வாழை & மரவள்ளி விவசாயிகளுக்கு முக்கிய அறிவிப்பு! ரபி 2025 பயிர் காப்பீடு: இழப்பீடு பெற உடனே விண்ணப்பியுங்கள்!
வாழை & மரவள்ளி விவசாயிகள் ரபி 2025 பயிர் காப்பீடு செய்வது தொடர்பாக மயிலாடுதுறை மாவட்ட ஆட்சியர் முக்கிய அறிவிப்பை வெளியிட்டுள்ளார்.
மயிலாடுதுறை மாவட்ட விவசாயிகள், ரபி 2025 பருவத்தில் பயிரிடப்பட்ட வாழை மற்றும் மரவள்ளிப் பயிர்களுக்கு புதுப்பிக்கப்பட்ட பிரதம மந்திரி பயிர் காப்பீடு திட்டத்தின் (PMFBY) கீழ் காப்பீடு செய்து, இயற்கை இடர்பாடுகளால் ஏற்படும் இழப்புகளிலிருந்து தங்களைப் பாதுகாத்துக் கொள்ளுமாறு மாவட்ட நிர்வாகம் சார்பில் கேட்டுக்கொள்ளப்பட்டுள்ளது. இதுகுறித்து மயிலாடுதுறை மாவட்ட ஆட்சியர் ஹெச்.எஸ். ஸ்ரீகாந்த், வெளியிட்டுள்ள அறிவிப்பில், குறிப்பிட்ட பிர்க்காக்களில் அறிவிக்கை செய்யப்பட்டுள்ள வாழை மற்றும் மரவள்ளிப் பயிருக்கு காப்பீடு செய்வதற்கான காலக்கெடு மற்றும் வழிமுறைகளைத் தெளிவாக எடுத்துரைத்துள்ளார்.
காப்பீடின் அவசியம்
பொதுவாக வடகிழக்கு பருவமழையின்போது, அதிக கனமழை, வெள்ளம் அல்லது புயல் போன்ற இயற்கை இடர்பாடுகளால் வாழை மற்றும் மரவள்ளி போன்ற பயிர்கள் பெரும் சேதத்தை சந்திக்க நேரிடுகிறது. இத்தகைய சமயங்களில், விவசாயிகள் தங்கள் வாழ்வாதாரத்தை மீட்டெடுக்க இந்தப் பயிர் காப்பீடு திட்டம் பேருதவியாக இருக்கும். அறிவிக்கை செய்யப்பட்டுள்ள பிர்க்காக்களைச் சார்ந்த விவசாயிகள், பிரீமியம் தொகையைச் செலுத்தி, காப்பீடு செய்வதன் மூலம் சேதமடைந்த பயிர்களுக்கு அரசாங்கத்திடமிருந்து நிவாரண உதவி பெற முடியும்.
பிரீமியம் செலுத்த கடைசி நாள்: பிப்ரவரி 28, 2026
வாழை மற்றும் மரவள்ளி பயிர்களுக்கு பிரீமியம் செலுத்தி காப்பீடு செய்ய, வரும் 28.02.2026 ஆம் தேதி கடைசி நாள் ஆகும். விவசாயிகள் இந்தக் காலக்கெடுவுக்குள் விரைந்து காப்பீடு செய்யுமாறு மாவட்ட ஆட்சியர் கேட்டுக்கொண்டுள்ளார்.
பிரீமியம் தொகை விவரம்
விவசாயிகள் செலுத்த வேண்டிய பிரீமியம் தொகை ஒரு ஹெக்டேருக்கு கீழ்க்கண்டவாறு நிர்ணயிக்கப்பட்டுள்ளது
* வாழை - ரூ. 3551.86
* மரவள்ளி - ரூ. 2686.15
காப்பீடு செய்வது எப்படி?
விவசாயிகள் காப்பீடு செய்வதை எளிமைப்படுத்த, மாவட்ட நிர்வாகம் இரண்டு பிரிவுகளாக வழிகாட்டியுள்ளது.
1. கடன் பெறும் விவசாயிகள்
அறிவிக்கை செய்யப்பட்டுள்ள பிர்க்காக்களைச் சார்ந்த, பயிர் கடன் பெற்ற விவசாயிகள், தங்கள் கடன்பெற்ற தொடக்க வேளாண்மை கூட்டுறவு வங்கிகள், தேசிய மயமாக்கப்பட்ட வங்கிகள் அல்லது பொது சேவை மையங்கள் (CSC) மூலமாக விருப்பத்தின் பேரில் காப்பீடு செய்து விண்ணப்பிக்கலாம்.
குறிப்பு: கடன் பெற்ற விவசாயிகள் காப்பீடு செய்வது விருப்பத்தின் பேரிலேயே ஆகும்.
2. கடன் பெறாத விவசாயிகள்:
அறிவிக்கை செய்யப்பட்டுள்ள பிர்க்காக்களைச் சார்ந்த கடன் பெறாத விவசாயிகள், காப்பீடு செய்ய கீழ்க்கண்ட ஆவணங்களைத் தாக்கல் செய்ய வேண்டும்:
* நடப்பு பசலி ஆண்டிற்கான அடங்கல் சான்று (கிராம நிர்வாக அலுவலரிடம் பெறப்பட்டது)
* வங்கி கணக்கு புத்தகத்தின் முதல் பக்க நகல்
* ஆதார் அட்டை நகல்
* சிட்டா
இந்த ஆவணங்களை இணைத்து, பொது சேவை மையங்கள் (CSC) அல்லது தொடக்க வேளாண்மை கடன் சங்கங்கள் மூலமாகவும் காப்பீடு செய்து கொள்ளலாம்.
கூடுதல் தகவல்களுக்கு...
திட்டம் குறித்த மேலும் ஏதேனும் தகவல் அல்லது சந்தேகம் இருப்பின், விவசாயிகள் தங்கள் பகுதிக்குட்பட்ட வட்டார தோட்டக்கலைத்துறை அலுவலகங்களை நேரில் தொடர்பு கொண்டு தெளிவு பெறலாம் என மாவட்ட ஆட்சியர் ஹெச்.எஸ். ஸ்ரீகாந்த் தனது அறிக்கையில் தெரிவித்துள்ளார். விவசாயிகள் இந்த அரிய வாய்ப்பைப் பயன்படுத்தி, தங்கள் பயிர்களைக் காப்பீடு செய்து, இயற்கை சீற்றங்களால் ஏற்படும் இழப்புகளிலிருந்து தங்களைப் பாதுகாத்துக் கொள்ளுமாறு மாவட்ட நிர்வாகம் வலியுறுத்தியுள்ளது.
Before You Go
Cockroach Janata Party | விடிய விடிய போராட்டம்... பாஜகவை அலறவிடும் காக்ரோச்! “உடனே ராஜினாமா பண்ணுங்க”
தலைப்பு செய்திகள்
ட்ரெண்டிங் செய்திகள்
