காங்கிரஸ் கட்சி பலவீனமாக உள்ளது உண்மைதான் - மணிசங்கர் அய்யர்

ஊழலை ஒழிப்போம் என சொல்லும் பிரதமர் மோடிக்கு கடந்த தேர்தலில் செலவு செய்ய 36,000 கோடி ரூபாய் வந்தது எப்படி?  காங்கிரஸ் மூத்த தலைவரும்  முன்னாள் மத்திய அமைச்சருமான மணிசங்கர் அய்யர் கேள்வி எழுப்பியுள்ளார்.

மணிசங்கர் அய்யர் உள்ளிட்ட காங்கிரஸ் கட்சியினர்

 மறைந்த  முன்னாள் பாரத பிரதமர் ராஜீவ் காந்தியின் 78 ஆவது பிறந்தநாள்  விழா மயிலாடுதுறையில் இன்று நடைபெற்றது. இதில் முன்னாள் மத்திய அமைச்சரும், காங்கிரஸ் மூத்த தலைவருமான மணிசங்கர் அய்யர் கலந்துகொண்டு ராஜீவ்காந்தி சிலைக்கு மாலை அணிவித்து மரியாதை செய்தார்.

அதனைத் தொடர்ந்து செய்தியாளர்களை சந்தித்தார். அப்போது அவர் கூறுகையில், ஊழலை ஒழிப்போம், ஊழலை ஒழிப்போம் என்று பிரதமர் நரேந்திர மோடி பேசிக் கொண்டிருக்கிறார். கடந்த தேர்தலில் 36,000 கோடி ரூபாய் பாரதிய ஜனதா கட்சி சார்பில் செலவு செய்யப்பட்டு நரேந்திர மோடி பிரதமராக தேர்வு செய்யப்பட்டுள்ளார். இந்த 36 ஆயிரம் கோடி ரூபாய் எங்கிருந்து வந்தது? என கேள்வி எழுப்பியவர், இது ஊழல் செய்த பணம் என குற்றம்சாட்டினர். மேலும் தொடர்ந்து பேசியவர்,  இந்தியாவில் மாற்று ஆட்சியை காங்கிரஸ்சால்  மட்டுமே தர முடியும். காங்கிரஸ் கட்சி பலவீனமாக உள்ளது உண்மைதான். வலுப்படுத்துவதற்காக ராகுல் காந்தி தமிழ்நாட்டில் இருந்து காஷ்மீர் வரை பாதயாத்திரை மேற்கொள்ள உள்ளார்.  

நமது நாடு சுதந்திரம் பெறுவதற்கு பாடுபட்டு நாட்டை  ஒருங்கிணைத்தவர் ஜவகர்லால் நேரு, அதையெல்லாம் மறைத்து மோடி நாடகமாடுகிறார். காங்கிரஸ் கட்சியில் தொடர்ந்து தலைவர்கள் வெளியேறி வருவதாக குறித்த கேள்விக்கு பதில் அளித்த அவர், காங்கிரஸ் கட்சியில் தலைவர்கள் வெளியேறுவதைப் பற்றி பயப்படத் தேவையில்லை என்னைப் போன்ற பெரிய தலைவர்கள் நிறைய பேர் உள்ளனர். 5 ஜி அலைக்கற்றை ஊழலில் சென்று கொண்டிருக்கிறது. ஊழல் இதுவரை வெளிவரவில்லை பொறுத்திருந்து பார்ப்போம் என்றார். 

காங்கிரஸ் கூட்டணி பிளவு பட்டுள்ளதால் 35 சதவீதம் வாக்கு வங்கி வைத்துள்ள பாஜக இரண்டு முறை தேர்தலில் வெற்றி பெற்றுள்ளது. 2024 - ம் ஆண்டு நாடாளுமன்ற தேர்தலில் எதிர்க்கட்சிகளை ஒருங்கிணைக்கும் முயற்சியில் காங்கிரஸ் முக்கியத்துவம் அளித்து ஈடுபட்டு வருகிறது. பிரதமர் வேட்பாளர் யார் என்பதை அப்போது முடிவு செய்து கொள்ளலாம் என்று தெரிவித்தார்.

இதேபோன்று சீர்காழி புதிய பேருந்து நிலையம் எதிரில் அமைக்கப்பட்டிருந்த ராஜீவ் காந்தியின் திரு உருவ புகைப்படத்திற்கு முன்னாள் மத்திய அமைச்சர் மணிசங்கர் அய்யர், மயிலாடுதுறை சட்டமன்ற உறுப்பினர் ராஜகுமார் மற்றும் காங்கிரஸ் கட்சி நிர்வாகிகள் பலர் கலந்து கொண்டு துதி மரியாதை செலுத்தினர்.