Indonesia open badminton: இந்தோனேசிய ஓபனில் அரையிறுதிக்கு முன்னேறியுள்ள சாத்விக் - சிராக்..கிடாம்பி ஸ்ரீகாந்த்திற்கு ஏமாற்றம்!

இந்தோனேசிய பேட்மிண்டன் போட்டியின் காலிறுதி போட்டி நேற்று ஜகார்த்தாவில் நடைப்பெற்றது.

சாத்விக் - சிராக்

இந்தோனேசிய ஓபன் பேட்மிண்டன் ஜகார்த்தாவில் நடைப்பெற்று வருகிறது. இதில் சிறப்பான ஆட்டத்தை வெளிப்படுத்தி எச்.எஸ்.பிரணாய், கிடாம்பி ஸ்ரீகாந்த், சாத்விக்சாய்ராஜ் ராங்கிரெட்டி – சிராக் ஷெட்டி இணை உள்ளிட்ட இந்திய வீரர்கள் காலிறுதிக்கு முன்னேறியிருந்தனர்.

இந்நிலையில் நேற்று நடைப்பெற்ற காலிறுதி போட்டியில் முதல் நிலை ஜோடியான இந்தோனேசியாவின் பாஜர் அல்பியான் – முகமது ரியான் அர்டியன்டோ-வை எதிர்க்கொண்ட இந்திய வீரர்களான சாத்விக்சாய்ராஜ் – சிராக் ஷெட்டி இணை 21-13, 21-13 என்ற நேர் செட்களில் எளிதாக வெற்றியை கைப்பற்றியது.

41 நிமிடங்கள் நடந்த இப்போட்டியில் வெற்றி பெற்றதையடுத்து அரையிறுதிக்கு முன்னேறியது சாத்விக் - சிராக் இணை.

மேலும், ஆண்கள் ஒற்றையர் பிரிவில் களமிறங்கிய இந்திய வீரர் எச்.எஸ்.பிரணாய் 21-18, 21-6 என்ற நேர் செட்களில் ஜப்பானின் கொடாய் நரோகாவை வென்று அரையிறுதிக்கு முன்னேறினார்.

மற்றொரு காலிறுதியில் இந்திய வீரரான கிடாம்பி ஸ்ரீகாந்த் சீன வீரரான லி ஷி பெங்கிடம் வீழ்ந்து வெளியேறினார்.

இதற்கு முன்னதாக பிரபல இந்திய பேட்மிண்டன் வீராங்கனையான பி.வி.சிந்து 2ஆம் சுற்றுடன் வெளியேறியிருந்தார் என்பது குறிப்பிடத்தக்கது.