்குச் (CSCs) சென்றும் நில உடைமை விவரங்களைப் பதிவு செய்து கொள்ளலாம்.
பதிவு செய்யக் கடைசி நாள்: 15.11.2025
விவசாயிகள் எவ்விதக் கட்டணமும் செலுத்தத் தேவையில்லை என்றும், உடனடியாகக் கொடுக்கப்பட்டுள்ள காலக்கெடுவுக்குள் இத்திட்டத்தில் பதிவு செய்து பயன்பெறுமாறும் மாவட்ட ஆட்சியர் ஹெச்.எஸ்.ஸ்ரீகாந்த் மீண்டும் வலியுறுத்தியுள்ளார்.
தலைப்பு செய்திகள்
ட்ரெண்டிங் செய்திகள்
