முதியவரை கொன்று மூளையை ருசித்த இளைஞர்: சமைக்க தயாராக இருந்த கல்லீரல், நுரையீரல் பறிமுதல்!

அமெரிக்காவில் தன் மூளை சுறுசுறுப்பாக செயல்பட வேண்டும் என்பதற்காக முதியவரை கொன்று மூளையை சாப்பிட்ட இளைஞரை காவல்துறையினர் கைது செய்துள்ளனர்.

கொலை செய்தவர் - கொலையானவர்

அமெரிக்காவில் இதாஹோ மாகாணத்தில், ஒரு டிரக்கில் தலைகீழாக முதியவரின் சடலம் தொங்குவதாக பொதுமக்கள் காவல்துறையினருக்கு தகவல் தெரிவித்துள்ளனர். முதியவரின் உடலை கைப்பற்றிய காவல்துறையினர் மேற்கொண்ட பரிசோதனையில் உடல் முழுதும் கத்தியால் குத்தப்பட்டு, ரத்தம் அதிகளவில் வெளியேறியுள்ளது. 

மேலும், அந்த சடலத்தில் சில பாகங்கள் இல்லாதது கண்டு காவல்துறையினர் அதிர்ச்சியடைந்து விசாரணையை தொடர்ந்தனர். கொலை செய்யப்பட்டவர் 70 வயதான டேவிட் பிளாகெட் என்றும், சந்தேகத்தின் அடிப்படையில் ஜேம்ஸ் டேவிட் ரசல் என்பவர் வீட்டில் அதிரடியாக நுழைந்தனர்.

முதலில் காவல்துறையினரை அனுமதிக்க மறுத்த ஜேம்ஸ், பின் ஒரு வழியாக சோதனை நடத்த அனுமதித்துள்ளார். அப்போது, அவரது வீட்டில் ஒரு தட்டில் கல்லீரல், நுரையீரல் பாகங்கள், ரத்தம் நிறைந்த ஒரு கண்ணாடி குவளை, கத்தி, ரத்தக்கறை படிந்த 'மைக்ரோவேவ் ஓவன்'ஆகியவை இருந்தது கண்டுபிடிக்கப் பட்டது.

இதையடுத்து, ஜேம்சை கைது செய்த காவல்துறையினர் நடத்திய விசாரணையில், டேவிட் பிளாகெட்டை கொலை செய்தது நான் தான் என்றும், தன் மூளை சுறுசுறுப்பாக செயல்பட, டேவிட் பிளாகெட்டை கொன்று அவரது மூளை உள்ளிட்ட உடல் பாகங்களை சாப்பிட்டு வந்ததாக தெரிவித்துள்ளார். 

இதைக் கேட்டு முதலில் காவல்துறையினர் வழக்குப்பதிவு செய்து நீதிமன்றத்தில் ஜேம்ஸை ஆஜர் படுத்தினர். வழக்கை விசாரித்த நீதிமன்றம், ஜேம்சை மன நல மருத்துவ சோதனைக்கு அனுப்ப உத்தரவிட்டும், மாகாண சட்டப்படி நர மாமிசம் உண்போருக்கு, 14 ஆண்டுகள் சிறைத் தண்டனை வழங்கப்படும் என்றும் தெரிவித்தனர். 

இந்த வழக்கில் குற்றம் நிரூபிக்கப்பட்டு, ஜேம்சுக்கு தண்டனை கிடைத்தால், அது, இதாஹோ மாகாணத்தில் முதன் முதலாக நர மாமிசம் சாப்பிட்டவருக்கான தண்டனையாக இருக்கும் என்றும் கூறப்படுகிறது. 

மேலும் செய்திகளை காண, ABP நாடு செய்திகளை Google News -ல் பின் தொடர இங்கே கிளிக் செய்யவும்

ABP நாடு செய்திகளை சமூக வலைத்தள பக்கங்களிலும் பின் தொடரலாம்

பேஸ்புக் பக்கத்தில் தொடர

ட்விட்டர் பக்கத்தில் தொடர

யூடிபில் வீடியோக்களை காண